شيزاڭ اۆتونوميالى رايونى قۇرىلعاندىعىنىڭ 60 جىلدىعىن قۇتتىقتاۋ جينالىسى سالتاناتپەن وتكىزىلدى

8 - ايدىڭ 21 - كۇنى تۇستەن بۇرىن شيزاڭداعى ءار ۇلت، ءار سالا كادر - جۇرتشىلىعىنان 20 مىڭداي ادام لحاسا قالاسىنىڭ بۋددالا سارايى الاڭىنا جينالىپ، شيزاڭ اۆتونوميالى رايونى قۇرىلعاندىعىنىڭ 60 جىلدىعىن قىزۋ قۇتتىقتادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قۇتتىقتاۋ جينالىسىنا قاتىناستى.

سۋرەتتى شينحۋا اگەنتتىگىنىڭ ءتىلشىسى يان يان تۇسىرگەن

8 - ايدىڭ 21 - كۇنى تۇستەن بۇرىن شيزاڭداعى ءار ۇلت، ءار سالا كادرلارى مەن بۇقاراسىنان 20 مىڭداي ادام لحاسا قالاسىنىڭ بۋددالا سارايى الاڭىنا جينالىپ، شيزاڭ اۆتونوميالى رايونى قۇرىلعاندىعىنىڭ 60 جىلدىعىن قىزۋ قۇتتىقتادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قۇتتىقتاۋ جينالىسىنا قاتىناستى. ۋاڭ حۋنيڭ، ساي چي جينالىسقا قاتىناستى.

سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن

«حالىق گازەتى»، 8 - ايدىڭ 21 - كۇنى، لحاسا. 60 جىلدىق كۇرەس بوران شاشىندى باستان كەشىرىپ، 60 جىلدىق قارلى القاپتا وراسان زور وزگەرىستەر تۋىلدى. 8 - ايدىڭ 21 - كۇنى تۇستەن بۇرىن شيزاڭداعى ءار ۇلت، ءار سالا كادر بۇقاراسىنان 20 مىڭداي ادام لحاسا قالاسىنىڭ بۋددالا سارايى الاڭىنا جينالىپ، شيزاڭ اۆتونوميالى رايونى قۇرىلعاندىعىنىڭ 60 جىلدىعىن قىزۋ قۇتتىقتادى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قۇتتىقتاۋ جينالىسىنا قاتىناستى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى، ورتالىق ۋاكىلدەر ۇيىرمەسىنىڭ باستىعى ۋاڭ حۋنيڭ ماجىلىسكە قاتىناستى ءارى ءسوز سويلەدى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي ماجىلىسكە قاتىناستى.

بايىرعى قالا لحاسادا ءتۇستى تۋلار جەلبىرەپ، بارلىق جەردەن مەرەكەنىڭ لەبى ەستى. ايبىندى بۋددالا سارايىنىڭ استىندا زاڭزۋ ۇلگىسىندەگى ءماجىلىس ءتوراعالار مىنبەسى قۇرىلدى. ءتوراعالار مىنبەسىنىڭ جوعارعى جاعىنا ىلىنگەن جۇڭحۋا حالىق رەسپۋبليكاسىنىڭ مەملەكەت گەربى مەن ”شيزاڭ اۆتونوميالى رايونى قۇرىلعاندىعىنىڭ 60 جىلدىعىن قۇتتىقتاۋ جينالىسى“ دەگەن جازۋ جازىلعان كەرمە تۋ ەرەكشە كوز تارتادى، ارتقى قابىرعاعا مەرەي توي بەلگىسى مەن ”1965“، ”2025“ دەگەن جازۋ ىلىنگەن، ەكى جاعىنا 10 نان نارت قىزىل تۋ قويىلعان. ءتوراعالار مىنبەسىنىڭ قارسىسىنداعى بۋددالا سارايى الاڭىندا مەرەكەلىك كيىم كيگەن ءار ۇلت بۇقاراسى تۇس تۇستان وسى اراعا جينالىپ، قولدارىنداعى قىزىل تۋلار بۇلعاپ، اينالا شاتتىق تەڭىزىنە اينالدى.

تۇستەن بۇرىنعى ساعات 10 دا، شاتتىق مۋزيكاسى ءۇنى ىشىندە، شي جينپيڭ باستاعان باسشى جولداستار ءتوراعالار مىنبەسىنە شىققاندا، بۇكىل الاڭدى قارسى الا سوعىلعان قىزۋ قول شاپالاق ءۇنى كەرنەپ كەتتى.

