مەكتەپ اۋلاسىنداعى ءمانى بولەك، ءسانى ەرەك جارمەنكە

ماقالاسىن جازىپ سۋرەتتەرىن تۇسىرگەن باقىتبەك ءجۇمادىل ۇلى 

2015.12.04 16:15   كەلۋ قاينارى : حالىق تورابى

　　وقۋ - وقىتۋعا سالت - ءداستۇر تاربيەسىن ۇشتاستىرۋدىڭ قازاقتىڭ ۇلتتىق قۇندىلىقتارىن ۇرپاقتار ساناسىنا سىڭىرۋدە، جەتەلى ۇرپاق تاربيەلەۋدە رولى قانشاما ماڭىزدى دەسەڭىزشى. كۇنەس اۋدانىنداعى 5 - ورتا مەكتەپ باسشىلىق القاسىنىڭ وسى ءبىر ءتۇيىندى كوڭىلدەرىنە تۇيگەندىگىن، جۋىقتا مەكتەپ اۋلاسىندا وتكىزگەن ءمانى بولەك، سانى دە ەرەك ءبىر رەتكى جارمەڭكەدەن ايقىن اڭعارۋعا بولادى.

　　بۇل مەكتەپ مەكتەپتىڭ ۋنيۆەرسال ءامالياتتىق ساباعى رەتىندە قاراشانىڭ 28 - كۇنى مەكتەپ اۋلاسىندا وقۋشىلاردىڭ قول ونەر بۇيىمدارى مەن ۇلتتىق ونىمدەر جارمەڭكەسىن وتكىزىپ، كورەرمەندەردى تامساندىرىپ، اۋەسكەر وقۋشىلاردىڭ ونەرلەرىن ۇشتاي ءتۇستى. مۇنان دا ماڭىزدىسى، وسى رەتكى جارمەڭكە ارقىلى وقۋشىلاردىڭ دۇرىس قۇن كوزقاراسىن ورناتىپ، ەڭبەك جەمىسىن قاستەرلەۋ تانىمدارىن ءامالياتتىق قيمىل بارىسىندا ايقىنداي تۇسكەندىگى بولدى.

　　بۇل رەتكى جارمەڭكەدە وقۋشىلار ءامالياتتىق قيمىل ساباعى بارىسىندا ءوز قولدارىمەن تىككەن ويۋ - ورنەكتى قولونەر بۇيىمدارىن، اعاش تامىرىنان جاساعان مۇسىندەر مەن تۇرمىستىق بۇيىمداردى، تاسپا ءتىلىپ ورگەن ورمەلەرىن، سىزعان اسەمونەر تۋىندىلارى مەن حۇسنيحاتتارىن جايما ەتىپ جۇرتقا كورسەتىپ، قىزىققان كورەرمەندەرگە لايىقتى باعادا ساتىپ بەردى.

　　ال، ۇيلەرى مال شارۋاشىلىعىمەن شۇعىلداناتىن، اۋىل - قىستاقتان كەلىپ، جاتاقتا جاتىپ وقىپ جاتقان وقۋشىلار ۇيلەرىنەن قۇرت - ىرىمشىك، سۇزبە، سارى ماي - كىلەگەي، تارى - تالقان، قازى - قارتا سياقتى مال شارۋاشىلىق ونىمدەرىنەن اكەلىپ، قازاقى ءنارلى ازىقتاردىڭ تازا، جاسىل ءونىم ءتۇرى ەكەندىگىن، ادام دەنەسىنە قۋاتتى قۇندىلىق جاعىن ۇگىتتەپ، وسى ونىمدەردىڭ جاسالۋ، مانەرلەنۋ، ساقتاۋ ادىستەرىن وقۋشىلارعا، جارمەڭكەنى تاماشالاۋعا كەلگەن كورەرمەنگە تانىستىرىپ، قاجەتسىنەتىندەرگە ساتىپ بەردى.

　　مىنە وسى ارقىلى وقۋشىلارعا اتا - انالارىنىڭ جاپالى ەڭبەكتەرىنىڭ جەمىستەرىن قاستەرلەپ، دۇرىس قۇن كوزقاراسىن ورناتۋدى ءوز قولدارىمەن ىستەگەن ءامالياتتىق قيمىلدارى ارقىلى ۇعىنۋدىڭ ورايىن جاراتتى.

　　جارمەڭكەنى ۇيىمداستىرۋعا جاۋاپتى وقىتۋشىلار ءار گرۋپپانىڭ ونىمدەردى تانىستىرۋ، تۋىندىلاردى كورمە ەتۋ، ساتۋ سياقتى جاقتارىنا باستان - اياق جەتەكشىلىك ەتىپ، ء اربىر قيمىلدىڭ ماڭىزىن، تاربيەلىك ءمانىن بارىنشا جوعارىلاتۋعا تىرىسۋدى باستى ماقسات ەتتى.

　　كورمە اشۋ، ونىمدەردى تانىستىرۋ، زاتتاردى الارمانعا ساتۋ سياقتى ىستەر ولارعا سالت - سانا مەن ءداستۇردى تانىستىرۋ، قازاقى ونىمدەردىڭ قۇنىن ءبىلۋ، ساۋدا ىستەۋ سياقتى جاقتاردا «مىڭ ايتقاننان ءبىر كورگەنى ارتىق» قۇندى ساباق بولدى. سونىمەن قاتار، كەستە - باسپاشىلار، ويۋ - ورنەك شەبەرلەرى، اسەمونەرشىلەر، حاتكەرلەر سىندى «بەس كۇرجەككە» قاتىناسىپ جۇرگەن ونەرگە اۋەس ۇل - قىزدار مەكتەپتەگى 2 مىڭنان ارتىق وقۋشى - ۇستازدارىنىڭ الدىندا، جارمەڭكەنى تاماشالاي كەلگەن قالىڭ اتا - انالارعا ءوز ونەر تۋىندىلارىن كورسەتىپ، ءتىپتى ءوز تۋىندىلارىن ساۋدالاپ، ءماز - مەيرام بولىپ، كوڭىلدەرىن ماقتانىش كەرنەپ، اۋەستەرى ۇشتالا ءتۇستى.

　　كەلۋ قاينارى: حالىق تورابى