بەيجيڭدە ۇلىستىڭ ۇلى كۇنى تويلاندى(3)

2014.03.28 15:01  

　　حالىق تورابى، 23 - ناۋرىز، بەيجيڭ، مۇحيت امانتاي ۇلى، نۇرعيسا قۇرمانجان ۇلى حابارلايدى. ناۋرىز ــ جىل باسى، بۇل حالقىمىز ءۇشىن جاڭارۋدىڭ، جاسامپازدىقتىڭ باستاماسى، ىرىس پەن بەرەكەنىڭ ارقاۋى. بۇگىنگى تاڭدا دۇنيە جۇزىندەگى ءبىرتالاي حالىق بۇل مەرەكەنى ءوز سالت - داستۇرلەرى بويىنشا تويلاعانىمەن، قازاق حالقىنىڭ ناۋرىزعا دەگەن ىقىلاسى بارلىعىنان وزگەشە، تويلاۋ ءداستۇرى دە باسقاشا. وسى ۇلىق مەرەكەمىز زامانا كوشىمەن قايتا جاڭعىرىپ، حالقىمىزدى بەرەكە – بىرلىككە شاقىراتىن اسىل قاسيەتىن اسىرا تۇسپەسە كەمەيتپەگەن سياقتى. قارعا تامىرلى قازاقتىڭ بەيجيڭدەگى ءبىر بۇتاعىنىڭ بەرەكەلىك تانىتىپ، ءنان قالانىڭ تۇس – تۇسىنان مەرەكەگە قۇيىلعانى ءدال سونىڭ ايعاعى سپەتتى. ناقتاپ ايتساق، جىلقى جىلىنىڭ جىلۋى تاراپ، جايماشۋاق جازعىتۇرىم لەبى ەسكەن ناۋرىزدىڭ 21 – جۇلدىزىندا بەيجيڭدەگى جۇڭگو وسىزامان ادەبيەت سارايىندا ۇلىس كۇنى ــ ناۋرىزعا ارنالعان سالتاناتتى ساۋىق كەش وتكىزىلدى. مەرەكەلىك ساۋىق كەشكە بەيجيڭدەگى ستۋدەنتتەر مەن ءار سالادا قىزمەت ىستەپ جاتقان قانداستارىمىزدان 500دەي ادام قاتىناستى.

　　مەرەكەلىك شاراعا قازاق ەلىنەن نۇرعالي ءنۇسىپجانوۆ باستاعان ونەرپازدار ات ارىتىپ الىستان كەلىپ، ناۋرىز مەرەكەسىنىڭ ءسان – سالتاناتىن اسىرىپ، بەيجيڭدەگى جۇرتتى قۋانىشقا بولەدى. ايگىلى ءانشىنى بۇل كونسەرت ساحناسىنان كورەمىز دەپ ويلاماعان حالىق مارە – سارە قۋانىپ، حالىق انشىسىنە دۋ قول سوعىپ قۇرمەت – ىزەتتەرىن ءبىلدىردى. عابيدەن ەسىمبەكوۆ، مارحابات بەيسەنوۆا قاتارلى قازاقستان انشىلەرى دە قازاقى قوڭىر اۋەندەرمەن كورەرمەننىڭ جۇرەك قىلىن تەربەتسە، اراي ايدارحان ۇلى قاتارلى جاس انشىلەر ساۋىق ساحناسىندا ءوز ونەرلەرىن ايگىلەپ، مەرەكەنىڭ مەرەيىن اسىردى. كورەرمەن دومبىرا، قوبىزدا ورىندالعان كۇيلەرمەن سۋسىنداپ، پارحات ءبيماش ۇلى ورىنداعان يسپانياشا بيگە تامساندى. ساۋىق كەشتى ورتالىق حالىق راديو ستانسياسىنىڭ مايتالمان جۇرگىزۋشىلەرى بالاپان راباتوۆ پەن ارداق ابيدەن قىزى جۇرگىزدى. ءوز كەزەگىندە ارداق ابيدەن قىزى مەن بالاپان راباتوۆ تا ءان ساحناسىنان بوي كورسەتتى.

　　بۇل جولعى ناۋرىز كونسەرتىن «جۇڭگو جازۋشىلارى» جۋرنالى، ۇلتتار باسپاسى، ورتالىق حالىق راديو ستانسياسى، ورتالىق ۇلتتار ۋنيۆەسيتەتى، ورتالىق ۇلتتار اۋدارما مەكەمەسى، «ۇلتتار ادەبيەتى» جۋرنالى قاتارلى ورىندار ۇيىمداستىردى، حالىق تورابى، ورتالىق حالىق راديو ستانسياسىنىڭ تورابى، ورتالىق تەلەۆيزيا تورابى قاتارلى مەديالار حابارلادى.

