قۇلجا اۋدانىندا «كوكقامىردا ناۋرىز» اتتى ساۋىق كەش وتكىزىلدى

 باعداۋلەت باتىربەك ۇلى

2016.03.14 14:40   كەلۋ قاينارى : حالىق تورابى

　　قۇلجا اۋداندىق پارتكوم مەن ۇكىمەت جەتەكشىلىك ەتكەن، مازار اۋىلى ۇستىنە الىپ وتكىزگەن، مەشىن جىلىنداعى ناۋرىز مەرەكەسىن تويلاۋعا ارنالعان 2016 – جىلعى «كوكقامىردا ناۋرىز» اتىنداعى ساۋىق كەش 12 - ناۋرىز تۇستەن بۇرىن اۋداندىق مادەنيەت سارايىندا كورەرمەندەرگە سالتاناتپەن قويىلدى.

　　جاراسىمدى قوعام قۇرۋدى، ۇلتتار ىنتىماعىن جىرلاۋ، حالىق بۇقاراسىمەن ەتەنە بولۋدى، قوعام ورنىقتىلىعىن قورعاۋدى باستى تاقىرىپ ەتكەن باي مازمۇندى كونسەرتتى ءبىر ءبولىم وبلىس جانە اۋدان باسشىلارى، حالىق بۇقاراسى بولىپ، 2 مىڭعا جۋىق كورەرمەن تاماشالادى. اۋداندىق پارتكومنىڭ تۇراقتى جوراسى كەنجەبەك باكەن ۇلى الدىمەن ماڭىزدى ءسوز سويلەپ، كەلگەن قوناقتارمەن باسشىلارعا ناۋرىز قۇتتى بولسىن ايتتى. كونسەرتتى بەلگىلى اسابا، اقىن جاڭاتاي قابدىكەرىم ۇلى مەن وبلىستىق تەلەۆيزيانىڭ جۇيرىك جۇرگىزۋشىسى ريزا ءجانابىل قىزى جۇرگىزدى.

　　بۇل جولعى كونسەرتكە مەملەكەت ءىشى – سىرتىنا تانىمالى شىعىس كۇيىن زەرتتەۋشى، كومپوزيتور، دومبىراشى، ايگىلى كۇيشى بەرىك تولەپبەرگەن ۇلى دريجورلىق ەتىپ ورىنداعان توپتىق ءان مەن كۇي جانە ءوزى ناقىشىنا كەلتىرىپ توگىلدىرە ورىنداعان يگەن كۇرىشبايدىڭ كۇيى «ءومىر تولعاۋى» تىڭدارمانىن ا دەگەندە - اق ايىرىقشا اسەرگە بولەدى. ىلە پەداگوگيكا ينيستيتۋتىنىڭ مۋزيكا وقىتۋشىسى جانيا جۇماعالي قىزىنىڭ ورىنداۋىنداعى «بۇلبۇل» ءداستۇرلى ءانى، قازاقستاننىڭ قۇرمانعازى اتىنداعى مەملەكەتتىك قازاق ۇلتتىق كونسەرۆاتورياسىنىڭ ماگيسترانتى، حالىقارالىق، رەسپۋبليكالىق كونكۋرستاردىڭ لاۋرەاتى قۇلجا اۋدانىنىڭ تۇلەگى ساۋلەجان تاعزيا ۇلىنىڭ ورىنداۋىنداعى «عازيز» ءانى قۇلاقتان كىرىپ، بويدى السا، بەلگىلى ءانشى ءمارزيا الىپپەك قىزى تۋعان ولكەسىنىڭ ىستىق قۇشاعىندا تەربەتىلە، ءاپپاق اپامىزدىڭ «قۇباجاي» ءانىن شىرقاعاندا كورەرمەننىڭ شاپالاق ءۇنى تولاستامادى. اقىندار ايتىسىنا تۇسكەن قۇلجا اۋدانىنىڭ جاس، تاپقىر اقىندارى ەركەباي مەن ارزگۇلدىڭ ۇستاسا ايتىسقان وتكىر تىلدەرى مۇنداعى جۇرتتى ەلەڭدەتىپ، جەلپىندىرىپ جىبەردى. سونداي – اق، قۇلجا اۋدانىنڭ ءتول تۋما تالانتتى انشىلەرى ەلدوس ەسىمجان ۇلى، جۇباي انشىلەر نۇرتاي مەن اينۇر، باقىتبەك ءشارىپ ۇلى قاتارلى انشىلەر مەن اۋداندىق 3 – ورتا مەكتەپتەگى جەتكىنشەك ونەرپازداردىڭ تارتىمدى دا تاتىمدى اندەرى، بيلەرى كورەرمەندەردىڭ جۇرەگىنەن تەرەڭ ورىن الدى.

　　مىنە وسىنداي كورەرمەن كوڭىلىنەن شىققان نومىرلەرىمەن جالعاسىن تاپقان ساۋىق كەشتە قۇلجا اۋدانىنىڭ ەكونوميكا - مادەنيەت ىستەرىنىڭ قارىشتاپ دامىعان، حالىق تۇرمىسىنىڭ كۇن سايىن جاقسارعان جاڭاشا بەت - بەينەسىن ءار قىرىنان بەينەلەپ، ۇلتتىق ءداستۇرىمىزدى ۇلاعاتتاپ، ءار ۇلت حالقىن بەرەكەگە شاقىرىپ، بارشا جۇرتتى باياندى دامۋعا ۇندەدى.

　　كونسەرت سوڭىندا اۋداندىق پارتكومنىڭ تۇراقتى جوراسى كەنجەبەك باكەن ۇلى، اۋداندىق حالىق قۇرىلتايى تۇراقتى كوميتەتى مەڭگەرۋشىسىنىڭ ورىنباسارى جارتاي مۇقاش ۇلى ساحناعا شىعىپ، مازار اۋىلىنىڭ باسشىلارى ما شاۋفەي، اسقار جانە قاليدوللا ءادىلعازى ۇلىنىڭ قولىنداعى ناۋرىز تۋىن وسى اۋداننىڭ قاس اۋىلىنىڭ باسشىلارى مۇناجدان مەن ماقساتقا تابىس ەتىپ، كەلەسى جىلعى ناۋرىز مەرەكەسىنىڭ سالتاناتى وتۋىنە ىزگى تىلەكتەرىن ءبىلدىرىستى. سۋرەتتە: «كوكقامىردا ناۋرىز» اتتى كونسەرتتەن تۇسىرىلگەن فوتو سۋرەتتەر

　　كەلۋ قاينارى: حالىق تورابى