14 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى ەكىنشى جالپى جيىنىن وتكىزدى
شي جينپيڭ، لي چياڭ، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار قاتىناستى
جاۋ لىجي مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى
2024.03.09 18:00 كەلۋ قاينارى : حالىق تورابى
 |
3 – ايدىڭ 8 – كۇنى 14 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى بەيجيڭدەگى حالىق سارايىندا ەكىنشى جالپى جيىنىن وتكىزدى. مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن كوميتەت باستىعى جاۋ لىجي ماجىلىستە مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى.
سۋرەتتى شينحۋا اگەنتتىگىنىڭ ءتىلشىسى ۋاڭ يە تۇسىرگەن
|
ەڭ جوعارى حالىق سوتى مەكەمەسىنىڭ قىزمەت بايانداماسى جانە ەڭ جوعارى حالىق پروكۋراتۋراسىنىڭ قىزمەت بايانداماسى تىڭدالدى جانە قارالدى
شينحۋا اگەنتتىگى، 3 – ايدىڭ 8 – كۇنى، بەيجيڭ. 14 - كەزەكتى مەملەكەتتىك حالىق قۇرىلتايىنىڭ 2 - ءماجىلىسى 3 – ايدىڭ 8 – كۇنى تۇستەن بۇرىن بەيجيڭدەگى حالىق سارايىندا ەكىنشى جالپى جيىنىن وتكىزىپ، مەملەكەتتىك حالىق قۇرىلتايى تۇراقتى كوميتەتىنىڭ قىزمەت بايانداماسىن جانە ەڭ جوعارى حالىق سوتى مەكەمەسىنىڭ قىزمەت بايانداماسىن، ەڭ جوعارى حالىق پروكۋراتۋراسىنىڭ قىزمەت بايانداماسىن تىڭدادى جانە قارادى.
شي جينپيڭ، لي چياڭ، ۋاڭ حۋنيڭ، ساي چي، ديڭ شۋەشياڭ، لي شي، حان جىڭ قاتارلىلار ماجىلىسكە قاتىناستى.
مەملەكەتتىك حالىق قۇرىلتايى تۇراقتى كوميتەتىنىڭ تاپسىرۋىمەن كوميتەت باستىعى جاۋ لىجي ماجىلىستە مەملەكەتتىك حالىق قۇرىلتايى تۇراقتى كوميتەتىنىڭ قىزمەتىنەن بايانداما جاسادى. جاۋ لىجي بايانداماسىندا بىلاي دەپ اتاپ كورسەتتى: 2023 - جىل − پارتيا 20 - قۇرىلتايىنىڭ رۋحىن جاپپاي دايەكتىلەندىرۋدىڭ باستاما جىلى، 14 - كەزەكتى مەملەكەتتىك حالىق قۇرىلتايى تۇراقتى كوميتەتى مىندەتىن زاڭ بويىنشا اتقارعان ءبىرىنشى جىل. مەملەكەتتىك حالىق قۇرىلتايى تۇراقتى كوميتەتى پارتيا 20 - قۇرىلتايىنىڭ رۋحىن جاپپاي ۇيرەنىپ، دايەكتىلەندىرىپ، جاڭا ءداۋىردىڭ جاڭا جورىعى حالىق قۇرىلتايىنا جۇكتەگەن بورىش پەن مىندەتتى دۇرىس يگەرىپ، دامۋدىڭ جالپى اۋقىمى مەن ءداۋىردىڭ تالابىنا ىرىقتىلىقپەن سايكەسىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، حالىق قۇرىلتايى قىزمەتىنىڭ ۇلكەن بەتالىسىنان، ۇلكەن پرينسيبىنەن، ۇلكەن قاعيداسىنان جازباي، ورنىقتىلىق بارىسىندا ىلگەرىلەۋ ارقىلى حالىق قۇرىلتايى قىزمەتىنىڭ ساپالى دامۋىن ىلگەرىلەتتى.
