استانادا قازاق اقپاراتشىلار كۋرسى اشىلدى

باقىتبەك ءجۇمادىل ۇلىنىڭ فوتوسۋرەتتى حابارى

2014.11.18 16:33   كەلۋ قاينارى : حالىق تورابى

　　كۋرسانتتار نازاريالىق ساباق تىڭداۋدا.

　　قازاق تىلىندەگى اقپارات ورىندارىنىڭ اقپارات تىرەكتىلەرىن تاربيەلەۋ جانە ورتالىق حالىق راديو ستانسياسىنىڭ كەلەر جىلدان باستاپ شينجياڭدا ارناۋلى تولقىندا كۇن سايىن 18 ساعات جۇمىس جۇرگىزۋىنە وراي ەرىكتى تىلشىلەر قوسىنىن باۋلۋدى باستى ماقسات ەتكەن قازاق اقپاراتشىلارىنىڭ مەملەكەتتىك كاسىپتىك كۋرسى بەيجيڭدە بولىپ ءوتتى.

　　ورتالىق حالىق راديو ستانسياسىنىڭ از ساندى ۇلتتار راديو وزەگى مەن جۇڭگو اقپارات – دانەكەر ۋنيۆەرسيتەتى بىرلىكتە قاراشانىڭ 6 - كۇنىنەن 15 - كۇنىنە دەيىن استانامىز بەيجيڭدە اشقان بۇل رەتكى كۋرسكە ورتالىق حالىق راديو ستانسياسى قازاق ءتىلى ارناسى، گانسۋ ولكەسى اقساي قازاق اۆتونوميالى اۋداندىق راديو - تەلەۆيزيا ستانسياسى، شينجياڭ گازەتى، شينجياڭ حالىق راديو ستانسياسى، التاي ايماقتىق راديو ستانسياسى، تارباعاتاي گازەتى، ىلە حالىق راديو ستانسياسى قاتارلى ەلىمىزدەگى قازاق تىلىندەگى اقپارات ورىندارىنان 28 ادام قاتىناستى.

　　كۋرستا جۇڭگو اقپارات – دانەكەر ۋنيۆەرسيتەتىنىڭ اقپارات، راديو - تەلەۆيزيا كاسىبىن وقىتۋ، زەرتتەۋمەن اينالىساتىن پروفەسسورلارى نازاريالىق ساباق بەرسە، ورتالىق حالىق راديو ستانسياسىنىڭ «جۇڭگو ءۇنى» باعدارلاماسىنىڭ جانە بەيجيڭ حالىق راديو ستانسياسى قاتىناس راديوسىنىڭ بۇكىل ەلگە تانىلعان ايگىلى جۇرگىزۋشىلەرى، تىلشىلەرى تاجىريبەلەرىن تانىستىرىپ، وزدەرىنىڭ «جۇڭگو اقپارات سيلىعى» قاتارلى مەملەكەتتىك، حالىقارالىق اقپارات سيلىقتارىنىڭ باس جۇلدەسىن العان سارا تۋىندىلارىن جاراتۋ بارىسىن اڭگىمەلەدى. كۋرس اياقتالار كەزدە كۋرسانتتار ورتالىق حالىق راديو ستانسياسىنا بارىپ جۇڭگو ءۇنى سياقتى ايگىلى باعدارلامالار مەن قازاق ءتىلى ارناسىنىڭ باعدارلاما جاساۋىن، ۇستىنەن تاراتۋىن كورىپ، ونداعى قىزمەتكەرلەرمەن سىرلاسىپ، تاجىريبە الماستىردى.

　　كەلۋ قاينارى: حالىق تورابى