«ۇلتتار ادەبيەتى» جۋرنالى قازاقشا باسىلىمىنىڭ 2014 – جىلعى شىعارما وڭدەۋ كەڭەسى اقسايدا اشىلدى

2014.06.12 15:07   كەلۋ قاينارى : حالىق تورابى

　　شىعارما وڭدەۋ كەڭەسىنىڭ اشىلۋ سالتىنان كورىنىس

　　حالىق تورابى، بەيجيڭ، 12 - ماۋسىم. (ءتىلشى: نۇرعيسا قۇرمانجان ۇلى) ۇلتتار ادەبيەتى جۋرنالى مەكەمەسى ۇيىمداستىرعان، گانسۋ ولكەسى اقساي قازاق اۆتونوميالى اۋداندىق ۇكىمەت، جۇڭگو ۇلتتار اۋدارما مەكەمەسى، جۇڭگو از ۇلت جازۋشىلارى قوعامى قاتارلى ورىندار سايكەسىپ وتكىزگەن «ۇلتتار ادەبيەتى» جۋرنالى قازاقشا باسىلىمىنىڭ 2014 - جىلعى شىعارما وڭدەۋ كەڭەسى 5 – ماۋسىمنان 9 – ماۋسىمعا دەيىن گانسۋ ولكەسىنىڭ اقساي اۋدانىندا وتكىزىلدى.

　　جۇڭگو جازۋشىلار باسپا توبى پارتكومىنىڭ ورىنباسار شۋجيى، «جۇڭگو جازۋشىلارى» جۋرنالىنىڭ باس رەداكتورى اكبار ءماجيت ۇلى، جۇڭگو از ۇلت جازۋشىلارى قوعامىنىڭ تۇراقتى ىستەرگە جاۋاپتى ورىنباسار باستىعى، «ۇلتتار ادەبيەتى» جۋرنالىنىڭ بۇرىنعى باس رەداكتورى يە مەي، «ۇلتتار ادەبيەتى» جۋرنالىنىڭ باس رەداكتورى شى ينيڭ، جيۋچۋان قالالىق پارتكومنىڭ مۇشەسى، قالالىق ۇكىمەتتىڭ ورىنباسار باستىعى ۋ جيۋەي، تيانجين قالالىق جازۋشىلار قوعامىنىڭ ءتوراعاسى جاۋ مەي، جۇڭگو ۇلتتار اۋدارما مەكەمەسىنىڭ باستىعى، اعا اۋدارماشى ءالىمجان ءسابيت، گۋاڭشي جازۋشىلار قوعامىنىڭ قۇرمەتتى ءتوراعاسى فىڭ ي، ايگىلى جازۋشى جۇماباي ءبىلال ۇلى، ايگىلى اۋدارماشى، ءتىل مامانى كاكەش قايىرجان ۇلى قاتارلىلار شىعارما وڭدەۋ كەڭەسىنىڭ اشىلۋ سالتىنا قاتىناستى، اشىلۋ سالتىندا اكبار ءماجيت ۇلى «ۇلتتار ادەبيەتى» جۋرنالىنىڭ قازاق ادەبيەتىنە بولعان ىقپالى جانە «ۇلتتار ادەبيەتى» جۋرنالىنىڭ بارلىققا كەلۋ بارىسى تۋرالى تانىستىرۋ جاسادى، «ۇلتتار ادەبيەتى» جۋرنالىنىڭ بۇرىنعى باس رەداكتورى يە مەي «ۇلتتار ادەبيەتى» جۋرنالىنىڭ قول جەتكىزگەن تابىستارىن باياندادى، اقساي قازاق اۆتونوميالى اۋدانىنىڭ اكىمى باعدار اۋداننىڭ جالپى احۋالىن، مادەنيەت، وركەنيەت جانە ەكونوميكا جاقتارىنداعى جەتىستىكتەرىن باياندادى ءارى «ۇلتتار ادەبيەتى» جۋرنالىنىڭ جالپى مازمۇندىق ەرەكشەلىگىن تانىستىرىپ، ءۇش قازاق اۆتونوميالى اۋداننىڭ ءبىرى بولعان اقساي اۋدانىنىڭ وسىنداي مادەني - ادەبي قيمىلداردى بەلسەنە وتكىزىپ، قازاق ۇلتىنىڭ مادەنيەتى مەن ادەبيەتىنە وزىندىك ۇلەستەرىن قوساتىندىعىن، اۋدانداعى ءار ۇلت بۇقاراسىنىڭ رۋحانياتىن بايىتۋ جاقتارىندا جاعداي جاراتىپ، بەلسەنە رول اتقارۋعا كۇش سالاتىندىعىن جەتكىزدى.

