يۇننانداعى تابيعي قورىقتان ون نەشە جىلدان بەرى تۇڭعىش رەت سيىر بوكەن سۋرەتكە ءتۇسىرىلدى

2021.10.20 16:30   كەلۋ قاينارى : حالىق تورابى

　　ينفرا قىزىل ساۋلەلى اپپاراتپەن تۇسىرىلگەن سيىر بوكەننىڭ سۋرەتى (يۇننان ولكەسى باۋشان قالاسى لۇڭياڭ رايونى توعىسپالى مەديا ورتالىعى بەرگەن سۋرەت)

　　جۋىردا يۇننان ولكەسى گاۋليگۇڭشان مەملەكەتتىك تابيعي قورىعى باۋشان باسقارۋ – قورعاۋ مەكەمەسى لۇڭياڭ بولىمشە مەكەمەسى ينفرا قىزىل ساۋلەلى اپپاراتپەن تۇسىرىلگەن دەرەكتەردى جيناپ الۋ بارىسىندا، اپپاراتقا جاقىن جەردەن وتكەن سيىر بوكەننىڭ سۋرەتى تۇسىرىلگەنىن كورگەن. بۇل نەشە ون جىلدان بەرى لۇڭياڭ بولىمشە مەكەمەسىنىڭ باسقارۋ – قورعاۋ رايونىنان تۇڭعىش رەت مەملەكەتتىك 1 – دارەجەلى قورعالاتىن حايۋان، حالىقارالىق تۇقىمى قۇرۋعا اينالعان جابايى حايۋانات — سيىر بوكەندى سۋرەتكە ءتۇسىرۋى.

　　ينفرا قىزىل ساۋلەلى اپپاراتتاعى كەسكىنگە قاراعاندا، تۇرقى سەمىز، ءيىر ءمۇيىزدى، ءتورت اياقتى جانۋار اپپاراتقا باياۋ تاياپ كەلگەن. جۇڭگو عىلىم اكادەمياسى كۇنميڭ حايۋاناتتاردى زەرتتەۋ بولىمشەسىنىڭ زەرتتەرمەنى جياڭ شۋەلۇڭ سۋرەتتەگى ءيىر ءمۇيىزدى، مويىنى تىعىرشىقتاي، ءتورتپاق حايۋاناتتىڭ دەنە تۇرقىنا تالداۋ جاساي كەلە، ونى سيىر بوكەن دەپ تۇراقتاندىرعان.

　　گاۋليگۇڭشان قورىعى باۋشان باسقارۋ – قورعاۋ مەكەمەسى لۇڭياڭ بولىمشە مەكەمەسى بايحۋاليڭ پۋنكتىنىڭ باستىعى دۋان ساييۇڭنىڭ تانىستىرۋىنشا، سيىر بوكەننىڭ بيىكتىگى 110 سانتيمەتردەن 120 سانتيمەترگە دەيىن بولادى، ەركەگىنىڭ سالماعى 300 كيلوگرامعا، ۇرعاشىسى 250 كيلوگرامعا دەيىن بولادى، ەڭ سالماقتى سيىر بوكەن 1000 كيلوگرامعا دەيىن اۋىرلىقتا بولادى. ەركەگى مەن ۇرعاشىسىنىڭ ەكەۋىندە دە ءمۇيىز بولادى، ادەتتە ءمۇيىزى 20 سانتيمەتردەي بولادى. سيىر بوكەن نەگىزىنەن تەڭىز دەڭگەيىنەن 2500 مەتردەن استام بيىكتىكتەگى ءۇستىرتتى، سۋىق وڭىردە جاسايدى، مەملەكەتتىك 1 – دارەجەلى قورعالاتىن حايۋانات، «دۇنيە جۇزىلىك تابيعي قورىقتار بىرلەستىگىنىڭ تۇقىمى قۇرىپ جوعالۋعا اينالعان تۇرلەردىڭ قىزىل ءتۇستى تىزىمدىگىنە» ەنگىزىلگەن، قازىر جۇڭگودا تەك مىڭ تۇياقتاي عانا بار.

　　دۋان ساييۇڭنىڭ ايتۋىنشا، اتالعان باسقارۋ – قورعاۋ مەكەمەسى 2000 – جىلدان بەرى گاۋليگۇڭشان قورىعىنداعى سيىر بوكەندەرگە تەكسەرۋ – زەرتتەۋ جۇرگىزگەن، الايدا، سۋرەتكە تۇسىرە الماي كەلگەن. بۇل جولى سيىر بوكەندى جاقىن ارالىقتان سۋرەتكە ءتۇسىرۋ گاۋليگۇڭشان قورىعىندا سيىر بوكەندى قورعاۋ مەن زەرتتەۋ قىزمەتىن ورىستەتۋدە، سيىر تۇقىمداس حايۋاناتتاردىڭ ءناسىلىن جاقسارتۋدا، ەكولوگيالىق ورتانى قورعاۋدا جانە گاۋليگۇڭشان قورىعىنداعى ورگانيزمدەردىڭ الۋان تۇرلىلىگىن قورعاۋ، زەرتتەۋ قاتارلى جاقتاردا ماڭىزدى ءمان الادى.

　　كەلۋ قاينارى: حالىق تورابى