«قارا جورعا» بيىنە ارنالعان 2 - كەزەكتى عىلمي تالقى ءماجىلسى تەكتى مەكەن تەكەس اۋدانىندا سالتاناتپەن اشىلدى

2014.10.16 14:41   كەلۋ قاينارى : حالىق تورابى

　　ەرىكتى ءتىلشى تولقىن جايىربەك ۇلى حابارلايدى. ىلە قازاق اۆتونوميالى وبلىسىنىڭ مەملەكەت دارەجەلى بەيزاتتىق مادەنيەت مۇرالاردى قورعاۋ نىسانى ــ قارا جورعا بيىنە ارنالعان عىلمي تالقى ءماجىلسى قىركۇيەك ايىنىڭ 26 -، 27 - ، 28 - كۇندەرى تەكتى مەكەن تەكەس اۋدانىندا سالتاناتپەن اشىلدى.

　　بۇل رەتكى قيمىلعا ەلىمىزدىڭ گانسۋ ولكەسى اقساي اۋدانىنان جانە التاي ايماعىنان، باركول قازاق اۆتونوميالى اۋدانىنان، ىلەدەگى 8 اۋدان، ەكى قالادان باسشىلار، ماماندار مەن زەرتتەرمەندەر، ءبيشى - ونەرپازدار بولىپ 200دەن ارتىق ادام قاتىناستى.

　　جيىنعا ىلە قازاق اۆتونوميالى وبلىسىنىڭ ورىنباسار باستىعى مۇقيات جارمۇقامەت ۇلى، ىلە قازاق اۆتونوميالى وبلىسى مادەنيەت - دەنە تاربيە، راديو - تەلەۆيزيا مەكەمەسىنىڭ باستىعى قىزىركەلدى، ىلە قازاق اۆتونوميالى وبلىسى مادەنيەت مەكەمەسىنىڭ باستىعى زايتۇنا، وقاپ، تەكەس اۋدانىنىڭ سەكىراتارى ليۋلي جانە اكىمى جاڭارسىن نۇراش ۇلى قاتارلى جولداستار قاتىناسىپ ماڭىزدى ءسوز سويلەدى.

　　مۇقيات جارمۇقامەت ۇلى بۇل رەتكى اشىلىپ وتىرعان ءماجىلىستىڭ توتەنشە ماڭىزدى ەكەندىگىن باسا دارىپتەي كەلىپ، زەرتتەرمەن - مامانداردان، بيگە مۇراگەرلىك ەتىپ جۇرگەن ونەرپاز كاسىپ يەلەرىنەن «قارا جورعا» ءبيىن ولشەمدەستىرۋگە، ونىڭ ءىز - دەرەگىن حالىق اراسىنان جيىپ - رەتتەپ ءبىر جۇيەگە تۇسىرۋگە، ساحنالاستىرىپ وركەستىر جاساۋعا، زەرتتەۋ ماقالالارىن جازىپ باسپا بەتتەرىندە جيى جاريالاۋعا، راديو - تەلەۆيزيادا ۇنەمى تاراتۋعا، كەسكىن تاسپاسى جانە ءۇن تاسپالارىن جاساۋعا ايىرىقشا كۇش قوسۋلارىن تالاپ ەتتى.

　　باسشىلاردىڭ ماڭىزدى سوزىنەن سوڭ زەرتتەرمەن - مامانداردىڭ ماقالالارىنا كەزەك بەرىلدى. جيىنى 12 ماقالا وقىلىپ جيىنعا قاتىناسقان تىڭدارمانداردىڭ قىزۋ العىسى مەن جاقسى باعاسىنا يە بولسا، ونىڭ سوڭىنان تارتىمدى وي - پىكرلەر تالقىلانىپ، جەر - جەردەن كەلگەن ماماندار مەن زەرتتەرمەندەر جانە كاسىپتىك بيشىلەر وي ورتاقتاستىرىپ، «قارا جورعا» ءبيىن زەرتتەۋ جۇمىسىن قولعا الۋ كەرەك دەگەن تۇيىنگە تياناقتادى. جيىننىڭ ەڭ سوڭعى كۇنى قارا جورعا بيىنەن ناق مايدان جارىسى وتكىزىلىپ، كوپشىلىكتىڭ قول سوعىپ قوشامەت بىلدىرگەن ءۇنى ءبىر ساتكە تولاستاعان جوق. جەر-جەردەن كەلگەن ءبيشى - ونەرپازدار ءوز ەرەكشەلىكتەرى بويىنشا ونەر كورسەتىپ، سىماعۇل بودەنباي ۇلى سىندى مەملەكەت دارەجەلى كاسىپتىك ماماننىڭ باقىلاۋى مەن ىلە قازاق اۆتونوميالى وبلىستىق تەاتردىڭ كاسىپتىك مامانى تۇرداۋ ت.ب قاتارلىءادىلعازىلاردىڭ ءادىل باعالاۋىندا 1 - دارەجەلى جۇلدەنى التاي ايماعى، باركول اۋدانى، تەكەس اۋدانى جەڭىپ الىپ، جەكە - جەكە 5000 يۋانمەن سيلانسا، 2 - دارەجەلى جۇلدەنى اقساي اۋدانى، كۇنەس اۋدانى، قۇلجا اۋدانى، نىلقى اۋدانى جەڭىپ الىپ، جەكە - جەكە 3000 يۋانمەن سيلاندى ، ال ءۇشىنشى دارەجەلى جۇلدەنى موڭعۇلكۇرە اۋدانى، توعىزتاراۋ اۋدانى، شاپشال اۋدانى، قورعاس اۋدانى قاتارلى ورىندار جەڭىپ الىپ، جەكە - جەكە 1000 يۋانمەن سيلاندى. ەڭ سوڭىندا ىلە تەلەۆيزياسىنىڭ ورنالاستىرۋىمەن ءارقايسى جەردەن كەلگەن ماماندارمەن قازاقتىڭ ۇلتتىق ءبيى قارا جورعا تۋرالى سۇحبات وتكىزىلىپ، بۇل رەتكى ءماجىلىستىڭ ماڭىزدىلىعىن ءتىپتى دە ارتتىرا ءتۇستى. فوتوعا تۇسىرگەن: تولقىن جايىربەك ۇلى

　　اۆتوردىڭ قىزمەت ورنى: قۇلجا اۋداندىق ساياسي كەڭەس تاريحي ماتەريالدار كوميتەتى

　　كەلۋ قاينارى: حالىق تورابى