شي جينپيڭ 2025 - جىلعى شاڭحاي سەلبەستىك ۇيىمى باسشىلار ماجىلىسىنە قاتىناسادى ءارى قاتىستى قيمىلداردى وتكىزەدى

شينحۋا اگەنتتىگى، 8 - ايدىڭ 22 - كۇنى، بەيجيڭ. سىرتقى ىستەر مينيسترلىگىنىڭ مالىمدەمەشىسى 8 - ايدىڭ 22 - كۇنى مىنانى جاريالادى: 2025 - جىلعى شاڭحاي سەلبەستىك ۇيىمى باسشىلار ءماجىلىسى 8 - ايدىڭ 31 - كۇنىنەن 9 - ايدىڭ 1 - كۇنىنە دەيىن تيانجيندە وتكىزىلەدى. مەملەكەت ءتوراعاسى شي جينپيڭ شاڭحاي سەلبەستىك ۇيىمىنا مۇشە ەلدەر باسشىلارى القالار كەڭەسىنىڭ 25 - رەتكى ءماجىلىسىن جانە ”شاڭحاي سەلبەستىك ۇيىمى +“ ءماجىلىسىن باسقارادى ءارى ارقاۋ ءسوز سويلەيدى. باسشىلار ءماجىلىسى كەزىندە ءتوراعا شي جينپيڭ ماجىلىسكە قاتىناسقان باسشىلارعا قارسى الۋ قوناعاسىن بەرەدى جانە ەكى جاقتى قيمىلدار وتكىزەدى.

«حالىق گازەتى»، 8 - ايدىڭ 22 - كۇنى، بەيجيڭ (ءتىلشى لي يىڭچي). 8 - ايدىڭ 22 - كۇنى سىرتقى ىستەر مينيسترلىگى ءتوراعا شي جينپيڭنىڭ 2025 - جىلعى شاڭحاي سەلبەستىك ۇيىمى باسشىلار ماجىلىسىنە قاتىناسۋى ءارى قاتىستى قيمىلدار وتكىزۋى جونىندە جۇڭگولىق، شەتەلدىك اقپارات قۇرالدارىنا قۇلاققاعىس ەتتى. سىرتقى ىستەر مينيسترىنىڭ كومەكشىسى ليۋ بين قاتىستى جاعدايلاردى تانىستىردى ءارى سۇراۋلارعا جاۋاپ بەردى.

ليۋ بين مىنالاردى ءبىلدىردى: 2025 - جىلعى شاڭحاي سەلبەستىك ۇيىمىنىڭ باسشىلار ءماجىلىسى 8 - ايدىڭ 31 - كۇنىنەن 9 - ايدىڭ 1 - كۇنىنە دەيىن تيانجين قالاسىندا وتكىزىلەدى. بۇل − جۇڭگونىڭ شاڭحاي سەلبەستىك ۇيىمىنىڭ باسشىلار ءماجىلىسىن 5 - رەت وتكىزۋى، سونداي - اق شاڭحاي سەلبەستىك ۇيىمى قۇرىلعاننان بەرگى كولەمى ەڭ ۇلكەن باسشىلار ءماجىلىسى. سول كەزدە ءتوراعا شي جينپيڭ 20 نەشە شەتەل باسشىسىمەن جانە 10 حالىقارالىق ۇيىمنىڭ جاۋاپتىلارىمەن بىرگە حايحى وزەنىنىڭ جاعاسىندا باس قوسىپ، شاڭحاي سەلبەستىك ۇيىمىنىڭ تابىستى تاجىريبەلەرىن قورىتىندىلاپ، شاڭحاي سەلبەستىك ۇيىمىنىڭ دامۋ جوباسىن جاساپ، ”شاڭحاي سەلبەستىك ۇيىمى ۇلى شاڭىراعى“ سەلبەستىك ورتاق تانىمىن ۇيىستىرىپ، ۇيىمنىڭ اناعۇرلىم تىعىز تاعدىرلاس ورتاق تۇلعا قۇرۋ نىساناسىنا قاراي ارشىندى قادام تاستاۋىن ىلگەرىلەتەدى.

