جۇڭگونىڭ قازاقستانداعى ەلشىحاناسى جۇڭگو حالىق ازاتتىق ارمياسى قۇرىلۋ مەرەكەسىن تويلادى

2019.07.31 14:33   كەلۋ قاينارى : حالىق تورابى

　　حالىق تورابى، 7 – ايدىڭ 31 – كۇنى، بەيجيڭ. حالىق تورابىنىڭ 7 – ايدىڭ 30 – كۇنى نۇر - سۇلتاننان بەرگەن حابارى، جۇڭگونىڭ قازاقستاندا تۇراتىن ەلشىحاناسى 7 – ايدىڭ 29 – كۇنى قازاقستاننىڭ استاناسى نۇر – سۇلتاندا جۇڭگو حالىق ازاتتىق ارمياسى قۇرىلعاندىعىنىڭ 92 جىلدىعىن قۇتتىقتاۋ جينالىسىن وتكىزدى. جۇڭگونىڭ قازاقستاندا تۇراتىن ەلشىسى جاڭ شياۋ، مەملەكەت قورعانىسى اسكەري ءمانساپتىسى حۋاڭ تيانچاڭ اعا پولكوۆنيك، قازاقستان مەملەكەت قورعانىس مينيسترىنىڭ ورىنباسارى داندىبايەۆ گەنارال - مايور، حاۋىپسىزدىك كوميتەتى مەڭگەرۋشىسىنىڭ ورىنباسارى بيجانەۆ گەنارال - لەيتەنانت قاتارلى ۇكىمەت پەن ارميانىڭ ءمانساپتىلارى قاتىناستى، ٵرقايسى ەلدىڭ قازاقستاندا تۇراتىن ەلشىحانالارىنان، سونداي – اق جۇڭگولىق چياۋمين مەن جۇڭگولىقتاردان جيىنى 400گە جۋىق ادام جينالىسقا قاتىناستى.

　　اعا پولكوۆنيك حۋاڭ تيانچاڭ ارناۋ سوزىندە الدىمەن ارميامىزدىڭ شۇعىلالى تاريحى مەن وشپەس ەڭبەگىن ەسكە الدى. ول مىنالاردى اتاپ كورسەتتى: جۇڭگو حالىق ازاتتىق ارمياسى مەملەكەتتىڭ يەلىك ۇقىعى مەن تەرريتوريا تۇتاستىعىن قورعاۋ، مەملەكەتتىڭ حاۋىپسىزدىگىن جانە دامۋ مۇددەسىن قامتاماسىزداندىرۋ سياقتى سالالاردا ۇزدىكسىز تىڭ ۇلەس قوستى، جۇڭگو ارمياسى حالىقارالىق حاۋىپسىزدىك پەن دۇنيە ءجۇزى بەيبىتشىلىگىن قورعاۋداعى ماڭىزدى كۇش.

　　حۋاڭ تيانچاڭ مىنالاردى اتاپ كورسەتتى: جۇڭگو مەن قازاقستان ارمياسىنىڭ جوعارى جىكتەگىلەرىنىڭ ءوزارا ساپاردا بولۋى، اسكەري ىستەر تاربيەسى، وفيتسەرلەردى تاربيەلەۋ، بىرلەسىپ جاتتىعۋ، اسكەري ىستەر تەحنيكاسى سياقتى سالالارداعى سەلبەستىگى اسا ناتيجەلى بولدى، ەكى ەل باسشىلارىنىڭ ءمان بەرۋى مەن قامقورلىعىندا ەكى جاقتىڭ دوستىق اسكەري ىستەر سەلبەستىگىنىڭ ۇزدىكسىز داميتىندىعىنا، ءارى بەلسەندى، كەلەلى تابىستارعا قول جەتكىزەتىندىگىنە كامىل سەنەمىن.

　　داندىبايەۆ قازاقستان ارمياسى اتىنان جۇڭگو حالىق ازاتتىق ارمياسى قۇرىلعاندىعىنىڭ 92 جىلدىعىن قۇتتىقتادى ءارى بىلاي دەدى: جۇڭگو حالىق ازاتتىق ارمياسى جاڭا جۇڭگونىڭ قۇرىلۋىندا شەشۋشى رول اتقاردى، ارميا قۇرۋ مەرەكەسى قۇربانداردى ساعىنا ەسكە الىپ، داڭقتى اسكەري ءداستۇردى جالعاستىرۋدىڭ ناقتى بەينەسى. ەكى ارميانىڭ تىعىز دوستىق، سەلبەستىك قاتىناسىن كۇشەيتۋ وڭىرلىك حاۋىپسىزدىكتى بەكەمدەۋگە، بەيبىتشىلىك پەن ورنىقتىلىقتى قورعاۋعا پايدالى، ەكى ەلدىڭ گۇلدەنۋىن جەبەۋدە بەلسەندى رول اتقارادى.

　　كەلۋ قاينارى: حالىق تورابى