كادەسىنە جاراتىپ قايىڭتوزدى، مادەني بۇيىم جاساپ توپتان وزدى

2016.06.14 13:38   كەلۋ قاينارى : حالىق تورابى

　　ساعىنبەك رابات ۇلى حابارلايدى. التاي ــ شينجياڭداعى اق قايىڭ ورمانى ەڭ كوپ ءوڭىردىڭ ءبىرى، وسىندا تىرشىلىك ەتكەن حالقىمىز تىم ەرتەدە - اق قايىڭتوزدان ءتۇرلى قولونەر بۇيىمىن جاساعان، قايىڭتوز بۇيىمدارى ۇلتتىق ءتۇسى قويۋ مادەني مۇرا ەسەپتەلەدى.

　　التاي قالالىق مادەنيەت - دەنەتاربيە مەكەمەسى مەن اقپارات - باسپا ءسوز (باسپا ۇقىعى) مەكەمەسى ۇيىمداستىرعان، مادەنيەت سارايى مەن مادەني مۇرا مەكەمەسى ۇستىنە الىپ وتكىزگەن مەملەكەتتىك 11 - رەتكى مادەني مۇرا كۇنىن اتاپ ءوتۋ جانە قازاقتىڭ قايىڭتوز ونەرىنىڭ اۆتونوميالى رايون دارەجەلى ۋاكىلدىك مۇراگەرى ادىلبەك قۋانىشباي ۇلى مەن قايىڭتوزدان سۋرەت سالاتىن حالىق ونەرپازى سۇن ياننىڭ «اق قايىڭ اۋەنى» اتىنداعى قولونەر كورگىزبەسى ماۋسىمنىڭ 12 - كۇنى تۇستەن بۇرىن قالالىق مادەنيەت سارايىندا وتكىزىلدى.

　　كورگىزبەنىڭ اشىلۋ سالتىنا التاي قالاسىنىڭ ءتورت القا باسشىلارى، بەيزاتتىق مادەني مۇرانىڭ ءار دارەجەلى ۋاكىلدىك مۇراگەرى جانە اقپارات تىلشىلەرىن قامتىعان 100گە جۋىق ادام قاتىناستى. ءتىلشىنىڭ ۇعىسۋىنشا، التاي قالاسىندا جىلجىتۋعا بولمايتىن 151 ورىندا مادەني مۇرا بار بولىپ، مۇنىڭ بىرەۋى مەملەكەت دارەجەلى ءتۇيىندى قورعالاتىن، جەتەۋى اۆتونوميالى رايون دارەجەلى قورعالاتىن مادەني مۇرا بولسا، 12سى اۋدان دارەجەلى قورعالاتىن مادەني مۇرا ەكەن.

　　اتاسى قاباتايدىڭ ونەرىنە ءتانتى بولىپ وسكەن ادىلبەك ەسەيە كەلە اتاسىنىڭ قايىڭتوزشىلىق ونەرىنە مۇراگەر بولىپ، قايىڭتوزدان قولونەر بۇيىمىن جاساۋدى كەمەلدەندىرىپ، بارىنشا بايىتا ءتۇستى. ادىكەڭنىڭ قايىڭتوزدان جاساعان سابا، كەلى-كەلساپ، تورسىق، شەلەك، ءماسى، ەر توقىم، قول سومكا، اينا، ساۋكەلە، شوڭكە، قالپاق، تاباق، جەل كورىگى، ىدىس - اياقتارى مەن كورىنىستىك اشەكەي بۇيىمدارى كورگىزبەنى تاماشالاعان جۇرتتىڭ جاقسى باعاسىنا يە بولدى. وسى رەتكى كورگىزبەگە ادىلبەكتىڭ 60تان استام تۋىندىسى مەن سۇن ياننىڭ 50 تۋىندىسى قويىلدى. ەندى ءتىلشىنىڭ وسى كورگىزبەدەن تۇسىرگەن لەزدىك قيمالارىن تاماشالاڭىزدار.

　　كەلۋ قاينارى: حالىق تورابى