1603.9 كيلوگرام! يۋان لۇڭپيڭ ۇجىمىنداعىلار بۋدانداستىرىلعان كۇرىشتەن قوس ماۋسىمدا ءار مۋىنان الاتىن ءونىمنىڭ رەكوردىن جاڭالادى

2021.10.18 16:09   كەلۋ قاينارى : حالىق تورابى

　　سۋرەتتە: ورۋدى كۇتىپ تۇرعان كۇرىش، 10 – ايدىڭ 17 – كۇنى ءونىم مولشەرىن تەكسەرۋ ناق مايدانىنان تۇسىرىلگەن سۋرەت. شينحۋا اگەنتتىگىنىڭ ءتىلشىسى چىن جىنحاي فوتوسى

　　شينحۋا اگەنتتىگىنىڭ ءتىلشىسى باي تيانتيان، چىن جىنحاي 10 – ايدىڭ 17 – كۇنى چاڭشادان حابارلايدى. 1603.9 كيلوگرام! 10 – ايدىڭ 17 – كۇنى حۋنان ولكەسى حىڭياڭ قالاسى حىڭياڭ اۋدانى چيڭجۋ قىستاعىندا، «كۇرىشتى بۋدانداستىرۋدىڭ اتاسى» يۋان لۇڭپيڭ اكادەميكتىڭ ماماندار ۇجىمى زەرتتەپ شىققان بۋدانداستىرىلعان كۇرىشتەن قوس ماۋسىمدا مۋىنان الاتىن ءونىم بىلتىرعى 1500 كيلوگرامدىق ۇلكەن بەلەستەن اسقان سوڭ، تاعى دا رەكورد جاڭالاعان.

　　سول كۇنى حۋنان بۋدانداستىرىلعان كۇرىشتى زەرتتەۋ ورتالىعى حىڭنان اۋدانىندا 2021 – جىلعى وڭتۇستىكتەگى كۇرىش رايونىندا قوس ماۋسىمدا ءار مۋىنان 1500 كيلوگرام ءونىم الۋدان قامال الۋعا قاتىستى ءونىم مولشەرىن تەكسەرىپ وتكىزىپ الۋ قىزمەتىن ورىستەتتى، ءونىم مولشەرىن تەكسەرۋشى ماماندار گرۋپپاسىنىڭ باستىعى، جۇڭگو عىلىم اكادەمياسىنىڭ اكادەميگى شيە حۋا – ان ناق مايداندا ناتيجەنى جاريالادى. ءونىم مولشەرىن تەكسەرۋ ناتيجەسىنە قاراعاندا، كەش پىساتىن كۇرىشتەن مۋىنا ورتا ەسەپپەن 936.1 كيلوگرام ءونىم تۇسكەن، بۇعان بيىلعى ەرتە پىساتىن كۇرىشتەن مۋىنا ورتا ەسەپپەن 667.8 كيلوگرام ءونىم الىنعانىن قوسىپ ەسەپتەگەندە، بۋدانداستىرىلعان كۇرىشتەن قوس ماۋسىمدا ءار مۋىنان الاتىن ءونىم 1603.9 كيلوگرام بولعان.

　　ءونىم مولشەرىن تەكسەرۋدىڭ ناق مايدانىندا، حۋنان ولكەلىك كۇرىشتى بۋدانداستىرۋدى زەرتتەۋ ورتالىعىنىڭ ەگۋ جانە فيزولوگيالىق ەكولوگيا كەڭسەسىنىڭ مەڭگەرۋشىسى لي جيان – ۋ: «ۇقساس ەكولوگيالىق وڭىردە جالعاستى 2 جىل ۇدايى قوس ماۋسىمدا ءار مۋىنان 1500 كيلوگرامنان ارتىق ءونىم الۋ دەگەنىمىز يۋان لۇڭپيڭ اكادەميك كوزى تىرىسىندە ورتاعا قويعان قامال الۋ نىساناسىنىڭ ىسكە اسقانىن كورسەتەدى»، — دەدى، الدىڭعى مەرزىمدەگى جوعارى تەمپەراتۋرالى شەكتەن اسقان اۋا رايى جاعدايىندا مۇنداي جوعارى ءتۇسىمدى ناتيجە جاراتۋ وڭاي – وسپاق ءىس ەمەس، بۇل اتالعان سورتتىڭ ۇيلەسۋ قۋاتىنىڭ ءبىرشاما كۇشتى ەكەنىن كورسەتەدى، سونىمەن بىرگە، بۇل كەلەسى قادامدا جالپىلاستىرۋعا دا تاماشا نەگىز قالادى.

　　ۇعىسۋعا قاراعاندا، يۋان لۇڭپيڭ اكادەميك 3 – ۇرپاق بۋدانداستىرىلعان كۇرىش تەحنيكاسىن كۇرىشتىڭ ءار مۋىنان تۇسەتىن ءونىمنىڭ «شەگىن» بۇزۋداعى شەشۋشى ءتۇيىن دەپ قاراعان. 2019 – جىلدان باستاپ، حىڭنان اۋدانى 3 – ۇرپاق بۋدانداستىرىلعان كۇرىشتى ءوندىرۋدىڭ ۇلگى كورسەتۋ وزەكتى رايونى بولىپ تاڭدالعان، 3 – ۇرپاق بۋدانداستىرىلعان «سانيوۋ 1 – ءنومىرلى» اتىنداعى كۇرىش قۇراماسىنا اتالعان ۇلگى كورسەتۋ بازاسىندا جوعارى ءونىم الۋدان قامال الۋدى سىناق ەتۋ جانە ودان ۇلگى كورسەتۋ قىزمەتى ورىستەتىلگەن.

　　كەلۋ قاينارى: حالىق تورابى