جاۋ لىجي بايانداماسىندا بىلاي دەپ اتاپ كورسەتتى: ءبىر جىلدان بەرى شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، مەملەكەتتىك حالىق قۇرىلتايى تۇراقتى كوميتەتى ورتالىقتىڭ حالىق قۇرىلتايى قىزمەتى ءماجىلىسىنىڭ رۋحىن ىشكەرىلەي دايەكتىلەندىرىپ، تياناقتاندىرىپ، پارتيا باسشىلىعىنىڭ، حالىقتىڭ وزىنە - ءوزى قوجايىن بولۋىنىڭ، مەملەكەتتى زاڭمەن جونگە سالۋدىڭ ورگانيكالى بىرلىگىندە تاباندى بولىپ، نەگىزگى زاڭ مەن زاڭداردا جۇكتەلگەن قىزمەت جاۋاپكەرلىگىن مۇقيات اتقارىپ، حالىق قۇرىلتايى قىزمەتىندە تىڭ ىلگەرىلەۋشىلىككە، تىڭ ناتيجەگە قول جەتكىزۋدى ىلگەرىلەتىپ، تاماشا باستامانى جۇزەگە اسىردى. ءبىرىنشى، نەگىزگى زاڭ رۋحىن ساۋلەلەندىرىپ، نەگىزگى زاڭدا بەلگىلەنگەن بورىشىن اتقارىپ، نەگىزگى زاڭدى اتقارۋ جانە نەگىزگى زاڭنىڭ اتقارىلۋىن باقىلاۋ ورەسىن جوعارىلاتتى. نەگىزگى زاڭنىڭ اتقارىلۋىنا كەپىلدىك ەتەتىن زاڭ - تۇزىمدەردى اقاۋسىزداندىرىپ، وتانشىلدىق تاربيە زاڭىن جاساپ، مەملەكەتتىك كەڭەستىڭ ۇيىمدىق زاڭىنا وزگەرىس ەنگىزۋ جوباسىن ەكى رەت قارادى ءارى وسى رەتكى ءماجىلىستىڭ قاراۋىنا ۇسىنۋدى ۇيعاردى. ەكىنشى، زاڭ شىعارۋ ساپاسىن جوعارىلاتۋ سىندى تەتىكتى مىقتى يگەرىپ، جۇڭگوشا سوتسياليستىك زاڭ جۇيەسىنىڭ اناعۇرلىم عىلمي، كەمەلدى، بىرلىككە كەلگەن، بەدەلدى بولۋىن ىلگەرىلەتتى. ءبىر جىلدان بەرى جيىنى 34 زاڭ جوباسى قارالدى، مۇنىڭ ىشىندە 21 زاڭ ماقۇلداندى، بۇل 6 زاڭ جاساۋ، 8 زاڭعا وزگەرىس ەنگىزۋ، زاڭ ماسەلەسى مەن كەلەلى ماسەلەلەرگە قاتىستى 7 قاۋلىنى شىعارۋدى قامتيدى. ءۇشىنشى، نەگىزگى زاڭ مەن زاڭداردا حالىق قۇرىلتايىنا بەرىلگەن باقىلاۋ ۇقىعىنان ويداعىداي پايدالانىپ، باقىلاۋ قىزمەتىنىڭ باعىتتامالىلىعىن، ونىمدىلىگىن كۇشەيتتى. مەملەكەتتىك كەڭەستىڭ، ەڭ جوعارى حالىق سوتى مەكەمەسىنىڭ، ەڭ جوعارى حالىق پروكۋراتۋراسىنىڭ 22 بايانداماسىن تىڭدادى جانە قارادى، 5 زاڭنىڭ اتقارىلۋ جاعدايىن تەكسەردى، 2 رەت ارناۋلى تاقىرىپتا پىكىر الۋعا، 7 رەت ارناۋلى تاقىرىپتا تەكسەرۋ - زەرتتەۋ جۇرگىزۋگە ۇيىمداستىرىپ، 2 قاۋلى شىعاردى. بۇقارادان كەلگەن 157 مىڭ 212 پارشا (رەت) ارىز - ارماندى زاڭ بويىنشا ءبىر جاقتى ەتتى. ءتورتىنشى، حالىق قۇرىلتايى ۋاكىلدەرىنىڭ قىزمەت قابىلەتى قۇرىلىسىن كۇشەيتىپ، ۋاكىلدەردىڭ مىندەتىن زاڭ بويىنشا اناعۇرلىم ويداعىداي وتەۋىن قولدادى جانە قامتاماسىزداندىردى. ۋاكىلدەر قىزمەتى كوميتەتىن قۇرۋدى وراي ەتىپ، تۇراقتى كوميتەتتىڭ ۋاكىلدەرمەن بايلانىس جاساۋىن، ۋاكىلدەردىڭ حالىق بۇقاراسىمەن بايلانىس جاساۋىن كۇشەيتۋدى تۇتقا ەتىپ، ۋاكىلدەر قىزمەتىن تەرەڭدەتتى جانە كەڭەيتتى. بەسىنشى، مەملەكەتتىڭ جالپى تۇلعالىق ديپلوماتياسىنا بويسۇنىپ، قىزمەت وتەپ، حالىق قۇرىلتايىنىڭ شەتەلدەرمەن بارىس - كەلىسىن بەلسەنە ورىستەتتى. التىنشى، ”ءتورت ورگاننىڭ“ ورنى مەن تالابىنا ساي، تۇراقتى كوميتەتتىڭ وزىندىك قۇرىلىسىن جاپپاي كۇشەيتتى.