　　6 – ماۋسىمدا وتكىزىلگەن باستالۋ سالتىندا الدىڭعى بۋىن اعالاردىڭ ۋاكىلى رەتىندە ايگىلى جازۋشى جۇماباي ءبىلال ۇلى سوزگە شىعىپ، «ۇلتتار ادەبيەتى» جۋرنالى تۋرالى القاۋىن جەتكىزىپ، قيمىلدىڭ ءساتتى وتكىزىلۋىنە دەگەن تىلەگىن بىلدىرسە، جاس بۋىن اۋدارماشىلاردىڭ ۋاكىلى رەتىندە ءسوز كەزەگىن العان جانار نۇرسول قىزى «ۇلتتار ادەبيەتى» جۋرنالى رەداكسياسىنا راحىمەتىن ايتىپ، اۋدارما جايلى ءوز ويلارىن جەتكىزدى. سول كۇنى تۇستەن كەيىن ايگىلى جازۋشى اكبار ءماجيت ۇلى مەن تيانجين قالالىق جازۋشىلار قوعامىنىڭ ءتوراعاسى جاۋ مەي كەڭەسكە قاتىناسقاندارعا لەكسيا سويلەدى، اكبار ءماجيت ۇلى كەڭەسكە قاتىناسقان ءار ۇلت جازۋشىلارى مەن قۇرمەتتى قوناقتارعا جۇڭگو ادەبيەتىن جان – جاقتىلى تانىسىتىرىپ، وسىنداي كەڭەستەردى كوپتەپ ۇيىمداستىرۋدىڭ «ۇلتتار ادەبيەتى» جۋرنالىنىڭ باسىلىم ساپاسىن اناعۇرلىم جاقسارتۋعا سەپتىگىن تيگىزىپ، ءار ۇلتتىڭ ادەبيەت سالاسىن دامىتۋعا قوزعاۋشى كۇش بولاتىندىعىن اتاپ كورسەتتى. ەكىنشى كۇنى تاڭەرتەڭ كەڭەسكە قاتىناسقان قوناقتار اقساي قازاق اۆتونوميالى اۋدانىنىڭ ۇلتتىق مادەنيەت فەستيۆالىنا قاتىناسىپ، الامان بايگەنى تاماشالاپ، قازاقتىڭ ۇلتتىق مادەنيەتىمەن ىشكەرىلەي تانىستى. 8 – ماۋسىمدا جۇماباي ءبىلاي ۇلى، يەمەي، كاكەش قايىرجان ۇلى قاتارلى جازۋشى، اۋدارماشىلار كەڭەسكە قاتىناسقاندارعا لەكسيا سويلەدى، جۇماباي ءبىلال ۇلى ءوزىنىڭ شىعارماشىلىق بارىسىنداعى تۇيگەن ويلارىن بايانداسا، يە مەي «ۇلتتار ادەبيەتى» جۋرنالىنىڭ بەتكە العان باعدارى، قارقىندى قادامدارى جانە جۇڭگو جازۋشىلار وداعىنىڭ از ۇلت اقىن - جازۋشىلارىنىڭ شىعارماشىلىعىنا جاساعان قولداۋ - قۋاتتاۋلارى، از ۇلتتار ادەبيەتىن دامىتۋ جاقتارىندا ىستەلىپ جاتقان جۇمىستار تۋرالى تانىستىرۋ جاسادى، كاكەش قايىرجان ۇلى كوركەم اۋدارمانىڭ قىر – سىرى تۋرالى توقتالدى ءارى اۋدارما جاعىندا بايقالعان ماسەلەلەر مەن ولاردى قالاي ءبىر ارناعا سالۋ تۋرالى تۇيگەن ويلارىن جەتكىزدى. كەڭەستىڭ ەڭ سوڭعى كۇنى، ياعني، 9 – ماۋسىم كۇنى تاڭەرتەڭ قازاق ادەبيەتى تۋرالى تالقى ۇيىمداستىرىلىپ، بۇل رەتكى قيمىل بارىسىندا تالقىعا سالىنعان تۇيىندەر مەن قول جەتكىزگەن تابىستار قورىتىندىلاندى، بۇل تالقىنى «ۇلتتار ادەبيەتى» جۋرنالى قازاقشا باسىلىمىنىڭ جاۋاپتى رەداكتورى ءمينار نۇرلاززات قىزى باسقاردى.