ليۋ بين مىنالاردى ءبىلدىردى: تيانجين باسشىلار ءماجىلىسى − جۇڭگونىڭ بيىلعى ەڭ ماڭىزدى مەملەكەت باسشىسى ديپلوماتياسى جانە نەگىزگى ديپلوماتيالىق قيمىلدارىنىڭ ءبىرى. ءتوراعا شي جينپيڭ مۇشە ەلدەر باسشىلارى القالار كەڭەسى ءماجىلىسىن جانە ”شاڭحاي سەلبەستىك ۇيىمى +“ ءماجىلىسىن باسقارادى ءارى جوعارىداعى ەكى ماجىلىستە جەكە - جەكە ارقاۋ ءسوز سويلەپ، جۇڭگونىڭ شاڭحاي سەلبەستىك ۇيىمىنىڭ ”شاڭحاي رۋحىن“ ساۋلەلەندىرۋ، ءداۋىر بورىشىن باتىلدىقپەن ارقالاۋ، حالىقتىڭ تىلەگىنە جاۋاپ قايتارۋ جونىندەگى جاڭا ويلارىن، جاڭا قۋاتتامالارىن بايىمداپ، جۇڭگونىڭ شاڭحاي سەلبەستىك ۇيىمىنىڭ جوعارى ساپالى دامۋىن، جان - جاقتى سەلبەستىگىن قولداۋداعى جاڭا شارالارىن، جاڭا ارەكەتتەرىن جاريالاپ، شاڭحاي سەلبەستىك ۇيىمىنىڭ دۇنيە جۇزىلىك ەكىنشى سوعىستان كەيىنگى حالىقارالىق ءتارتىپتى قورعاۋدىڭ، دۇنيە جۇزىلىك جونگە سالۋ جۇيەسىن كەمەلدەندىرۋدىڭ جاڭا ءادىسىن، جاڭا جولىن العا قويادى. ءتوراعا شي جينپيڭ باسقا مۇشە ەلدەردىڭ باسشىلارىمەن بىرگە «تيانجين جارناماسىنا» قول قويىپ جانە ونى جاريالاپ، «شاڭحاي سەلبەستىك ۇيىمىنىڭ الداعى 10 جىلداعى دامۋ ستراتەگياسىن» بەكىتىپ، دۇنيە جۇزىلىك فاشيزمگە قارسى سوعىستىڭ جەڭىسى مەن بىرلەسكەن مەملەكەتتەر ۇيىمى قۇرىلعاندىعىنىڭ 80 جىلدىعى جونىندەگى مالىمدەمەنى جاريالاپ، حاۋىپسىزدىك، ەكونوميكا، گۋمانيتارلىق سەلبەستىكتى كۇشەيتۋ جونىندەگى ءبىرقىدىرۋ جەتىستىك قۇجاتتارىن ماقۇلداپ، شاڭحاي سەلبەستىك ۇيىمىنىڭ بولاشاق دامۋىنا ايقىن باعدار كورسەتەدى. ءتوراعا شي جينپيڭ تاعى ماجىلىسكە قاتىناسقان ءار ەل باسشىلارى مەن حالىقارالىق ۇيىمداردىڭ جاۋاپتىلارىنا قارسى الۋ قوناعاسىن بەرىپ، كوپ رەتكى ەكى جاقتى قيمىلدى شوعىرلى وتكىزەدى.

ليۋ بين بىلاي دەپ اتاپ كورسەتتى: شاڭحاي سەلبەستىك ۇيىمى قۇرىلعان 24 جىلدان بەرى ”ءوزارا سەنۋ، ءوزارا پايدا جەتكىزۋ، تەپە - تەڭ بولۋ، كەڭەسۋ، الۋان ءتۇرلى وركەنيەتكە قۇرمەت ەتۋ، بىرگە دامۋعا ۇمتىلۋ سىندى ”شاڭحاي رۋحىنىڭ“ جەتەكشىلىگىندە، قۇرۋشى 6 مۇشە ەلدەن دامىپ، ازيا، ەۆروپا، افريكا سىندى 3 ۇلكەن قۇرلىقتاعى 26 مەملەكەتتى قامتىعان ”شاڭحاي سەلبەستىك ۇيىمى ۇلى شاڭىراعىنا“ اينالىپ، حاۋىپسىزدىكتى بىرگە قورعايتىن، گۇلدەنۋدى بىرگە جەبەيتىن، حالىق تۇرمىسىنا بىرگە تيىمدىلىك جاسايتىن، پايدادان بىرگە يگىلىكتەنەتىن، بولاشاقتان بىرگە يگىلىكتەنەتىن بەيبىت دامۋ جولىن، جاڭاشا سەلبەستىك جولىن ءساتتى اشتى. جاڭا داۋىردەن بەرى ءتوراعا شي جينپيڭ ءوزى ونەگە بولىپ، توڭىرەكتىك ديپلوماتيانى جوبالاپ، شاڭحاي سەلبەستىك ۇيىمىنىڭ دامۋىن ىلگەرىلەتىپ، ءبىرقىدىرۋ ماڭىزدى باستامالار مەن قۋاتتامالاردى العا قويىپ، ۇيىمنىڭ دامۋىنا، زورايۋىنا، رولىن ساۋلەلەندىرۋىنە جۇڭگو اقىل - پاراساتىن، جۇڭگو جوباسىن، جۇڭگو قوزعاۋشى كۇشىن ۇزدىكسىز ارنادى. ءتوراعا شي جينپيڭ مۇشە ەلدەردىڭ وركەنيەت قاقتىعىسىنان، قىرعي قاباقتىق ويدان، تەكە تىرەستەن اتتاپ وتكەن دامۋ كوزقاراسى، حاۋىپسىزدىك كوزقاراسى، سەلبەستىك كوزقاراسى، وركەنيەت كوزقاراسى، دۇنيە جۇزىلىك جونگە سالۋ كوزقاراسى سىندى ”جاڭا بەس كوزقاراستى“ ۇستانۋىن دارىپتەپ، ىلگەرىندى - كەيىندى شاڭحاي سەلبەستىك ۇيىمى تاعدىرلاس ورتاق تۇلعاسىن قۇرۋ، ىنتىماقتى، ءوزارا سەنىمدى، بەيبىت، تىنىش، گۇلدەنىپ، دامىعان، تاتۋ كورشى، دوس بولىپ وتەتىن، ءادىل دە ادىلەتتى ”بەس ورتاق مەكەن“ قۇرۋ سياقتى ماڭىزدى باستامالاردى العا قويىپ، جۇڭگو جاقتىڭ زاڭ اتقارۋ حاۋىپسىزدىگى، ەكونوميكا - ساۋدا، قارجى قوسۋ، الەۋمەتتىك دەنساۋلىق ساقتاۋ، گۋمانيتارلىق اۋىس - كۇيىس، كەدەيلىكتى ازايتۋ سياقتى سالالارداعى كوپ ءتۇرلى سەلبەستىك باستاماسىن جاريالاپ، شاڭحاي سەلبەستىك ۇيىمى تاعدىرلاس ورتاق تۇلعاسىنىڭ ۇستانىم مازمۇنى مەن ديپلوماتيالىق امالياتىن ۇزدىكسىز بايىتتى.