باياندامادا جاۋ لىجي بىلاي دەپ اتاپ كورسەتتى: ءبىز قىزمەتتە ءالى دە كەيبىر پارىقتار مەن جەتەرسىزدىكتەردىڭ ءومىر ءسۇرىپ وتىرعانىن سەرگەكتىكپەن تانىپ، ۋاكىلدەر مەن ءار جاقتىڭ ۇسىنىس - پىكىرلەرىن كىشپەيىلدىكپەن تىڭداپ، حالىقتىڭ باقىلاۋىن سانالىلىقپەن قابىلداپ، قىزمەتتى ۇزدىكسىز كۇشەيتەمىز جانە جاقسارتامىز.
باياندامادا جاۋ لىجي بىلاي دەپ اتاپ كورسەتتى: 2024 - جىل − جۇڭحۋا حالىق رەسپۋبليكاسى قۇرىلعانىنىڭ 75 جىلدىعى، ”14 - بەسجىلدىق“ جوبانىڭ نىسانا - مىندەتتەرىن جۇزەگە اسىرۋداعى شەشۋشى ءبىر جىل ءارى مەملەكەتتىك حالىق قۇرىلتايى قۇرىلعانىنىڭ 70 جىلدىعى. مەملەكەتتىك حالىق قۇرىلتايى تۇراقتى كوميتەتى شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، شي جينپيڭ زاڭمەن جونگە سالۋ يدەياسىن، باس شۋجي شي جينپيڭنىڭ حالىق قۇرىلتايى تۇزىمىندە تاباندى بولۋ جانە ونى كەمەلدەندىرۋ جونىندەگى ماڭىزدى يدەياسىن ىشكەرىلەي ۇيرەنىپ، دايەكتىلەندىرىپ، جالپى بارىستىق حالىق دەموكراتياسىن دامىتىپ، نەگىزگى زاڭ مەن زاڭداردا بەرىلگەن زاڭ شىعارۋ ۇقىعىن، باقىلاۋ ۇقىعىن، شەشىم جاساۋ ۇقىعىن، مىندەتكە تاعايىنداۋ، مىندەتىنەن قالدىرۋ ۇقىعىن مۇقيات جۇرگىزىپ، ورنىقتىلىق بارىسىندا ىلگەرىلەۋ ارقىلى حالىق قۇرىلتايى قىزمەتىنىڭ ساپالى دامۋىن ىلگەرىلەتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدى زاڭمەن جونگە سالۋ جاعىنان قامتاماسىز ەتۋ كەرەك.
جاۋ لىجي باياندامادا بۇدان بىلايعى ءبىر جىلداعى مىندەتتەر جونىندە ورنالاستىرۋ جاسادى: نەگىزگى زاڭدى اتقارۋدى جانە نەگىزگى زاڭنىڭ اتقارىلۋىن باقىلاۋدى كۇشەيتۋ؛ جۇڭگوشا سوتسياليستىك زاڭ جۇيەسىن كەمەلدەندىرۋ؛ باقىلاۋ قىزمەتىن تىڭعىلىقتى، ءونىمدى، ويداعىداي ىستەۋ؛ حالىق قۇرىلتايى ۋاكىلدەرىنىڭ رولىن تولىق ساۋلەلەندىرۋ؛ حالىق قۇرىلتايىنىڭ سىرتپەن بارىس - كەلىسىن كەڭەيتۋ، تەرەڭدەتۋ؛ تۇراقتى كوميتەتتىڭ وزىندىك قۇرىلىس ورەسىن جوعارىلاتۋ كەرەك. مەملەكەتتىك حالىق قۇرىلتايى قۇرىلعانىنىڭ 70 جىلدىعىن قۇتتىقتاۋ قيمىلىن دەن قويا ۇيىمداستىرىپ، حالىق قۇرىلتايى تۇزىمىندە ويداعىداي تاباندى بولىپ، ونى ويداعىداي كەمەلدەندىرىپ، ويداعىداي جۇرگىزىپ، جۇڭگوشا سوتسياليستىك ساياسي دامۋ جولىمەن بۇلجىماي ءجۇرۋ كەرەك.