　　«ۇلتتار ادەبيەتى» جۋرنالىنىڭ قازاقشا باسىلىمى ءتىل جاعىنداعى باسىمدىلىقتان ۇتىمدى پايدالانىپ، جۋرنالدى مادەنيەت سالاسىنداعى اۋىس – كۇيىستىڭ دانەكەرى رەتىندە قاراپ، جۇڭگو – قازاقستان ەكى ەلدىڭ ادەبي سالاداعى بارىس – كەلىسىن ىلگەرىلەتىپ، جۇڭگونىڭ ادەبيەت سالاسىنداعى دۇنيە ءجۇزىن بەتكە الۋ ۇردىسىنە ءۇن قوسۋدا. جۋرنالدىڭ قازاقشا باسىلىمى جارىق كورگەننەن كەيىن، جۋرنال مەكەمەسىنىڭ باس رەداكتورى مەن قاتىستى باسشىلارى قازاقستاننىڭ جۇڭگوداعى باس ەلشىلىگىنىڭ مادەنيەت سالاسىنا جاۋاپتى كەڭەسشىسى مۇرات قاتارلىلارمەن كەزدەسىپ، ەكى ەلدىڭ مادەنيەت سالاسىنداعى اۋىس – كۇيىسىن ىلگەرىلەتۋگە بەلسەندى ءۇن قوسىپ، ادەبيەت سالاسىنداعى بارىس – كەلىس پەن سەلبەستىكتى بىرلىكتە تالقىلادى. جۋرنالدا اۋدارىپ باسىلعان «كوكساۋ اققۋ» (تيە نيڭ)، «جوسا ءيىسى» (شياۋ چين)، «راۋشان باقشاسىنداعى جەتى ءتۇن» (يە مەي)، «ءجاۋدىر شالعام»، «اڭگىمەشىل اداممىن» (مو يان) قاتارلى شىعارمالار قازاقستاننىڭ «الەم ادەبيەتى» جۋرنالىندا باسىلدى.

　　قازاقستاننىڭ ايگىلى جازۋشىسى، بەلگىلى اباي تانۋشى، قازاقستاننىڭ ەۆر – ازيا ۇلتتىق ۋنيۆەرسيتەتى «وتىرار كىتاپحاناسى» عىلمي زەرتتەۋ ورنىنىڭ مەڭگەرۋشىسى تۇرسىن جۇرتباي ۇلى، قازاقستان ەۆر – ازيا ۇلتتىق ۋنيۆەرسيتەتىنىڭ ورىنباسار مەكتەپ باستىعى، تاياۋ زامان قازاق ادەبيەتىن زەرتتەۋ جاعىنداعى ايگىلى مامان، پروفەسسور، دوكتورانت جەتەكشىسى، قازاقستان عىلىم اكادەمياسىنىڭ اكادەميگى ديقان قامزابەكوۆ قاتارلىلار «ۇلتتار ادەبيەتى» جۋرنال رەداكسياسىنا كەلىپ، رەداكسيانى كوزدەن كەشىرگەن. بۇل كىسىلەردىڭ ايتۋىنشا، الدىڭعى عاسىردىڭ 60 ~ 70- جىلدارىندا جۇڭگو ادەبيەتى قازاقستانعا جيى تانىستىرىلعانىمەن، كەيىن كەلە ءتۇرلى سەبەپتەردىڭ ىقپالىمەن ەكى ەلدىڭ ادەبيەت سالاسىنداعى قارىم – قاتىناسى ازداپ توقىراعان، ەندىگى جەردە «ۇلتتار ادەبيەتى» جۋرنالىنىڭ قازاقشا باسىلىمى قازاقستاندىق وقىرمانداردىڭ جۇڭگو ادەبيەتىمەن تىكەلەي، ىشكەرىلەي تانىسۋىنا وراي جاراتىپ، ەكى ەلدىڭ ادەبي – مادەني سالاداعى قارىم – قاتىناسىندا كوپىرلىك رول اتقاراتىن بولادى.

　　بۇل رەتكى اۋدارما وڭدەۋ كەڭەسىنە قاتىناسقان 20 ادامنىڭ ىشىندە قازاق اۋدارماشىلار، قازاقشا شىعارما جازاتىن جازۋشىلار جانە قازاقشاعا اۋدارىلعان شىعارمالاردىڭ اۆتورلارى بار. مۇندا 16 ادام قازىرگى تاڭدا قازاق تىلىندە ادەبي اۋدارماشىلىقپەن شۇعىلدانىپ جۇرگەن كاكەش قايىرجان ۇلى، بالاپان راباتوۆ، شاكەن بوكەتاي، ءلاززات ورازحان قىزى، نۇربولات ءابدىقادىر، قاجىبەك ايدارحان ۇلى قاتارلى اعا بۋىن، ورتا بۋىن، جاس بۋىن وكىلدەرى.

　　ءتورت كۇنگە جالعاسقان شىعارما وڭدەۋ كەڭەسى 9 – ماۋسىمدا ءساتتى اياقتادى، بۇكىل شينجياڭنىڭ جەر – جەرىنەن جانە اقساي اۋدانىنان جازۋشىلار مەن ادەبيەت اۋەسكەرلەرىنەن 30عا تارتا ادام كەڭەسكە قاتىناستى.

　　كەلۋ قاينارى: حالىق تورابى