ايدىنداعى اسەم ءبي

ماقالاسىن جازىپ، سۋرەتتەرىن تۇسىرگەن باقىتبەك ءجۇمادىل ۇلى

2017.02.16 14:13   كەلۋ قاينارى : حالىق تورابى

　　ايدىن كولدىڭ ارۋى دەپ سۋرەتتەلەتىن اققۋ، سۇلۋ سىمباتمەن دە، سىرلى تابيعاتىمەن دە قۇس اتاۋلىنىڭ قاستەرلىسى. ول باسقا قۇس شىعا المايتىن بيىكتە سامعاپ، كوك ءجۇزىن نايزاعايداي ءتىلىپ، زەڭگىر كوكتەگى قاقاعان سۋىققا ءتوزىپ، دۇلەي داۋىلمەن الىسىپ العا تارتىپ، قۇرلىقتاردى اتتاپ ءوتىپ، جاراتىلىسىنداعى وزگەشە تالعامىمەن ماۋسىمدار بويىنشا مەكەن الماستىرىپ، سەرى تىرلىك كورەدى ەكەن.

　　وسى قايسار قاناتتى تىرلىك يەسىنىڭ نازىك سەزىم تابيعاتىنا كوڭىل اۋدارار بولساق، ونىڭ شىنايى ۇلىلىعىن سەزىپ، وعان قۇرمەت ەتىپ، دارا قاسيەتىنە سۇيىنبەي تۇرا المايسىڭ. اققۋدىڭ ايرىقشا ەرەكشەلىكتەرى ءمالىم بولعاندىقتان، اتام زاماننان بەرى حالقىمىز ونى توتەم تۇتىپ، ەرەكشە قاستەرلەگەن. ويتكەنى، اققۋ ءارقاشان ەكىدەن جۇپتاسىپ جۇرەدى. ەگەردە قاپەلىمدە جۇبىنان ايىرىلىپ قالسا، سىڭار اققۋ زار يلەپ جوقتاۋ ايتقانداي جىل بويى سۇڭقىلداپ، سىڭارىن ىزدەپ، سودان باستاپ جالعىز وتەدى ەكەن. مىنە بۇل، ۇزاق تاريحتان بىزگە جەتكەن اۋىز ادەبيەتىمىزدەگى عاشىقتىق داستانداردا، ولەڭ- جىرلاردا، اققۋ وبرازى كورنەكتى سومدالىپ، پاك ماحابباتتىڭ، ادالدىقتىڭ، سۇلۋلىقتىڭ سيمۆولىنا بالاپ، قاسيەتتى بەينەدە بەرلىپ كەلگەن ەل نازارىنداعى «كيەسى».

　　ولاي بولسا، ىلە وزەنى بويىن مەكەندەگەن اققۋلاردىڭ كول بەتىندە جىلجىعان كەرىم تۇلعاسىمەن ولاردىڭ مۇز ۇستىندە بالەت ءبيىن بيلەپ بارا جاتقان كونكي تاققان ارۋداي قۇبىلعان اسەم قيمىلىنان تۇسىرىلگەن مىنا ءبىر توپ فوتو سۋرەتكە نازار سالساڭىز، ايدىندا قالىقتاعان ارۋدىڭ قاس سۇلۋ سىمباتىن، تەكتى تابيعاتىن اڭعارۋ قيىن ەمەس.

　　قاتىستى جالعانىم: جۋىق جىلداردان بەرى ەكولوگيالىق ورتانى قورعاۋدىڭ جاقسارۋىنا ىلەسىپ، شينجياڭداعى بايىنبۇلاق اققۋ تابيعي قورىق رايونىنان باسقا دا جەر-جەردە اققۋ كەلىپ قىستاپ قايتاتىن، قىسقا ۋاقىت ايالداپ مەكەندەيتىن، وڭىرلەر بىرتىندەپ كوبەيىپ كەلەدى.

　　وسى قاتاردا ءار جىلى قاراشانىڭ باسىنان كەلەسى جىلى اقپاننىڭ سوڭىنا دەيىن قۇلجا اۋدانى جاڭاتام اۋىلىنىڭ ىلە وزەنى بويىنداعى شاعىلىق دەگەن قىستاقتاعى قاراسۋ كولىنە كەلەتىن اققۋدىڭ سانى بىرتىندەپ كوبەيىپ، 200 گە تايادى. قازىر بۇل جەردى قۇلجا اۋدانى «اققۋدى قورعاۋ رايونى» ەتىپ بەلگىلەپ، قورعاۋ، ساياحاتشىلاردى باسقارۋعا ارناۋلى ادام جاۋاپتاندىرىپ، قىس مەزگىلىندە اققۋلارعا جەم شاشىپ بەرەدى ەكەن. ءسويتىپ بۇل جەر اققۋلى كول، گاككۋلى كول بولىپ ساياحاتشىلاردى باۋراپ وتىر. سونىمەن بىرگە بۇل ارا فوتو اۋەسكەرلەرىنىڭ ءار دايىم ات باسىن بۇرىپ، اققۋدى تاقىرىپ ەتكەن جەلىلەس تۋىندىلاردى جاراتۋىنا ءتيىمدى وراي بەردى. سايتتاردا جاريالانعان كوپتەگەن اۆتورلاردىڭ تۋىندىلارى كولدەگى اققۋدىڭ الۋان قيمىلدارىمەن تىرلىك تىنىسىنان ءوز الىنشە، ءار ءتۇرلى ورەدە ءتۇسىرىلىپ، وقىرمانداردىڭ كوز مەيىرىن قاندىرىپ كەلەدى.

　　بۇگىن ءبىز جاريالاپ وتىرعان «ايدىنداعى اسەم ءبي» دەگەن مىنا جەلىلەس تۋىندىدا اۆتور اققۋلاردىڭ بەيعام، تىنىش، تىنىستى ورتادا ەكى-ەكىدەن جۇپتاسىپ، سىڭارىنا ىنكارلىق باعىش ەتە ءوبىسىپ، كول بەتىندە بالەت ءبيىن بيلەپ جۇرگەندەي رومانتيكالى، وبرازدى قيمىلىن ءار قىرىنان بايقاپ، كەلىستى ارەكەتتەرىن قاس-قاعىمدا ءداپ باسىپ كارتيناعا تۇسىرگەن. وسى ءبىر گرۋپپا تۇرعىسى مەن نۇردان پايدالانۋى تاماشا، رەڭدىك بوياۋى كوز تارتقان فوتو تۋىندىلار سەزىمىڭىزدى ەرىكسىز قىدىقتاپ، ويىڭىزدى شەكسىز قيال الەمىنە شارىقتاتادى.

　　ەسكەرتۋ: تۋىندىنىڭ اۆتورلىق ۇقىعى قورعالادى. سۋرەتتەردى كوشىرىپ ىستەتۋ، نەمەسە باسقاداي جولدا پايدالانۋ تۋرا كەلسە اۆتورمەن بايلانىس جاساڭىز، اۆتوردىڭ رۇحساتىن الماعانداردىڭ زاڭدىق جاۋاپكەرشىلىگى قۋزاستىرىلادى. باقىتبەك ءجۇمادىل ۇلى جۇڭگو فوتو سۋرەتشىلەر قوعامىنىڭ مۇشەسى، جۇڭگو فوتو سۋرەت كوركومونەرشىلەر قوعامىنىڭ جوراسى، شينجياڭ فوتو سۋرەتشىلەر قوعامى ءتوراعاسىنىڭ ورىنباسارى.

　　كەلۋ قاينارى: حالىق تورابى