جۇڭگو - نارات ساحاراسىندا مەملەكەتتىك قىسقا ارالىقتاعى الامان بايگەسى وتكىزىلدى

فوتوعا تۇسىرىپ، حابارىن جازعان: ەرنۇر ماناپقان ۇلى

2015.06.17 14:19   كەلۋ قاينارى : حالىق تورابى

　　حالىق تورابى، 17 – ماۋسىم، بەيجيڭ. دۇنيەدەگى ءتورت ۇلكەن ساحارانىڭ ءبىرى بولعان نارات ساحاراسىندا، جۇڭگو – نارات ساحارا مادەنيەت مەرەكەسىنە بايلانىستى، 2015 - جىلى 6 – ايدىڭ 13-، 14- كۇندەرى كۇنەس اۋدانى نارات قالاشىعىنداعى حالقارالىق ات جارىس مايدانىندا، بۇكىل مەملەكەتتىك قىسقا ارالىقتاعى الامان بايگە جارىسى وتكىزىلدى.

　　بۇل رەتكى الامان بايگەگە مەملەكەتىمىزدەگى ەل ءىشى – سىرتىنا تانىمالى جۇزدەگەن ات بايگە كلوپتارىنان سارالانعان، 27 كاماندا وزدەرىنىڭ ءۇيسىن قان جيرەن جىلقىسىمەن انگليا تازا قاندى جىلقىسىنان قۇرام تاپقان، جۇزدەن شىققان جۇيىرىكتەرىمەن، مىڭنان شىققان تۇلپارلارىنان 105 تۇلپارىن ۇكىلەپ الىپ كەلىپ بايگەگە سالىپ، كوركەم ساحارانى تۇلپارلار تۇياعىمەن دۇبىرلەتىپ، ەل ءىشى – سىرتىنەن كەلگەن كورەرمەندەردىڭ كوز مەيىرىن قاندىردى.

　　بۇل رەتكى الامان بايگە ءۇيسىن قان جيرەن جىلقىسىن باستى تاقىرىپ ەتكەن جىلقى مادەنيەت قيمىلى بولۋمەن بىرگە، قازاق ۇلتىنىڭ باي مازمۇندى ات ءۇستى دەنە – تاربيە قيمىلىن، ساحارا مادەنيەتىن ءبىر تۇتاس تۇلعا ەتكەن، جوعارى ورەدەگى ءبىر رەتكى قيمىل بولدى.

　　وسى رەتكى قيمىل بارىسىندا كۇنەس اۋدانىنداعى ءۇيسىن قان جيرەن جىلقىسىنىڭ تاريحى مەن مادەنيەتىن، ءارى قازاق ۇلتىنىڭ ات ۇستى ونەرلەرى مەن دەنساۋلىققا زالالسىز اس - سۋ مادەنيەتىن ءبىر قىرىنان تانىتىپ، كۇنەس اۋدانىنداعى وزگەشە ەرەكشەلىككە يە قازاق ۇلتىنىڭ ۇلت مادەنيەتى مەن سالت ءداستۇرىنىڭ الۋان ءتۇرلىلىگىن كورسەتىپ، جالپى حالىقتى ورتاق قۋانشقا بولەپ، ۇلتتار ارا ىنتىماقتىلىقتى كۇشەيتتى.

　　كەلۋ قاينارى: حالىق تورابى