　　ناۋرىز مەرەكەسى بەيجيڭ قالاسىندا جىل سايىن كولەمدى تويلانادى، وسىنداي توپتىق كونسەرتتەن سىرت، مەكەمە ورىندار مەن مەكتەپتەر دە ءوز دەڭگەيلەرىندە ناۋرىز مەرەكەسىنە دايىندىق كورىپ، مەرەكەنى سالتاناتتى تويلاۋعا قۇلشىنادى. جۋىرداعى جىلداردان بەرى جۇڭگو مەن قازاقستان اراسىنداعى تاتۋ كورشىلىك، سەنىمدى سەرىكتەستىك اياسىندا قازاقستان ونەرپازدارى دا بەيجيڭدەگى ناۋرىز سىندى ءتۇرلى شارالارعا قاتىناسىپ، ەكى ەلدىڭ اينىماس دوستىعىن ايگىلەپ ءجۇر. اتاپ ايتساق، وسى جولعى كونسەرتتە قازاقستاننىڭ تانىمالى ونەرپازدارى ونەر كورسەتۋدەن سىرت، قازاقستان رەسپۋبليكاسىنىڭ شاڭحاي ىنتىماقتاستىق ۇيىمى حاتشىلىعى جانىنداعى تۇراقتى ۋاكىلى باعدات سەيىتباتتالوۆ تا كورەرمەن اراسىندا وتىرىپ مەرەكەلىك كەشتى تاماشالادى.

　　وسىلايشا بەيجيڭدەگى جىلقى جىلىنىڭ ناۋرىز كەشى سالتاناتتى، تارتىمدى وتكىزىلدى. جىلقى جىلى سىزدەرگە تۇلپاردىڭ جۇيرىكتىگىن بەرسىن، اعايىن!

　　ءانشى، قازاقستان رەسپۋبليكاسىنىڭ حالىق ءارتىسى نۇرعالي ءنۇسىپجانوۆ:

　　جاڭا جىل قۇتتى بولسىن! كۇللى الەمدەگى ەڭبەكشى حالىق ءۇشىن، يگىلىك ءۇشىن ىستەپ جاتقان بارلىق جۇرتقا، ءتىپتى بارلىق مەملەكەتتەرگە جاقسى تىلەگىمدى ارنايمىن، ۇيتكەنى جاقسىلىق بارىنە جەتەدى. اتقان تاڭىمىز شۋاقتى بولسىن، شاپاعاتتى بولسىن، وسىنداي مەيرامدى مۇرا ەتكەن اتا – بابالارىمىزدىڭ ارۋاعى جاستارعا جار بولسىن، سولاردىڭ ۇلى جولى بالالارىمىزعا، ۇرپاقتارىمىزعا ۇلگى بولسىن. بارلىق ەل – جۇرتقا دوستىق تىلەك، ىستىق ماحاببات، جاقسىلىق تىلەيمىن.

　　قازاقستان رەسپۋبليكاسىنىڭ شاڭحاي ىنتىماقتاستىق ۇيىمى حاتشىلىعى جانىنداعى تۇراقتى وكىلى باعدات سەيىتباتتالوۆ:

　　ۇلىستىڭ ۇلى كۇنى، جىلدىڭ باسى ناۋرىز مەرەكەسى قۇتتى بولسىن، اعايىن! بارلىقتارىڭىزعا قۇت – بەرەكە، ۇيلەرىڭىزگە باقىت، شاتتىق، كۇلكى اكەلسىن، قىزمەتتەرىڭىز، شارۋاشىلىقتارىڭىز، وقۋلارىڭىز بارلىعى العا باسا بەرسىن. قازاقستان ەلشىلىگىنىڭ اتىنان، قازاقستاننىڭ شاڭحاي ىنتىماقتاستىق ۇيىمىنداعى تۇراقتى وكىلدىگى اتىنان سىزدەردى ۇلىستىڭ ۇلى كۇنى ناۋرىزبەن شىن جۇرەكتەن قۇتتىقتايمىز. ءارقاشان جاقسىلىقتا، ىزگى نيەتپەن وسىلاي كەزدەسىپ جۇرەيىك. قازىر جۇڭگو مەن قازاقستان ەكى ەلدىڭ قارىم – قاتىناسى جاقسى، وسىنداي كەشتەر سول قارىم - قاتىناستى مادەنيەت سالاسىندا نىعايتۋعا پايدالى، وسىنداي كەشتەر كوپ بولسىن، ءساتتى كۇندەر مول بولسىن، قۇت بەرەكە اكەلسىن، جاڭا جىلىمىز قۇتتى بولسىن، اعايىن!

　　مەملەكەتتىك ساياسي كەڭەس مۇشەسى، ايگىلى جازۋشى، «جۇڭگو جازۋشىلارى» جۋرنالىنىڭ باس رەداكتورى اكبار ءماجيت ۇلى:

　　ناۋرىز مەرەكەسى قازاقتىڭ ۇلتتىق مەرەكەسى، بەيجيڭدە ناۋرىز مەرەكەسى وتكىزىلىپ كەلە جاتقالى 32 جىل بولدى، بۇگىن مىنە زامانعا ساي، حالىقارالىق ورەدەگى ساۋىق كەش وتكىزىلدى، كورەرمەندەر دە وتە ريزا، ارىسى قازاقستاننان، بەرىسى بەيجيڭنەن ونەرپازدار جينالىپ ونەرلەرىن كورسەتىپ، ەلدى قۋانتىپ جاتىر، وسى ونەرپازدارعا راحىمەت، بۇگىنگى مەرەكەلىك شاراعا كەلگەن بۇكىل حاۋىمعا راحىمەت، ەندى بارلىعىمىز ءار شاڭىراقتا، ءار وتاۋدا كوجەنى قويۋ، اقتى مول ەتىپ ناۋرىز كوجەدەن ءدام تاتاتىن بولامىز.

　　كەلۋ قاينارى: حالىق تورابى