ەڭ جوعارى حالىق سوتى مەكەمەسىنىڭ باستىعى جاڭ جۇن ەڭ جوعارى حالىق سوتى مەكەمەسىنىڭ قىزمەت بايانداماسىندا بىلاي دەپ اتاپ كورسەتتى: 2023 - جىلى ەڭ جوعارى حالىق سوتى مەكەمەسى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋدە تاباندى بولىپ، نەگىزگى زاڭ مەن زاڭداردا جۇكتەلگەن قىزمەت جاۋاپكەرلىگىن ادالدىقپەن اتقارىپ، نازاردى قىزمەتتىڭ”ادىلدىگى جانە ونىمدىلىگى “ سىندى نەگىزگى تاقىرىبىنا شوعىرلاندىرىپ، ءادىليانى ىرىقتىلىقپەن جۇرگىزۋدە تاباندى بولىپ، جالپى جاعداي ءۇشىن قىزمەت وتەۋدى، حالىق ءۇشىن ءادىليا جۇرگىزۋدى ىشكەرىلەي، ناقتى ىستەپ، سوت جۇرگىزۋ قىزمەتىن وسىزامانداندىرۋدا نىق قادام تاستادى. ەڭ جوعارى حالىق سوتى مەكەمەسى 21 مىڭ 81 دەلونى قابىلداپ، 17 مىڭ 855 دەلونى اياقتاتتى، بۇل سايكەس مەزگىلدەگىدەن جەكە-جەكە %54.6، %29.5 ارتتى. بۇكىل ەلدەگى ءار دارەجەلى سوت مەكەمەلەرى 45 ميلليون 574 مىڭ دەلونى قابىلداپ، 45 ميلليون 268 مىڭ دەلونى اياقتاتتى، بۇل سايكەس مەزگىلدەگىدەن جەكە-جەكە %15.6، %13.4 ارتتى.
باياندامادا جاڭ جۇن 2023 - جىلعى قىزمەتتەردى 5 جاقتان ەسكە الدى: ءبىرىنشى، جالپى جاعدايعا قىزمەت ەتىپ، ءادىليانى ىرىقتىلىقپەن جۇرگىزۋ ارقىلى ساپالى دامۋ مەن جوعارى دەڭگەيلى حاۋىپسىزدىكتى قامتاماسىز ەتتىك؛ ەكىنشى، حالىق ءادىلياسىن شىنايى ىستەپ، ءادىليانى ىرىقتىلىقپەن قامتاماسىز ەتتىك جانە حالىقتىڭ ىرىس - قۇتىن ارتتىردىق؛ ءۇشىنشى، الدىڭعى جاقتى مىقتى يگەرىپ، كىناراتتاردى وڭالتىپ، ءادىليا ارقىلى مەملەكەت پەن قوعامدى جونگە سالۋدى جەبەدىك؛ ءتورتىنشى، سوت جۇرگىزۋدى باسقارۋ مەن قوسىن قۇرىلىسىن شىنايى يگەرىپ، مىندەتتى ىرىقتىلىقپەن اتقارۋ ارقىلى ءادىليانىڭ ادىلدىگىن قامتاماسىزداندىردىق؛ بەسىنشى، باقىلاۋدى سانالىلىقپەن قابىلداپ، مىندەتتى ىرىقتىلىقپەن اتقارۋ ارقىلى جالپى بارىستىق حالىق دەموكراتياسىن امالياتتا ايگىلەدىك.