شيزاڭ اۆتونوميالى رايوندىق پارتكوم شۋجيىنىڭ ورىنباسارى، اۆتونوميالى رايوندىق حالىق ۇكىمەتىنىڭ ءتوراعاسى گامازەدەن جينالىستىڭ باستالعانىن جاريالادى. بۇكىل الاڭداعىلار ورىندارىنان تۇرىپ، مەملەكەت ءانىن اسقاقتاتا شىرقادى، بەس جۇلدىزدى نارت قىزىل تۋ بۋددالا سارايى الاڭىندا باياۋ كوتەرىلدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسارى، ورتالىق ۋاكىلدەر ۇيىرمەسى باستىعىنىڭ ورىنباسارى جاڭ گوچيڭ جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك حالىق قۇرىلتايى تۇراقتى كوميتەتىنىڭ، مەملەكەتتىك كەڭەستىڭ، مەملەكەتتىك ساياسي كەڭەستىڭ، ورتالىق اسكەري ىستەر كوميتەتىنىڭ شيزاڭ اۆتونوميالى رايونى قۇرىلعاندىعىنىڭ 60 جىلدىعىن قۇتتىقتاۋ جونىندەگى قۇتتىقتاۋ تەلەگرامماسىن وقىدى (تولىق نۇسقاسى بولەك جاريالاندى).

ۋاڭ حۋنيڭ شيزاڭ اۆتونوميالى رايونىنا شي جينپيڭنىڭ ارناپ جازعان ”جۇڭحۋا ۇلتى ورتاق تۇلعاسىن بىرگە قۇرىپ، كورىكتى شيزاڭنىڭ جاڭا تاراۋىن جازايىق“ دەگەن قۇتتىقتاۋ ارناۋ ءسوز ماڭدايشالىعىن ۇسىندى.

ۋاڭ حۋنيڭ ءسوز سويلەدى (تولىق مازمۇنىن «حالىق گازەتىنىڭ» 3 - بەتىنەن وقي الاسىزدار). ول بىلاي دەدى: 1965 - جىلى 9 - ايدا پارتيا ورتالىق كوميتەتىنىڭ شىنايى قامقورلىعى مەن پارتيانىڭ ۇلت ساياساتىنىڭ نۇر - شۇعىلاسىندا شيزاڭ اۆتونوميالى رايونىنىڭ قۇرىلعاندىعى جاريالاندى. بۇل − شيزاڭنىڭ دامۋ تاريحىنداعى ءداۋىر بولگىش مانگە يە ءىرى ءىس، شيزاڭنىڭ بەيبىت ازات بولۋى مەن دەموكراتيالىق رەفورماسىنىڭ ۇلى جەتىستىكتەرىن بەكەمدەپ، شيزاڭنىڭ قوعامدىق تۇزىمىندەگى تاريحي شارىقتاۋدى جۇزەگە اسىردى. 60 جىلدان بەرى شيزاڭنىڭ ەكونوميكاسى مەن قوعامى جاپپاي دامىپ، ۇلتتىق وڭىرلىك اۆتونوميا ءتۇزىمى ءساتتى امالياتتان ءوتىپ، ۇلتتار ىنتىماعى كۇن سايىن بەكەمدەلىپ، ءار ۇلت حالقىنىڭ تۇرمىسى كۇن سايىن جاقسارىپ، جۇڭگو كوممۋنيستىك پارتياسى باسشىلىعىنىڭ قۇدىرەتتى كۇشىن، ەلىمىزدىڭ سوتسياليستىك ءتۇزىمىنىڭ ساياسي ابزالدىلىعىن تولىق ايگىلەدى.

ۋاڭ حۋنيڭ مىنالاردى ءبىلدىردى: پارتيانىڭ 18 - قۇرىلتايىنان بەرى شي جينپيڭ جولداس ۇيىتقى بولعان پارتيا ورتالىق كوميتەتى شيزاڭ قىزمەتىنە ايرىقشا ءمان بەرىپ، جاپپاي كۇشەيتىپ، جاڭا داۋىردەگى پارتيانىڭ شيزاڭدى جونگە سالۋ جالپى جوباسىن تۇراقتاندىرىپ، پارتيا مەن مەملەكەت ىستەرىنىڭ جالپى جاعدايىن شىعار ءتۇيىن ەتىپ، شيزاڭنىڭ باياندى تىنىشتىعى مەن ساپالى دامۋىن جۇيەلى جوسپارلاپ ىلگەرىلەتتى، شيزاڭ بۇكىل ەلمەن بىرگە كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزىپ، جاپپاي دوڭگەلەك داۋلەتتى قوعام قۇرىپ شىقتى. شيزاڭنىڭ ەكونوميكالىق، قوعامدىق دامۋىندا تاريحي تابىستارعا قول جەتتى، ۇلتتار ىنتىماعى العاباسارلىعى ىستەرىندە تاريحي وزگەرىستەر تۋىلدى، حالىقتىڭ تۇرمىس ورەسى تاريحي سەكىرۋدى جۇزەگە اسىردى، شيزاڭ دامۋى ەڭ جاقسى، وزگەرىسى ەڭ زور، ءار ۇلت بۇقاراسى ەڭ كوپ يگىلىككە كەنەلگەن تاريحي داۋىرگە قادام تاستادى، سوتسياليستىك وسىزاماندانعان جاڭا شيزاڭ قۇرىلىسىندا ومىرشەڭدىك كۇش جارىققا شىقتى.

