پروكۋراتۋرا ورگاندارى دۋ يۇيبونىڭ پارا الۋ دەلوسىنا زاڭ بويىنشا الەۋمەتتىك ايىپتاۋ ءتۇسىردى

شينحۋا اگەنتتىگىنىڭ 6 ـ ايدىڭ 18 ـ كۇنى بەيجيڭنەن بەرگەن حابارى. ءتىلشىنىڭ 6 ـ ايدىڭ 18 ـ كۇنى ەڭ جوعارى حالىق پروكۋراتۋراسىنان ۇعىسۋىنشا، 13 ـ كەزەكتى مەملەكەتتىك حالىق قۇرىلتايى وقۋ ـ اعارتۋ، عىلىم ـ تەحنيكا، مادەنيەت، دەنساۋلىق ساقتاۋ كوميتەتىنىڭ ورىنباسار مەڭگەرۋشى مۇشەسى دۋ يۇيبونىڭ پارا الۋ دەلوسىن مەملەكەتتىك باقىلاۋ ـ تەكسەرۋ كوميتەتى تەكسەرىپ اياقتاتقان، ەڭ جوعارى حالىق پروكۋراتۋراسىنىڭ كورسەتۋىمەن سانشي ولكەسى لينفىن قالالىق حالىق پروكۋراتۋراسى تەكسەرىپ ايىپتاعان. تاياۋدا لينفىن قالالىق حالىق پروكۋراتۋراسى لينفىن قالالىق ورتا دارەجەلى حالىق سوت مەكەمەسىنە الەۋمەتتىك ايىپتاۋ ءتۇسىردى.

پروكۋراتۋرا ورگانى تەكسەرىپ ايىپتاۋ ساتىسىندا جاۋاپكەر دۋ يۇيبونىڭ ارىز - شاعىم ۇقىعىنان يگىلىكتەنەتىندىگىن زاڭ بويىنشا ۇقتىردى ءارى ايىپكەردى سۇراققا تارتىپ، اقتاۋشىنىڭ پىكىرىن تىڭدادى. پروكۋراتۋرا ورگانى بىلاي دەپ ايىپتاۋ ءتۇسىردى: ايىپكەر دۋ يۇيبو بەيجيڭ تەحنولوگيالىق داشۋەسى پارتكومىنىڭ ورىنباسار شۋجيى، ورىنباسار مەكتەپ باستىعى، پارتكومنىڭ ۇنەمىلىك ىستەرگە جاۋاپتى ورىنباسار شۋجيى، بەيجيڭ اۆياتسيا - عارىش داشۋەسى پارتكومىنىڭ شۋجيى، وقۋ - اعارتۋ مينيسترلىگى پارتگرۋپپاسىنىڭ ورىنباسار شۋجيى، ورىنباسار مينيسترى، مەملەكەتتىك 13 - كەزەكتى حالىق قۇرىلتايى تۇراقتى كوميتەتىنىڭ مۇشەسى، وقۋ - اعارتۋ، عىلىم، مادەنيەت، دەنساۋلىق ساقتاۋ كوميتەتىنىڭ ورىنباسار مەڭگەرۋشى مۇشەسى، جۇڭگو جوعارى دارەجەلى وقۋ - اعارتۋ عىلىمي قوعامى 7 -، 8 - كەزەكتى القالار كەڭەسىنىڭ باستىعى، 7 -، 8 - كەزەكتى مەملەكەتتىك جوعارى مەكتەپتەردىڭ باعالاۋ كوميسسياسىنىڭ مۇشەلەرىن قۇرۋ كوميتەتىنىڭ مەڭگەرۋشىسى قاتارلى قىزمەت قولايلىلىعىنان، سونداي - اق قىزمەت ۇقىعى، ورنى قالىپتاستىرعان قولايلى شارت – جاعدايدان پايدالانىپ باسقالارعا پايدا جەتكىزىپ، باسقالاردىڭ مال - مۇلكىن زاڭسىز قابىلداعان، سوماسى توتەنشە كوپ، زاڭ بويىنشا پارا الۋ قىلمىسى بويىنشا قىلمىستىق ىستەر جاۋاپكەرشىلىگىن قۋزاستىرۋ كەرەك.

كەلۋ قاينارى: حالىق تورابى