سالەم، الەم چەمپيوناتى!

2014.06.13 09:41   كەلۋ قاينارى : حالىق تورابى

　　حالىق تورابى، 13 – ماۋسىم، بەيجيڭ. (نۇرعيسا قۇرمانجان ۇلى) الا دوپتىڭ الامانى اراعا ءتورت جىل سالىپ، اياقدوپشىلار ەلىنە ورالدى. فۋتبولدىڭ ءپىرى سانالعان پەلەدەي ۇل تۋعان ەلدىڭ سپورتتىڭ بۇل تۇرىنە دەگەن ىقىلاسى بولەك، ايتسە دە، جارىستىڭ اياق الىسى جاقىنداعان سايىن برازيليادا تۋىلعان ءتۇرلى نارازىلىق شەرۋلەر مەن قۇرىلىس قارقىنىنا قاتىستى جايسىز حابارلار كوڭىلگە كۇدىك ۇيالاتقانى بەلگىلى. ءتىپتى كەي اقپارات قۇرالدارى الەمنىڭ دوكەي ەلدەرىنىڭ باسشىلارىن اشىلۋ سالتىن تاماشالاۋعا شاقىرعان برازيليا پرەزيدەنتى ديلما روسسەفتىڭ ءوزى حاۋىپسىزدىك سەبەبىنەن اشىلۋ سالتىنا قاتىناسپايدى ەكەن دەپ سالدى، ءىس جۇزىندە ونداي بولماي شىقتى.

　　اڭساعان جارىس اقىرى باستالدى، كۇدىك پەن كۇمان سەيىلدى، «تابيعات» «ادامزات» «فۋتبول» تاقىرىبىنداعى سالتاناتتى اشىلۋ سالتى جەرگىلىكتى ۋاقىت بويىنشا 12 – ماۋسىم تۇستەن كەيىن برازيليانىڭ استاناسى سان – پاۋلو قالاسىنداعى ەتتا – گەللار سپورت الاڭىندا وتكىزىلىپ، برازيليانىڭ تابيعاتپەن ەتەنەلىككە تالپىنعان باي مازمۇندى مادەنيەتى تانىستىرىلىپ، «الادوپ ەلىنىڭ» فۋتبولعا دەگەن قىزۋ ىنتاسى مەن ايىرىقشا ىقىلاسى بەينەلەندى.

　　اشىلۋ سالتى باستالعان تۇستا الاڭ ورتاسىنا قويىلعان شار پىشىندەس ەكراننان وسى رەتكى چەمپيوناتقا قاتىناساتىن 32 قۇرامانىڭ مەملەكەتتىك تىلدەرىندە «برازيلياعا كەلگەندەرىڭىزدى قارسى الامىز» دەگەن جازۋ كورىنىپ، ىلە - شالا اعاش، حايۋانات بەينەلەرىندە جاسانعان ارتستەر الاڭ ورتالىعىنداعى LED ەكرانىمەن سايكەستىرە بۇرالا بيگە باسىپ، برازيليا مادەنيەتى مەن وسى رەتكى جارىستىڭ باستى تاقىرىبىن ايگىلەدى.

　　اشىلۋ سالتىنداعى ويىن نومىرلەرىنىڭ «ادامزات» تاقىرىبىنداعى بولەگىندە برازيليانىڭ جەر – جەرىندەگى تۇرعىلىقتى حالىقتىڭ كيىم مادەنيەتى مەن ءبي مادەنيەتىنەن ويىن قويىلىپ، ءتۇرلى ستيلدەگى بيلەر سالتاناتتى شاراعا ءسان قوسىپ، فۋتبول تويىن اسىعا كۇتكەن الەم جانكۇيەرلەرىنىڭ قىزۋ ىنتاسىن تىڭ ورەگە كوتەرگەندەي بولدى.

　　كوركەمونەرلىك شارانىڭ «فۋتبول» تاقىرىبىنداعى بولەگىندە جۇزدەن استام ورەن LED ەكرانى ارقىلى كورىنگەن الەم چەمپيوناتىندا ىستەتىلەتىن فۋتبولدى اينالا قورشاپ، وزدەرىنىڭ فۋتبول شەبەرلىكتەرىن كورسەتىپ، «فۋتبول ەلىنىڭ» جاس ۇرپاق اياقدوپشىلارىنىڭ جەتىلىپ كەلە جاتقانىن جالپاق جۇرتقا جاريا ەتكەندەي بولدى.

　　سوڭىندا، كولەمدى برازيليا تۋى الاڭنىڭ ورتاسىنا جەتكىزىلىپ، شار پىشىندەس ەكران گۇل جاپىراقشاسى سياقتى باياۋ اشىلىپ، برازيليانىڭ ايگىلى ءانشىسى گلاۋديا لەيتتە ساحناعا كوتەرىلىپ، بۇكىل الاڭ تولى شاتتىق ءۇنى ىشىندە وسى رەتكى فۋتبول دوداسىنىڭ ءانى «ＷＥ ＡＲＥ ＯＮＥ» ءانىن شىرقادى. ونىڭ باستاۋىندا، ا ق ش ءانشىسى جەننيفەر لوپەز بەن ءراپ ستيلىندەگى ءانشى پيتبۋل ساحناعا شىعىپ انگە سالدى، بۇكىل الاڭعا جينالعان جۇرت ولارعا ىلەسىپ ءان شىرقادى.

　　سالتاناتتى اشىلۋ سالتى اياقتاپ، ءبىر ساعات وتكەننەن كەيىن الەم چەمپيوناتىنىڭ العاشقى الامانى الاڭ يەسى برازيليا كومانداسى مەن شىعىس ەۆروپادان كەلگەن حورۆاتيا كومانداسى اراسىندا وتكىزىلدى.

　　ەستەرىڭىزگە سالا كەتسەك، برازيليا الەم چەمپيوناتى 12 – ماۋسىمنان 13 – شىلدەگە دەيىن (برازيليا ۋاقىتى بويىنشا) وڭتۇستىك امەريكاداعى جەر اۋدانى جاعىنان ەڭ ءىرى ەل سانالاتىن برازيليانىڭ 12 قالاسىندا وتكىزىلەدى، جارىسقا 32 كوماندا قاتىناسىپ، 64 مايدان جارىس وتكىزىلەدى، ءبىر ايعا سوزىلاتىن فۋتبول مەرەكەسىنە 13 – شىلدە كۇنى نۇكتە قويىلىپ، كىمنىڭ اعا جۇلدەگەر ەكەنى بەلگىلى بولادى.

　　كەلۋ قاينارى: حالىق تورابى