ۋاڭ حۋنيڭ بىلاي دەدى: جاڭا تاريحي باستامادا ءبىز شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 - قۇرىلتايىنىڭ جانە 20 - كەزەكتى ورتالىق كوميتەتىنىڭ ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، تياناقتاندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، جاڭا داۋىردەگى پارتيانىڭ شيزاڭدى جونگە سالۋ جالپى جوباسىن دايەكتىلەندىرىپ، تياناقتاندىرىپ، جۇڭحۋا ۇلتى ورتاق تۇلعا تانىمىنىڭ نەگىزگى جەلىسىن مىقتاپ يگەرىپ، ورنىقتىلىق، دامۋ، ەكولوگيا، شەكارانى كۇشەيتۋ سىندى 4 ءىرى ءىستى ويداعىداي يگەرىپ، ىنتىماقتى، باي، وركەنيەتتى، جاراسىمدى، كورىكتى سوتسياليستىك وسىزاماندانعان جاڭا شيزاڭ قۇرۋعا قۇلشىنىپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن جۇزەگە اسىرۋ جولىندا قاجىماي تالماي كۇرەس جۇرگىزۋىمىز كەرەك.

شيزاڭ اۆتونوميالى رايوندىق پارتكومنىڭ شۋجيى ۋاڭ جۇنجىڭ، زاڭزۋ بۇقاراسىنىڭ ۋاكىلى جومارىنزىڭ ماجىلىستە ءسوز سويلەدى.

وسىدان كەيىن مەرەكەلىك تۇسكە تولى سالتاناتتى بۇقارالىق ءجۇرىس وتكىزىلدى. بۇقارالىق ءجۇرىس ”تۋ ارقىلى جەتەكشىلىك ەتۋ“، ”4 ءىرى ءىس“، ”جاڭا داۋىردە ەكپىندەي ىلگەرىلەۋ“، ”بولاشاققا بەت الۋ“ سىندى 4 بولەككە ءبولىندى، 26 بۇقارالىق ءجۇرىس شارشى توبى، اشەكەيلى اۆتوموبيل سالتاناتتى مۋزىكا ۇنىمەن رەتىمەن ءجۇردى. ءار ۇلت بۇقاراسى الۋان ءتۇرلى كيىم كيىپ، قىزۋ مەرەيلى، ويناقى ءبي بيلەپ، باقىتتى تۇرمىس كەشىرۋدىڭ قۋانىشتى سەزىمىن، پارتيا مەن مەملەكەتكە دەگەن العىس سەزىمىن بەينەلەدى. شي جينپيڭ قاتارلىلار ءار سالا بۇقاراسىنا ءالسىن - الى قول بۇلعاپ قۇرمەت ءبىلدىردى.

«وتاندى جىرلايمىز» اتتى اسقاق اۋەندە بەيبىتشىلىك كوگارشىندارى قاناتىن جايىپ سامعادى، ءتۇستى شار كوككە كوتەرىلدى، الاڭنان دۋ قول شاپالاق ءۇنى مەن شاتتىق ءۇنى كوتەرىلىپ، جينالىس تابىسپەن اياقتالدى.

لي گانجيە، حى ليفىڭ، ۋاڭ شياۋحۇڭ، لوساڭجياڭسۇن، حۋ چۇنحۋا، پابالا گىلەلاڭجيە جانە جاڭ شىڭمين، شيزاڭدا قىزمەت ىستەگەن ساقا جولداستار، سونداي اق ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، ورتالىق ۋاكىلدەر ۇيىرمەسىنىڭ بارلىق مۇشەلەرى، شيزاڭ اۆتونوميالى رايونىنىڭ پارتيا، ۇكىمەت، ارميا ورىندارىنداعى جاۋاپتى جولداستار جينالىسقا قاتىناستى.

كەلۋ قاينارى: حالىق  تورابى