اراق ىشكەن سوڭ اۆتوموبيلدى يتەرىپ ۇيگە قايتسا، اراق ءىشىپ اۆتوموبيل جۇرگىزۋگە جاتا ما؟ ساقشى جاق جاۋاپ قايتاردى 

جۋىردا حۋبەي ولكەسى شيانياڭ قالاسىنىڭ تۇرعىنى لەي حانىم جول ۇستىندە ءۇش جىگىتتىڭ ءبىر شاعىن اۆتوموبيلدى بار كۇشىن سالا يتەرىپ بارا جاتقانىن بايقاپ، ولاردىڭ ”اراق ءىشىپ اۆتوموبيل جۇرگىزۋدەن باس تارتۋ“ سىندى زاڭعا بويسۇنۋ تانىمى جاقسى ەكەن دەپ قاراپ، ولاردى كەسكىنگە ءتۇسىرىپ، الەۋمەتتىك جەلىدە جاريالاپ، قىزۋ تالقى قوزعاعان. اراق ىشكەن سوڭ اۆتوموبيلدى يتەرىپ قايتسا، اراق ءىشىپ اۆتوموبيل جۇرگىزۋگە جاتا ما؟

شيانياڭ قالالىق قوعام حاۋىپسىزدىگى مەكەمەسى قاتىناس ساقشى بولىمشە اترەتى جوعارى – جاڭا تەحنيكانى دامىتۋ رايونى ۇلكەن اترەتىنىڭ حالىق ساقشىلارىنىڭ جول بويىنداعى بەينە كامەرالار تۇسىرگەن كەسكىندەردى كورۋ بارىسىندا بايقاۋىنشا، ءۇش جىگىت ءبىر شاعىن اۆتوموبيلدى يتەرىپ، دىڭچىڭ جولىنىڭ جاناما جولىمەن وڭعا بۇرىلىپ، فانۋەي جولىمەن ءجۇرىپ، تاۋيۋان جولىنىڭ جول ايرىعىنان وتكەن سوڭ، فانۋەي جولىنداعى ءمالىم اۆتوموبيل جوندەۋ دۇكەنىنىڭ ماڭىنا توقتاتقان، جالپى ارالىعى 500 مەترگە جۋىقتاعان.

بەينە كامەرادان قاراعاندا، ءبىر جىگىت شوفەر وتىراتىن ورىننىڭ سىرتىنان رولدى مەڭگەرگەن، قالعان ەكى جىگىت اۆتوموبيلدىڭ سوڭىنان يتەرگەن، اۆتوموبيلدىڭ شوفەر وتىراتىن جەرى بوس تۇرعان، ادەتتە ايتىلاتىن اۆتوموبيل جۇرگىزۋ ارەكەتىنە جاتپايدى. سونىمەن بىرگە، ولاردىڭ اۆتوموبيلدى يتەرگەن ارەكەتىنەن سۋبيەكتيۆ جاقتا اراق ىشكەن سوڭ اۆتوموبيل جۇرگىزۋگە بولمايتىنىن انىق بىلەتىنىن، سوندىقتان اۆتوموبيلدى يتەرۋ تاسىلىنەن پايدالانعانىن، بۇل ارەكەتتىڭ اراق ىشكەن سوڭ اۆتوموبيل جۇرگىزۋ سىندى سۋبيەكتيۆ تۇرعىدان قاساقانا ىستەگەن ارەكەتكە جاتپايتىنىن، اۆتوموبيلدى شوفەر جۇرگىزىپ بارا جاتقان جاعدايعا دە ۇيلەسپەيتىنىن كورىپ الۋعا بولادى، اراق ءىشىپ اۆتوموبيل جۇرگىزۋ ارەكەتى دەپ تانۋعا بولمايدى.

الايدا، كوڭىل بولۋگە تاتيتىن ءتۇيىن، «جۇڭحۋا حالىق رەسپۋبليكاسىنىڭ جولداعى قاتىناس حاۋىپسىزدىگى زاڭىنىڭ» 31 – تارماعىنداعى بەلگىلەمەلەرگە ساي، رۇقسات بەرىلمەگەن جاعدايدا، ءارقانداي ورىن مەن جەكەنىڭ جولدى يەلەپ الىپ، قاتىناسقا جاتپايتىن قيمىلمەن شۇعىلدانۋىنا بولمايدى.

كەسكىندەگى اۆتوموبيلدى يتەرۋ ارەكەتى موتورلى كولىك جولى مەن موتورلى – موتورسىز كولىكتەر ارالاس جۇرەتىن جولدا تۋىلعان، ”جولدى يەلەپ الىپ، قاتىناسقا جاتپايتىن قيمىلمەن شۇعىلدانۋ“ سىندى زاڭعا قايشى جاعداي ساقتالعان، مۇنداي ارەكەت قاتىناسقا كەدەرگىلىك جاساپ، باسقا اۆتوموبيلدەردىڭ جۇرۋىنە ىقپال جاسايدى، وزدەرىنىڭ باس اماندىعىنا دا حاۋىپ ءتوندىرۋى مۇمكىن. ەگەر اۆتوموبيلدى يتەرۋ بارىسىندا قاتىناس شىرعالاڭى تۋىلسا، موتورلى كولىكتىڭ قاتىناس شىرعالاڭىنا جاتادى.

قاتىناس تاراۋلارى اراق ىشكەن سوڭ اۆتوموبيلدى جوتكەۋ، اراق ىشكەن سوڭ ەكى دوڭگەلەكتى نەمەسە ءۇش دوڭگەلەكتى موتوتسيكل ءمىنۋ، اراق ىشكەن سوڭ تۇرعىندار اۋماعى ىشىندە اۆتوموبيل جۇرگىزۋ قاتارلى ارەكەتتەردىڭ بارلىعىنىڭ اراق ءىشىپ اۆتوموبيل جۇرگىزۋگە جاتاتىنىن، سايكەستى جازاعا تارتىلاتىنىن ەسكەرتەدى.

كەلۋ قاينارى: حالىق تورابى