ليۋ بين مىنالاردى ءبىلدىردى: قازىر شاڭحاي سەلبەستىك ۇيىمىنداعى ەلدەر جەدەل دامۋدىڭ ماڭىزدى كەزەڭىندە تۇر. جۇڭگو جاق تيانجين باسشىلار ءماجىلىسى ارقىلى شاڭحاي سەلبەستىك ۇيىمىنا مۇشە ەلدەرمەن ساياسي ورتاق تانىمدى ۇيىستىرىپ، سەلبەستىكتىڭ قوزعاۋشى كۇشىن تاسقىنداتىپ، ورتاق ءۇن قاتىپ، بىرلەسكەن ارەكەت قولدانىپ، شاڭحاي سەلبەستىك ۇيىمىنىڭ ورنىقتىلىعى مەن تاباندىلىعى ارقىلى حالىقارالىق ورتانىڭ ايقىنسىز، مەجەلەۋ قيىن فاكتورلارىنا توتەپ بەرىپ، وسى وڭىردەگى ءار ەل حالقىنا باياندى بەيبىتشىلىك، جالپىعا بىردەي حاۋىپسىزدىك، بىرگە كوركەيىپ - گۇلدەنۋ، اشىق، باۋىرمال، جاراسىمدى، دوسجار بولعان تاماشا ورتا جاراتۋدى ءۇمىت ەتەدى. جۇڭگو جاق دوسجار، ىنتىماقتى، تابىسى مول تيانجين باسشىلار ءماجىلىسىنىڭ شاڭحاي سەلبەستىك ۇيىمىنىڭ اناعۇرلىم ىنتىماقتى، اناعۇرلىم سەلبەسۋگە ءمان بەرەتىن، اناعۇرلىم ومىرشەڭدىك كۇشكە باي، اناعۇرلىم ىسكەرلىك كورسەتەتىن جوعارى ساپالى دامۋدىڭ جاڭا كەزەڭىنە، ءسوز جوق، قادام تاستاۋىن ىلگەرىلەتىپ، ادامزاتتىڭ تاعدىرلاس ورتاق تۇلعاسىن قۇرۋعا ۇزدىكسىز ”شاڭحاي سەلبەستىك ۇيىمى كۇشىن“ قوساتىندىعىنا كامىل سەنەدى.

ليۋ بين تاعى شاڭحاي سەلبەستىك ۇيىمىنىڭ ماڭىزدى ءمانى، جۇڭگو جاقتىڭ ءتوراعا ەل بولۋ قىزمەتى، ”شاڭحاي سەلبەستىك ۇيىمى +“ ءماجىلىسى جانە شاڭحاي سەلبەستىك ۇيىمىنىڭ بولاشاق دامۋى سياقتىلار جونىندە سۇراۋلارعا جاۋاپ بەردى.

كەلۋ قاينارى: حالىق تورابى