بەتتى ساقتاۋ | باس بەت ەتۋ | حات ساندىعى | حابارلاسىڭىز | ءبىز تۋرالى
حالىق تورابى

نىلقى اۋدانىنىڭ قازاقى كەستەلى كيىم - كەشەكتەرى مەملەكەتتىك كورمەدە التىن مەدال الدى

2013.12.09 17:07   كەلۋ قاينارى : حالىق تورابى

قىزاي ۇلگىسىندەگى ايەلدەردىڭ كەستەلى كيىمدەرى
قىزاي ۇلگىسىندەگى ايەلدەردىڭ كەستەلى كيىمدەرى

  تاياۋدا ۋحاندا بولىپ وتكەن «14 - كەزەكتى جۇڭگو اسەمونەرشىلەرىنىڭ تۋىندىلارى جانە حالىقارالىق اسەمونەر سارا تۋىندىلارى كورمەسىندە» نىلقى اۋدانىنىڭ قازاق كەستەشىلىگى قىزاي ۇلگىسىندەگى جەلىلەس كيىم - كەشەكتەرى وسى رەتكى كورمەنىڭ باس سيلىعىنا كورسەتىلىپ، التىن مەدالمەن سيلاندى.

  ۇعىسۋعا قاراعاندا، ۇستەگى جىلدىڭ باسىندا قول ونەر بۇيىمدارىن مەملەكەتتىك كورمەگە قاتىناستىرۋ ورايىنا يە بولعان سوڭ نىلقى اۋدانى جان - جاقتىلى ازىرلىك جاساپ، كورمەگە قازاق كەستەسىنىڭ قىزاي ۇلگىسىمەن كەستەلەپ، ويۋلاپ، قولمەن تىگىلگەن قازاقتىڭ ءداستۇرلى ۇلتتىق بوياۋى قانىق قولونەر بۇيىمدارىنان ەر - ايەلدەردىڭ كەستەلى، ويۋلى كيىمدەرى مەن كەستەلى قول سومكا، كەستەلى ءتور كورپە، جاستىق قاپ، جانە جاس وتاۋدىڭ اشەكەي بۇيىمدارى مەن جاساۋ جابدىقتارىنان 50 نەشە ءتۇرلى قول ونەر تۋىندىلارىن قاتىناستىرىپ، كورمەنىڭ ءسان - سالتاناتىن اسىرعان.

  كورمە اشىلىسىمەن كورمەگە قويىلعان بارلىق اسەمونەر تۋىندىلارىنان بوگەنايى بولەك، كورىنىسى كوز تارتاتىن قازاقى كيىم - كەشەكتەر مەن قىر گۇلىندەي قۇلپىرعان «قىزاي كەستەسى» مەن ايشىقتالعان كەستەلى بۇيمدار ەل ءىشى - سىرتىنان كەلگەن كورمەنى تاماشالاۋشىلاردى ەرەسەن باۋراپ، كورمە ءادىلقازىلارىنىڭ جوعارى باعاسىنا يە بولعان. كورمەگە قويىلعان كەستەلى بۇيىمداردىڭ ىشىندەگى ىلە تاسبۇلاق شەبەرحاناسىنىڭ قۇرۋشىسى جەڭىسگۇل نۇرداناقىن قىزى جوبالاپ، نۇرزات تولەۋبەك قىزى تىككەن «قىزاي انا كەستەلى كيىم – كەشەكتەرى» شيىنجياڭ قازاقتارىنىڭ كەستەشىلىك ونەرىن حالىقاراعا تانىتىپ، قازاقى كەستەلى كيىم - كەشەكتەردىڭ كوز تارتارلىق ءسان - سالتاناتىن ايگىلەي تۇسكەن.