جاڭ جۇن بايانداماسىندا مىنانى ءبىلدىردى: 2024 - جىلى حالىق سوتى مەكەمەسى شي جينپيڭ زاڭمەن جونگە سالۋ يدەياسىن ىشكەرىلەي دايەكتىلەندىرىپ، سوت جۇرگىزۋ قىزمەتىن وسىزامانداندىرۋ ارقىلى جۇڭگو ۇلگىسىندەگى وسىزامانداندىرۋعا تىرەك بولۋعا جانە قىزمەت وتەۋگە قۇلشىنۋى كەرەك. ءادىليانى ىرىقتىلىقپەن جۇرگىزۋدە تاباندى بولىپ، جۇڭگو ۇلگىسىندەگى وسىزامانداندىرۋدى ىلگەرىلەتۋدى تىعىز ارقاۋ ەتىپ، مىندەت اتقارىپ، جاۋاپكەرلىكتى ادا ەتۋ؛ ساپانى جوعارىلاتىپ، ونىمدىلىكتى ارتتىرۋدى مىقتى يگەرىپ، سوت جۇرگىزۋ قىزمەتىنىڭ وسىزاماندانۋىن جەدەل ىلگەرىلەتۋ؛ باقىلاۋ جۇيەسىن كەمەلدەندىرىپ، اۋىر مىندەت ارقالاي الاتىن سوت مەكەمەسىنىڭ قۇرىش قوسىنىن كۇش سالا سومداۋ كەرەك. سەنىمدى بەكەمدەپ، ءورىس اشا العا ىلگەرىلەپ، شىندىققا جۇگىنىپ، ناقتى ءىس ىستەپ، جاۋاپكەرلىك ارقالاپ، ىسكەرلىك كورسەتىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋگە تىڭ دا اناعۇرلىم زور ۇلەس قوسۋ كەرەك.
ەڭ جوعارى حالىق پروكۋراتۋراسىنىڭ باس پروكۋرورى يىڭ يۇڭ ەڭ جوعارى حالىق پروكۋراتۋراسىنىڭ قىزمەت بايانداماسىندا بىلاي دەپ اتاپ كورسەتتى: 2023 - جىلى شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ پارمەندى باسشىلىعىندا، مەملەكەتتىك حالىق قۇرىلتايى مەن ونىڭ تۇراقتى كوميتەتىنىڭ پارمەندى باقىلاۋىندا، ەڭ جوعارى حالىق پروكۋراتۋراسى نەگىزگى زاڭ مەن زاڭداردا جۇكتەلگەن زاڭدىق باقىلاۋ مىندەتىن ادالدىقپەن اتقارىپ، ءاربىر دەلونى جوعارى ساپامەن، ءونىمدى ءبىتىرىپ، ءتۇرلى پروكۋراتۋرا قىزمەتىندە تىڭ ىلگەرىلەۋشىلىككە قول جەتكىزدى. بۇكىل ەلدەگى پروكۋراتۋرا ورگاندارى ءار تۇردەگى 4 ميلليون 253 مىڭ دەلونى ءبىر جاقتى ەتتى، بۇل سايكەس مەزگىلدەگىدەن %28.9 ارتتى.
باياندامادا يىڭ يۇڭ 2023 - جىلعى قىزمەتتەرگە قايىرىلا قاراپ بىلاي دەدى: ءبىرىنشى، جالپى جاعدايعا قىزمەت وتەپ، پروكۋراتۋرا فۋنكتسياسىن تولىق اتقارىپ، ورنىقتىلىقتى قورعاپ، دامۋدى جەبەدىك؛ ەكىنشى، حالىق ءۇشىن ءادىليا جۇرگىزىپ، پروكۋراتۋرا مىندەتىن اتقارۋ بارىسىندا حالىق تۇرمىسىن قامتاماسىزداندىردىق جانە جاقسارتتىق؛ ءۇشىنشى، زاڭمەن باسقارۋ ءۇشىن جاۋاپكەرلىك ارقالاپ، پروكۋراتۋرالىق باقىلاۋ ارقىلى قوعامدىق ادىلدىك پەن ادىلەتتىلىكتى جەبەدىك؛ ءتورتىنشى، حالىقتىڭ باقىلاۋىن قابىلداپ، پروكۋراتۋرا ۇقىعىنىڭ زاڭ بويىنشا دۇرىس جۇرگىزىلۋىنە كەپىلدىك ەتتىك؛ بەسىنشى، وزىندىك قۇرىلىستى كۇشەيتىپ، جاڭا داۋىردەگى پروكۋراتۋرا قۇرىش قوسىنىن سومدادىق.
