الەم چەمپيوناتى: العاشقى الامان

2014.06.13 11:17   كەلۋ قاينارى : حالىق تورابى

　　حالىق تورابى، 13 – ماۋسىم، بەيجيڭ. (نۇرعيسا قۇرمانجان ۇلى) فۋتبولدان برازيليا الەم چەمپيوناتىنىڭ العاشقى جارىسى بەيجيڭ ۋاقىتى بويىنشا بۇگىن تاڭ سارىدە الاڭ يەسى برازيليا كومانداسى مەن شىعىس ەۆروپادان كەلگەن حورۆاتيا كومانداسى اراسىندا وتكىزىلدى.

　　حورۆاتيا قۇراماسىندا رەال مادريد كلۋبىندا ونەر كورسەتەتىن لۋكا موديرك جانە بايەرن ميۋنحەن كلۋبىندا ونەر كورسەتەتىن ماريو ماندزۋكيچ قاتارلى ايگىلى فۋتبولشىلار بار. الەم چەمپيوناتىندا 5 رەت اعا جۇلدەگەر بولعان «اياقدوپشىلار ەلىنىڭ» قۇراماسى ءوز الاڭدارىندا جەڭىسكە ءبىر تابان جاقىن بولعانىمەن، حورۆاتياداي قارىمدى قارسىلاسىن «قالپاقپەن ۇرىپ الاتىنىنا» ەشكىم دە سەنبەسى انىق، جارىستىڭ بۇكىل بارىسى دا وسىنى كورسەتتى، حورۆاتيا قۇراماسى جارىستا ۇتتىرعانىمەن، دوپقۇمارلاردىڭ قۇرمەتىنە بولەندى.

　　بۇل جولعى فۋتبول دوداسىنا قاتىناسقان برازيليا قۇراماسىن بۇرىنعى «جارىق جۇلدىزدار سامساعان» برازيليا كومانداسىمەن سالىستىرعاندا، كوزگە «قوراشتاۋ» سەزىلەتىنى جاسىرىن ەمەس، برازيليادا فۋتبولشىلاردىڭ مولشىلىعى سونداي، جانكۇيەرلەرى دۇنيە ءجۇزىنىڭ جەر – جەرىنەن تابىلاتىن جارىق جۇلدىزدار ــ كاكا مەن رونالدينو دا 23 ادامدىق تىزىمدىككە ەنبەي قالدى. ولاردىڭ قاي – قايسى دا فۋتبول سالاسى السىزدەۋ ازيا ەلدەرىنىڭ بىرىندە بولسا، بالكىم، سول ەلدى الەم چەمپيوناتىنا قاتىناساتىن 32 ەلدىڭ قاتارىنا ەنگىزىپ كەتەر دە ەدى.

　　جارىس باستالا سالا حورۆاتيا كومانداسى وزدەرىنىڭ «وڭاي شاعىلاتىن جاڭعاق» ەمەس ەكەنىن دالەلدەدى، قانداي دا ءبىر كوماندانى تىكسىندىرمەي قويمايتىن برازيليا كومانداسىنا ولار العاشقى مينۋتتار دا – اق وسىنى بايقاتتى، ءتىپتى، برازيليا كومانداسى بۇلاي بولارىن ويلاماسا كەرەك، كوڭىلگە بولماسا ابدىراپ قالعانى شىندىق. سول ەكپىنمەن حورۆاتيا كومانداسىنداعى وليچ الاڭنىڭ سول جاق بۇرىشىنان برازيليا قاقپاسىنىڭ الدىنا قاراي دوپتى جەرلەتە تەپتى، قىزىق بولعاندا برازيليا كومانداسىنىڭ ءۇش بىردەي قورعاۋشىسىنان وتكەن الا دوپ مارسەلونىڭ اياعىنا ءتيىپ، ءوز قاقپاسىنا ەنىپ كەتتى. ءسويتىپ، بۇل رەتكى الەم چەمپيوناتى وسىنداي وقىس دوپپەن باستالدى. جارىستىڭ 29 – مينۋتىندا برازيليا كومانداسىنداعى نەيمار ەرەك ونەرىن ايگىلەپ، ارىپتەسىنىڭ كومانداسىنا تاماشا دوپ سالدى، جارىستىڭ 69 – مينۋتىندا فەرەدەريكو پاس الىپ، دوپتى قاقپاعا قاراي ايلانىپ تەپپەك بولعاندا، حورۆاتيا قۇراماسىنىڭ قورعاۋشىسى لوۆرەن يىعىنان بولىمسىز تارتىپ قالىپ، فەرەدەريكو جىعىلىپ، تورەشى جازا دوپ بەردى، نەيمار دوپتى قارسىلاسىنىڭ قاقپاسىنا توعىتتى. جارىستىڭ 91 – مينۋتىندا وسكار قارسىلاسىنىڭ اياعىنان الادوپتى قاعىپ الىپ، ەسەپتى 3 : 1 ۇپايعا وزگەرتىپ جازدى.

　　بۇل جارىستا باس تورەشى بولعان جاپونيالىق نيشيمۋرا يۋچيدىڭ حورۆاتيا كومانداسىن جازا دوپقا جىعىپ بەرۋى تالاس تۋدىردى. ءىشىنارا جانكۇيەرلەر حورۆاتيا فۋتبولشىسى شىنىندا دا فەرەدەريكونى يىعىنان تارتقان بولسا دا، ول جىعىلا قوياتىنداي بولعان جوق، بۇل جەردە فەرەدەريكو «ارتيستىك» ونەرىن كورسەتتى دەپ قارادى. مەيلى قالاي بولسا دا، جەڭىس ەڭ سوڭىندا برازيلياعا ءتان، جارىس بارىسىنداعى تالاس تۋدىرعان تۇيىندەر دە جانكۇيەرلەردىڭ ەسىندە جاتتالىپ، تالاي اڭگىمەگە تۇزدىق بولاتىنى بار، بالكىم، فۋتبولدىڭ قىزىعى دا وسىندا شىعار.

　　كەلۋ قاينارى: حالىق تورابى