  قازاق كەستەشىلىگىنىڭ قىزاي ۇلگىسى نىلقى اۋدانىنىڭ قولونەرشىلىكتەگى ايگىلى ماركاسى. اۋداننىڭ ەرەكشە مادەنيەت جانە جەرگىلىكتى ەرەكشە ساياحات ەستەلىك بۇيىمى دەپ بەكتىلگەن ءتۇر. نىلقى اۋدانىندا كەستەشىلىك العاشقى ساتىدا اۋىل - قىستاق ايەلدەرىنىڭ كاسىپتەنىپ كىرىس تابۋ جولى رەتىندە دامىتىلىپ، 2005 - جىلى قىزاي ۇلگىسىندەگى كەستە ءتۇرى ماركا ۇقىعىن العاننان كەيىن، اۆتونوميالى رايوننىڭ بەيزاتتىق مادەنيەت مۇراعاتتارىنا ەنگىزىلدى. 2012 - جىلى ناۋرىزدان باستاپ نىلقى اۋدانى سۋجوۋ قالاسىمەن ىستەستىك جاساپ، كەستەشىلىك بازاسىن قۇرىپ، سۋجوۋ كەستەشىلىگىنىڭ جوبالاۋ، تىگۋ سياقتى جاقتارىنداعى كەيبىر تەحنيكالىق ادىستەرىن قابىلداپ، كەستەشىلىك ونىمدەرىن ءوندىرۋدى تەز قارقىنمەن دامىتۋعا سارا جول تاپتى. ءارى سول جىلى نىلقىداعى 10 مىڭ ايەل ءبىر ۋاقىتتا قىزاي كەستەسىن تىگىپ «دۇنيە گەننيس رەكوردىن» جاراتتى. بيىل بۇل اۋدان تاعى چياڭزۋ كەستەشىلەرىن ۇسىنىس ەتىپ، ولاردان كەستەلى بۇيىمداردى توپتاپ ءوندىرۋ مەن ساتىپ شىعارۋ جاقتارىنداعى قۇندى تاجىريبەلەردى ۇيرەنىپ، مادەنيەت توعىستىرىپ، قازاق كەستەشىلىگىنىڭ قىزاي ۇلگىسىنە ساياحات ەستەلىك بۇيىمدارى تۇرىنەن مول مازمۇن، الۋان فورما قوسىپ كەستەشىلىك ونەرىن «كۇركەشەدەن كۇللى الەمگ» بەت الدىردى.

  كەزەكتە نىلقى اۋدانىندا قازاق كەستەشىلىگىنىڭ قىزاي ۇلگىسى قاۋىرت دامۋعا بەت الدى. قازىر اۋدان بويىنشا 39 كەستەشىلەر قىستاعى، 17 سەلبەستىك قوعام قۇرىلىپ، ءبىر كەستەشىلىك زاۆود اشىلدى. اۋدان بويىنشا وسى ونەرمەن كاسىپتەنگەندەر 10 مىڭ ادامنان استى. بۇدان سىرت، اۋداننىڭ قاتىستى تاراۋلارىنىڭ جەتەكشىلىگى مەن قولداۋىندا اۋدان قالاشىعىنداعى تاڭبالى بازارى مەن ءار قايسى اۋىل، قالاشىقتارداعى بازارلاردا ارناۋلى كەستە بۇيىمدارى دۇكەندەرى اشىلىپ، اناعۇرلىم كوپ ادامداردىڭ كاسىپتەنۋىنە وراي تۋىلدى.

  مىنە وسىلاي كەرەگەسىن كەڭ جايىپ كەلە جاتقان «قىزاي كەستەسى» ونىمدەرى كاسىپ سالالانىپ، نىلقى اۋدانىنىڭ قولونەركاسىبىن دامىتىپ حالىق تۇرمىسىن جاقسارتۋداعى جارقىن تۇيىنگە اينالىپ، اۋداننىڭ مادەنيەت ارقىلى حالىقتى اۋقاتتاندىرۋ ينجەنەرياسىنىڭ وبرازدى تۇلعاسى بولىپ ايشىقتالا تۇسۋدە.

  تومەندە قىزي كەستەسى ۇلگىسىندەگى ءساندى كيىم - كەشەكتەر مەن كەستەشىلەردىڭ جۇمىس بارىسىنان بىرنەشە كورىنىس.

  حابارىن جازىپ سۋرەتىن تۇسىرگەن باقىتبەك ءجۇمادىل ۇلى

  اۆتوردىڭ قىزمەت ورنى: ىلە حالىق راديو ستانسياسى

  كەلۋ قاينارى: حالىق تورابى

【1】 【2】 【3】 【4】 
جاۋاپتى رەداكتورى : مۇحيت امانتاي ۇلى

 سۋرەت