قازاق دارىلەرىن جايما ارقىلى بازارعا سالعان قاليبەك

ساعىنبەك رابات ۇلى

2014.12.18 14:06   كەلۋ قاينارى : حالىق تورابى

　　قاليبەك قانجارباي ۇلى (ورتادا) التاي قالاسىنداعى ءتۇرلى بۇيىمدار ساۋدا سارايى الدىندا ءدارى ساتۋدا.

　　ەلى ءۇشىن ەڭىرەپ، حالىقتىڭ قامىن جەگەن ەل اعالارىنىڭ كوش باستاۋىندا، 2010 - جىلى التاي ايماقتىق مەديتسينا مەكتەبىندە ورتا تەحنيكۋم ماعلۇماتىنداعى قازاق شيپاگەرلىگى كلاسى اشىلسا، 2011 - جىلى اۆتونوميالى رايونىمىزداعى ءتۇيىندى جوعارى وقۋ ورىندارىنىڭ ءبىرى ــ شينجياڭ مەديتسينا ۋنيۆەرسيتەتىنەن تولىق كۋرس ماعلۇماتىنداعى قازاق شيپاگەرلىگى كلاسىنىڭ اشىلۋى قازاق ەمشىلىگىنىڭ تۇلەجۋىنە وراسان زور جەبەۋ بولدى.

　　ماركا العاندىقتان قازىر زاڭزۋ دارىلەرى گەرمانيا، جاپونيا، ا ق ش بازارلارىنا دەيىن شىقسا، ۇيعۇر دارىلەرى دە قىرعىزستان، قازاقستان بازارلارىنان ويىپ ورىن الدى. بالا كەزىندە وتەيبويداق تىلەۋقابىل ۇلىنىڭ 31 - ۇرپاعى، «شيپاگەرلىك باياننىڭ» مۇراگەرى ـــ نۇرتاي تۇمەنباي ۇلىنا شاكىرت بولعان قاليبەك قانجارباي ۇلىنىڭ قۇلشىنىسىمەن تابيعي قازاق دارىلەرى بۇل كۇندەرى تۇڭعىش رەت التاي قالاسىندا جايما ارقىلى بازارعا سالىنىپ، بازاردا قازاق دارىلەرى بولماۋداي بوستىقتى تولتىردى.

　　1993 - جىلى قىركۇيەكتەن 1997 - جىلى شىلدەگە دەيىن حوتان ايماعىنداعى شينجياڭ ۇيعۇر ەمشىلىگى مەكتەبىنەن ەمشىلىك كاسىبىن وقۋ بارىسىندا ۇيعۇردىڭ ايگىلى ەمشىسى، ۇيعۇر ەمشىلىگى مەكتەبىنىڭ نەگىزىن قالاۋشى، پروفەسسور ــ ءابىلاميت يۇسىپكە شاكىرت بولىپ، ودان ءشوپ ءدارى تانۋ مەن ونى پارىقتاۋ ونەرىن جەتىك يگەرىپ سەنبى، جەكسەنبى كۇندەرى حوتان قالاسى، قاراقاش، لوپ، گۇما اۋدانى، ءتىپتى، قاشقار، اتۇش قالاسىندا قازاق دارىلەرىن جايما ارقىلى ساتقان قاليبەك 1996 - جىلدىڭ سوڭىندا ۇرىمجىدەگى ۇيعۇر ەمشىلىك شيپاحاناسىندا پراكتيكا ىستەۋ بارىسىندا دا قازاق دارىلەرىن ساتۋ كاسىبىن ۇزبەي جالعاستىردى. 2000 - جىلى بۋىرشىن اۋدانىنىڭ قوستىق اۋىلدىق ەمحاناسىندا قوعامدىق قىزمەتكە ارالاسقان ول وسىدان كەيىن قوم - قاناس موڭعۇل ۇلتتىق اۋىلدىق، التاي قالاسىنىڭ قاراشىلىك اۋىلدىق ەمحاناسىندا قازاق ەمشىلىك ونەرىن جالعاستى دامىتا ءتۇستى، سونداي - اق 2004 - جىلى «قازاق شيپاگەرلىك دارىمدىلىعى مەن نازاريا نەگىزى» اتتى ەڭبەگىنىڭ 1 - كىتابىن باسپادان شىعاردى.

　　«ەر ەڭبەگىمەن قادىرلى» دەگەندەي قاليبەكتىڭ قاجىرلى ەڭبەگى مەن قۇنتتى قۇلشىنىسىن كورگەن ۇيىم، ونى 2010 - جىلى ماۋسىمدا، التاي ايماعىندا قۇرىلعان قازاق شيپاگەرلىگىن زەرتتەۋ ورنىنا شاقىردى، ارادا كوپ وتپەي، التاي ايماقتىق مەديتسينا مەكتەبى ونى قازاق شيپاگەرلىگى كلاسىنا كاسىپتىك وقىتۋشىلىققا ۇسىنىس ەتتى. ول وسى مەكتەپتە وقۋشىلارعا قۇلشىنا ساباق وتۋدەن سىرت، سەنبى، جەكسەنبى كۇندەرى التاي ايماقتىق ازىق - تۇلىك، ءدارى - دارمەك ساپاسىن باقىلاپ - باسقارۋ مەكەمەسىنىڭ رۇقساتىمەن التاي قالاسىنداعى ءتۇرلى بۇيىمدار ساۋدا سارايىنىڭ الدىنان تابيعي قازاق دارىلەرىن جايما ارقىلى ساتۋعا كىرىسكەنىنە دە 3 جىلدىڭ ءجۇزى بولدى.

　　تابيعي قازاق دارىلەرىنىڭ ەرەكشەلىگى جونىندە توقتالعاندا، قاليبەك: تابيعي قازاق دارىلەرىنىڭ ەشقانداي كەرى اسەرى جوق، ءونىمى جاقسى، باعاسى ارزان، وسىلايشا ءدارى ساتۋىم حالىققا قولايلى ءارى قازاق دارىلەرىن جالپىلاستىرۋعا ءتيىمدى، - دەدى. ول ءدارى شوپتەردى مەرزىمىنە قاراي التاي، كوكتوعاي، شىڭگىل، قابا، بۋىرشىن جايلاۋىنان، ساۋىر تاۋىنان الادى ەكەن. 2014 - جىلى جازدا تارباعاتاي ايماعىنىڭ بارلىق، جايىر تاۋىنان ءدارى ءشوپ الىپ كەلىپتى. سۋرەتتەردى تۇسىرگەن ساعىنبەك رابات ۇلى («التاي گازەتى» مەكەمەسى)

　　كەلۋ قاينارى: حالىق تورابى