قوعالى كولدەگى مۇز ورنەك

(فوتو شالقىما)

سۋرەتتەرىن ءتۇسىرىپ، ماقالاسىن جازعان باقىتبەك ءجۇمادىل ۇلى

2014.12.25 15:57   كەلۋ قاينارى : حالىق تورابى

　　جەر جۇزىنە جومارتتىقپەن شۇعىلاسىن شاشاتىن ءار كۇننىڭ اق تاڭى ومىرگە ىنتىق جاندارعا ءتاتتى ءۇمىت پەن شالقار شابىت سيلايدى. ادام پەندەسى ءار كۇنگى اق تاڭنان باستاۋ الاتىن تىرلىكتىڭ تىربىڭىندا ومىردەن ءوز نەسىبەسىن الادى. ۇلىلاردىڭ ءبىرى «ادامدا ءۇمىتتىڭ بولماۋى ءومىردىڭ بولماۋىمەن بىردەي...» دەگەن ەكەن، سول ايتپاقشى، تىرلىك ساپارى وي سەزىمىندە وزىندىك ءۇمىتى بار ادامدى تاڭ سايىن تاراۋ - تاراۋ جولدارعا باستاپ ءوزىنىڭ سيىن باعىشتايدى.

　　جەلتوقسان ايى كىرىسىمەن ىلە اڭعارىندا ارت - ارتىنان جاۋعان اقشا قاردىڭ ءبىر كەزەگى باسىلا قالىپ، اشىق اسپاننىڭ شىعىس جىيەگىنەن شۇلەن شۇعىلاسىن شاشا التىن كۇن كوتەرىلگەن اق تاڭدا فوتو سۋرەتشىلىك كاسىبىمنىڭ اۋەسى مازالاپ، قىس باسىنداعى اقشا قار جاپقان دالادان بىرەر پارشا كوركەم فوتو تۋىندى تۇسىرسەم دەگەن ۇكىلى ۇمىتپەن، ىلە وزەنى بويىنداعى قوعالى كولدىڭ اق قار ايشىقتاعان كوركىن كورۋگە اسىق بولدىم.

　　«قانسوناردا بۇركىتشى شىعادى اڭعا...» دەگەندەي، ەرتەلەتىپ كول بويىنا دا كەلدىم. بيىلعى قىستىڭ اق كورپەسى قىمتاعانىنا ايدىڭ ءجۇزى بولىپ قالعان توڭىرەك وتكەن ءتۇنى جاۋعان قىرباق قارمەن جامىلشىسىن جاڭالاپ، كۇمىس تۇسكە ەنىپ، كىرشىكسىز تازارىپ كەتىپتى. كول ماڭىنداعى قارلى دالادان بۇرىن كورىپ جۇرگەن قىسقى كورىنىستەردەن وزگە ايتا قالسىن ايشىقتى ەشتەمە بايقالمايدى.

　　سول ساتتە كول بويىن جاعالاپ كەلە جاتىپ، تۇنگى قارا سۋىقتا قاتقان كول بەتىندەگى جۇقالتاڭ كوك مۇزدىڭ قارا سۋ استىنان كوتەرىلگەن جىلىلىق پەن ارايلى تاڭنىڭ اپتابىنان جۇيكەسى جۇمسارىپ، سىتىرلاي ايرىلىپ، شىتىناي باستاپ، مۇز بەتىندەگى قىرباق قاردى قاپتاعان سۋدىڭ ەرىتىپ بارا جاتقانىن بايقادىم. وسى بولىمسىز وزگەرىستىڭ قاس قاعىم ساتىندە كول بەتىندەگى كوگىلدىر اينەك سپەتتى مۇز بەن قىرباق قاردى كول سۋى بىرتىندەپ باسىپ، قارمەن مۇزدان الۋان ءتۇرلى اسەم ورنەكتەر پايدا بولا كەتتى.

　　ءيا، قىزىق، وسى ايشىقتى ورنەكتەرگە ونان ارى زەر سالساڭىز ۇلى تابيعاتتىڭ سىرلى دا سۇلۋ كوركەمدىگىنە كوزىڭىز جەتكەندەي بولاسىز. قوعالى كولدى اينالا وسى الۋان فورماداعى كوركەم ورنەكتەردى ءار جەردەن سۋرەتكە الا ءجۇرىپ، سىرلى تابيعاتتىڭ ءبىز ادەتتە بايقاي بەرمەيتىن شەكسىز كوركەمدىگىنە، ۋاقىتتىڭ شەبەر سۋرەتكەرلىگىنە قايران قالدىم.

　　كۇن كوتەرىلگەن سايىن، جىلى لەپتىڭ ۇدەۋىنە ىلەسە اينالاسى ءۇش ساعاتقا جەتپەيتىن ۋاقىتتا قوعالى كولدىڭ قارا سۋى دا بۋسانىپ، كول بەتىندەگى قابىرشاق مۇز بەن مۇز ۇستىندەگى قىرباق قارعا سۋ جايىلىپ، كول بەتى بارا - بارا ايناداي تازارا باستادى. ال وسى ارالىقتا مەن وسى سۋرەتتەردى اپارات كوزىنە ءتۇسىرىپ قالدىم.

　　كول بەتىندە قار - مۇزدان قالىپتاسقان وسى ورنەكتەردى قىس كورىنىستەرىنىڭ ەڭ ۇساق دەتالدارى دەسەك تە، وسى كورىنىستەر ادامدى شەكسىز قيال تەڭىزىنىڭ جىيەگىنە جەتەلەپ، اسەمدىككە دەگەن تالپىنىسىڭا قانات ءبىتىرىپ، سىرلى تابيعاتتىڭ سۇلۋلىعىنا ەرىكسىز سيىندىرادى. ءار ءبىر پارشا سۋرەتتەگى كورىنىس ماعان قىراۋلى قىستىڭ ءبىر قىرى شەكسىز اسەم كوركەمدىك ەكەنىن ونان ارى ۇعىندىردى.

　　اقشا قار قاپالاقتاپ جاۋىپ اشىلعان ارايلى تاڭدا تۋعان ولكەنىڭ تاۋ - دالاسىندا، ءتىپتى وسى اياداي قوعالى كولدە ءبىز كورمەگەن، ءتىپتى ويلاپ تا جەتە المايتىن قانشالاعان كوركەمدىكتەر قالىپتاسىپ، ايالسىز ۋاقىتتىڭ جىلجۋىمەن جىلىستاپ جوعالىپ جاتارىن كىم ءبىلسىن! ( سوڭى)

　　اۆتوردىڭ ءادىرىسى: ىلە حالىق راديو ىستانسياسى

　　كەلۋ قاينارى: حالىق تورابى