ىلە وبلىستىق ٵن –ءبي ۇيىرمەسى بەيجيڭدە ارالاپ ويىن قويدى

2016.11.14 14:25   كەلۋ قاينارى : حالىق تورابى

　　ٵر قانداي ۇلتتىڭ تامىرىن تەرەڭگە تارتقان تاريحى مەن مادەنيەتى سول ۇلتتىڭ ۇلتتىق بولىمىسىنىڭ ايقىن بەلگىسى. جۋىق جىلداردان بەرى ەلىمىزدىڭ ابزال ساياساتىنىڭ ارقاسىندا توقتاۋسىز تاريح كوشىمەن بۇگىنگە جەتكەن ۇلتتىق بولىمىسىمىزدى ۇلاعاتتاپ، مادەنيەتىمىزدىڭ مايەگىن كەلەر ۇرپاققا قاز – قالپىندا جەتكىزۋ، ۇلتىمىزدىڭ قازىنالى رۋحاني بايلىعىن وزگە ۇلتتارعا تانىستىرۋ ماقساتىندا كوپتەگەن يگىلىكتى جۇمىستار ىستەلدى. سونداي يگىلىكتى شارۋانىڭ ءبىرى ــ ورتالىق مۋزيكا ينستيتۋتى باس بولىپ وتكىزگەن جۇڭگو ۇلتتارىنىڭ حالىقتىق مۋزيكا اپتالىعى ەدى.

　　ورتالىق مۋزيكا ينستيتۋتى باس بولىپ وتكىزگەن جۇڭگو ۇلتتارىنىڭ حالىقتىق مۋزيكا اپتالىعى 11 – قاراشادان 13 – قاراشاعا دەيىن بەيجيڭدە وتكىزىلدى. ەلىمىزدەگى ٵر ۇلت حالقىنىڭ ۇلتتىق مۋزيكاسىن تانىستىرىپ، ٵر ۇلت حالقىنىڭ ۇلتتىق كوركەمونەرىن دامىتۋدى باستى ماقسات ەتكەن بۇل قيمىلعا ىلە وبلىستىق ٵن – ءبي ۇيىرمەسىنىڭ ونەرپازدارى ارنايى شاقىرۋمەن كەلىپ قازاقتىڭ ۇلتتىق اسپاپتارىن تانىستىرىپ، قازاقتىڭ ٵن – كۇيىن بەيجيڭنىڭ اسپانىندا قالىقتاتتى.

　　ىلە قازاق اۆتونوميالى وبلىسىنان ارنايى كەلگەن ٵن –ءبي ۇيىرمەسى اتالعان قيمىل بايلانىسىمەن بەيجيڭدەگى مەملەكەتتىك تەاترحانادا، سونداي – اق ورتالىق ۇلتتار ۋنيۆەرسيتەتى، بەيجيڭ پەداگوگيكالىق ۋنيۆەرسيتەتى قاتارلى بەيجيڭدەگى قۇزىرلى ءبىلىم وردالارىندا كوركەمونەر ويىندارىن قويدى. دومبىرا، قوبىز، ادىرنا قاتارلى ۇلتتىق اسپاپتارىمىزدى، سوعان بايلانىستى شەرتىلەتىن كۇي تاريحىن الدىمەن كورەرمەن قاۋىمعا جەكە – جەكە حانزۋ تىلىندە تانىستىرعاندىقتان، بەيجيڭدەگى ٵر ۇلت حالقىنىڭ قازاقتىڭ ۇلتتىق مۋزيكا اسپاپتارىنا بولعان تۇسىنىگى تەرەڭدەپ، قۇرمەتى ارتتى. مۇنان سىرت، بەيجيڭدە قىزمەت ىستەيتىن قازاق زيالىلار مەن بەيجيڭدە ءبىلىم الىپ جاتقان قازاقتىڭ ۇل – قىزدارى دا ارنايى كەلىپ كونسەرتتى تاماشالادى.

　　مۋزيكا كەشىندە مەملەكەتتىك ءبىرىنشى دارەجەلى ورىنداۋشى قۇرمانجان زىكىريا ۇلى، مەملەكەتتىك ەكىنشى دارەجەلى كومپوزيتور مەيرام اكىمحان ۇلى، مەملەكەتتىك ەكىنشى دارەجەلى ٵنشى ماناپقازى مۋساحان ۇلى، مەملەكەتتىك ەكىنشى دارەجەلى ورىنداۋشى، دومبىراشى ۇران اقاتاي ۇلى قاتارلى حالقىمىزدىڭ ۇلتتىق ٵن – كۇيىنە مۇراگەرلىك ەتۋ جانە ونى دامىتۋ ءۇشىن ەلەۋلى ەڭبەك سىڭىرگەن ونەرپازدار ساحىنا سالتاناتىن اسىرسا، «ات تۇياعىن تاي باسار» دەگەندەيىن الىنداعى اعالارىنىڭ جولىن قۋىپ قاتارلارىنا جاڭادان قوسىلعان جاستار قاۋىمىنىڭ جاستىقتىڭ جالىنى ويناعان ورىنداۋ شەبەرلىگىدە كورەرمەندەردى تاڭداي قاقتىردى. (تومەندەگى سۋرەتتەر ٵن –ءبي ۇيىرمەسىنىڭ ورتالىق ۇلتتار ۋنيۆەرسيتەتىندە قويعان مۋزيكا ساۋىق كەشىنەن تۇسىرىلگەن)

　　كەلۋ قاينارى: حالىق تورابى