يىڭ يۇڭ باياندامادا بىلاي دەپ اتاپ كورسەتتى: 2024 - جىلى بۇكىل ەلدەگى پروكۋراتۋرا ورگاندارى شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋدە تاباندى بولىپ، پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى جالپى ءماجىلىسىنىڭ رۋحىن جاپپاي دايەكتىلەندىرىپ، ساياسي جاقتان نازار اۋدارىپ، زاڭمەن جونگە سالۋ جاعىنان كۇش سالىپ، شي جينپيڭ زاڭمەن جونگە سالۋ يدەياسىنىڭ پروكۋراتۋرا امالياتىن ۇزدىكسىز ىلگەرىلەتىپ، پروكۋراتۋرا قىزمەتىنىڭ وسىزاماندانۋى ارقىلى جۇڭگو ۇلگىسىندەگى وسىزامانداندىرۋعا تىرەك بولۋى جانە وعان قىزمەت وتەۋى كەرەك. پارتيانىڭ پروكۋراتۋرا قىزمەتىنە شارتسىز باسشىلىعىندا باستان - اياق تاباندى بولىپ، مەملەكەتتىڭ حاۋىپسىزدىگىن، قوعامنىڭ تىنىشتىعىن، حالىقتىڭ تىنىشتىعىن باتىل قورعاپ، ساپالى دامۋ سىندى جاڭا داۋىردەگى بۇلجىماس قاعيداعا زاڭ بويىنشا قىزمەت وتەپ، زاڭدىق باقىلاۋ مىندەتىن جوعارى ساپامەن، ءونىمدى اتقارىپ، حالىق بۇقاراسىن حالىق ءۇشىن ىستەيتىن پروكۋراتۋرا ارقىلى ناقتى يگىلىككە كەنەلتىپ، زاڭدىق باقىلاۋ قابىلەتىن تاباندىلىقپەن جوعارىلاتىپ، حالىق پروكۋراتۋراسى ىستەرىندە جاڭا جاعداي جاراتۋعا قۇلشىنۋ كەرەك.
جيىنعا قاتىناسۋعا ءتيىستى ۋاكىل 2 مىڭ 956 ادام، قاتىناسقانى 2 مىڭ 877 ادام، 79 ادام قاتىناسا المادى، قاتىناسقان ۋاكىل سانى زاڭدا بەلگىلەنگەن ادام سانىنا ۇيلەسەدى.
جيىندى ءماجىلىس ءتوراعالار القاسىنىڭ تۇراقتى ءتوراعاسى، اتقارۋشى ءتوراعاسى لي حۇڭجۇڭ باسقاردى.
بۇگىن − ”8 - ناۋرىز“ حالىقارالىق ەڭبەكشى ايەلدەر مەرەكەسى، جيىن ءماجىلىس ءتوراعالار القاسى اتىنان ايەل ۋاكىلدەرگە، ايەل مۇشەلەرگە، ايەل قىزمەتكەرلەرگە، بۇكىل ەلدەگى ءار ۇلت، ءار سالا ايەلدەرىنە، دۇنيە جۇزىندەگى ءار ەل ايەلدەرىنە مەرەكەلىك سالەم جولدادى جانە ىزگى تىلەك ءبىلدىردى.
ءماجىلىستىڭ اتقارۋشى ءتوراعالارى يۇي ۋەيگو، ۋاڭ نيڭ، ۋاڭ شياۋحۇي، ۋاڭ مىڭحۇي، بايىنچاۋلۋ، فىڭ فەي، ليۋ ي - لياڭ، سۇن شاۋيىڭ، دۋ جياحاۋ، لي شيۋلياڭ، ياڭ شياۋچاۋ، جاڭ يوۋشيا، چىن گاڭ، لين ۋ، ي ليانحۇڭ، جوۋ زۋ - ي، جاۋ ي - دى، ءزۇمىرات وبۇل، ني يۋەفىڭ، حۋاڭ ليشين، حۋاڭ چۋپيڭ، جيڭ جۇنحاي، لو شۋگاڭ ءتوراعالار مىنبەسىنىڭ اتقارۋشى ءتوراعالار ورنىنان ورىن الدى.
كەلۋ قاينارى: حالىق تورابى
جاۋاپتى رەداكتورى : مانەپ ەربول ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2023 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
