قاناستاعى تاڭ سازى

ماقالاسىن جازىپ، سۋرەتتەرىن تۇسىرگەن باقىتبەك ءجۇمادىل ۇلى

2018.09.04 15:49   كەلۋ قاينارى : حالىق تورابى

　　كوركەم كورىنىسى كوز سۇرىندىرەتىن، جەر ۇيىعىنداي قۇتتى مەكەن قاناس قازىر الەمگە اتى ايگىلى ساياحات كورىنىس رايونى ەكەنى بارشاعا ايان. قاناستىڭ اتى كوك ءمولدىر سۋلى كولىمەن، ونان سوڭ، كوكوراي تاۋلى ورمانىمەن ايگىلى.


　　نۋ ورمان، ءمولدىر سۋلى، قارلى شىڭدى تاۋ باۋرايىن اتام زاماننان مەكەن ەتىپ، كوك ءشوپتى جۇلما، جاس بۇتاقتى سىندىرما، سۋعا سيمە دەگەندى اتادان بالاعا ۇلاعاتتى ءتالىم ەتىپ، مالى مەن جانىنا راحاتتى تىنىس، تىرلىگىنە ىرىس باعىشتاعان ءوزى جاساعان ورتاسىن قورعاپ، ۇلى تابيعاتتى سۋى تۇنىق، تاۋى جاسىل، اۋاسى تازا كۇيىندە ساقتاپ پايدالانۋدى ۇرپاق ساناسىنا ءسىڭىرىپ كەلگەن قازاق حالقى ءۇشىن قاناستىڭ تاۋ - تاسى تانىس، نۋ ورمانىنا بەس ساۋساعىنداي قانىق بولعانىمەن، بۇگىنگى زىمىران زاماندا، ساياحات شارۋاشىلىعىنىڭ دابىراسىمەن وسى ءوڭىر سىرت جەردەگىلەرگە ءتىلسىم دە سىرلى مەكەن سەزىلۋدە. سوندىقتان دا، عاسىرلار بويى مالشى قازاققا مەكەن بولىپ، جىم - جىرت جاتقان سۇلۋ قاناس كولى جۇمىر جەردىڭ تۇكپىر - تۇكپىرىنەن قۇلاعى ەستىپ، اياعى جەتكەن ساياحاتشىلاردى ماگنيتتەي تارتىپ، كورە قالعاندى كوركىمەن ارباپ، ءوز قويناۋىنا شاقىرىپ جاتىر. اياق باسقانداردىڭ قاتارى مولايعان سايىن اتاعى اسپانداپ، ءبىر كورۋدى ارماندايتىندار مولايۋدا. مىنە وسىلاي قاناستىڭ ات - اتاعى التىنعا اينالىپ، حالقىنا تاۋ سۋىنداي تاۋسىلماس ىرىسىن باعىشتاپ وتىر.


　　ايتىپ ايتپاي قاناسقا كەلگەندەر ەڭ اۋەلى كوك ءمولدىر كولدى كورىپ كوز ايىم بولادى، تازا اۋادان تىنىستاپ كوكىرەگى كەڭي تۇسەدى، نۋ ورماننىڭ ءشايىرى اڭقىعان جۇپار يىسىنەن ءلاززاتتانىپ، جادىراپ قالادى. قاناستاي كيەلى مەكەننىڭ مىنە وسى قۇدىرەتى بولماسا، تاۋ مەن سۋ دۇنيەدە بارشىلىق قوي دەپ ويلايسىڭ، ونان ۇلى تاۋ قويناۋىنا وسىنشاما سيقىرلى دا قۇدىرەتتى شىراي سيلاعان، وسى وڭىردەگى شارباتتاي تۇنىق تاۋ سۋىنىڭ شاراپاتى قانشالىق ەكەنىن سەزگەندەي بولاسىڭ.


　　ءيا، قۇرمەتتى وقىرمان، ايتا كەتەتىن تاعى ءبىر ەسكەرتپەمىز «قونىپ قال قاناسىما» دەگەن ءان سوزىندە ايتىلعانداي، ەگەر سىزگە قاناسقا قونىپ قالۋ ءناسىپ بولىپ جاتسا، تاڭعى ءتاتتى ۇيقىنى قيىپ، تاۋ اراسىنا قىردان اسىپ سىعالاي تۇسەتىن كۇن ساۋلەسى مەن بىرگە قاناس كورىنىس ءوڭىرىنىڭ باس - اياعىن قىدىرىپ، قاناستىڭ تاڭعى سازىن تاماشالاڭىز. كوركەمدىككە قۇمارتۋ — ادام بالاسىنىڭ ورتاق قاسيەتى، الايدا سەزىم كۇيى اركىمدە ءار باسقا بولارى قاح. ەندەشە، شىلدە ايىنىڭ ورتا شەنىندەگى ءبىر اشىق كۇنى تاڭەرتەڭ قاناس كولى ماڭىنان اپپارات كوزىنە ىلىكتىرگەن مىنا فوتو سۋرەتتەردەگى تاڭعى كورىنىستەر سىزگە قانداي سەزىم باعىشتارىن كىم ءبىلسىن. ول جاعى ءسىزدىڭ سۋرەتتەر سويلەپ تۇرعان كەرىم تابيعاتتىڭ ءتىلىن بىلۋىڭىزبەن، تاڭ سازىنىڭ سيمفونياسىن ەستي العان – الماعانىڭىزبەن بايلانىستى ەكەنىن كەسىپ ايتا الامىز!!


　　كەلۋ قاينارى: حالىق تورابى