شي جينپيڭ كاسىپورىن جانە ماماندار اڭگىمە ءماجىلىسىن باسقارىپ اشقاندا بىلاي دەپ باسا دارىپتەدى
جۇڭگو ۇلگىسىندەگى وسىزامانداندىرۋدى ىلگەرىلەتۋدى تىعىز ارقاۋ ەتىپ، رەفورمانى اناعۇرلىم جاپپاي تەرەڭدەتۋ كەرەك
ۋاڭ حۋنيڭ، ساي چي قاتىناستى
2024.05.24 16:07 كەلۋ قاينارى : حالىق تورابى
5 - ايدىڭ 23 - كۇنى تۇستەن كەيىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ شاندۇڭ ولكەسىنىڭ جينان قالاسىندا كاسىپورىن جانە ماماندار اڭگىمە ءماجىلىسىن باسقارىپ اشتى ءارى ماڭىزدى ءسوز سويلەدى. سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
«حالىق گازەتى»، 5 - ايدىڭ 23 – كۇنى، جينان. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 5 - ايدىڭ 23 - كۇنى تۇستەن كەيىن شاندۇڭ ولكەسىنىڭ جينان قالاسىندا كاسىپورىن جانە ماماندار اڭگىمە ءماجىلىسىن باسقارىپ اشتى ءارى ماڭىزدى ءسوز سويلەدى. ول مىنالاردى باسا دارىپتەدى: پارتيانىڭ 20 - قۇرىلتايىندا جاپپاي سوتسياليستىك وسىزاماندانعان مەملەكەت قۇرۋدىڭ ۇلى جوباسى جاسالىپ، جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ءىسىن جاپپاي ىلگەرىلەتۋدىڭ وزەكتى مىندەتى بەلگىلەندى. رەفورمانى ونان ارى جاپپاي تەرەڭدەتۋدە جۇڭگو ۇلگىسىندەگى وسىزامانداندىرۋدى ىلگەرىلەتۋ سىندى نەگىزگى تاقىرىپتى مىقتى ارقاۋ ەتىپ، رەفورما تۇيىندەرىن كورنەكتىلەندىرىپ، قۇن بەتالىسىن مىقتى يگەرىپ، ءادىس - امالعا ءمان بەرىپ، وزەكتى مىندەتتى ورىنداۋعا، ستراتەگيالىق نىسانانى جۇزەگە اسىرۋعا قوزعاۋشى كۇش قوسۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى ۋاڭ حۋنيڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي اڭگىمە ماجىلىسىنە قاتىناستى.
اڭگىمە ماجىلىسىندە مەملەكەتتىك ەلەكتر قارجىلاندىرۋ توبى شەكتى سەرىكتەستىگىنىڭ باس جوراسى، پارتيا باسشىلىق گرۋپپاسىنىڭ شۋجيى ليۋ ميڭشىڭ، شىنجىن قالاسى جاڭالىق اشۋ قارجىلاندىرۋ توبى شەكتى سەرىكتەستىگىنىڭ باس جوراسى، پارتكومنىڭ شۋجيى زو ديڭ، انتا دەنە تاربيە بۇيىمدارى توبى شەكتى سەرىكتەستىگى جورالار مەكەمەسىنىڭ ءتوراعاسى ديڭ شىجۇڭ، جىجياڭ چۋانحۋا توبى شەكتى سەرىكتەستىگىنىڭ باس جوراسى شۇي گۋانجۇي، گەرمانيا بوشى (جۇڭگو) قارجىلاندىرۋ شەكتى سەرىكتەستىگىنىڭ باسالقاسى شۇي داچۋان، شياڭگاڭ فىڭشى توبىنىڭ ءتوراعاسى فىڭ گوجيڭ، بەيجيڭ داشۋەسى مەملەكەت دامۋىن زەرتتەۋ ورنىنىڭ پروفەسسورى جۋ چيرىن، جۇڭگو ماكرولىق ەكونوميكانى زەرتتەۋ ورنىنىڭ باستعى حۋاڭ حانچۋان، جۇڭگو قوعامدىق عىلىمدار اكادەمياسى دۇنيە ءجۇزى ەكونوميكاسى جانە ساياسي زەرتتەۋ ورنى باستعىنىڭ ورىنباسارى جاڭ بىن قاتارلى كاسىپورىن جانە مامانداردىڭ 9 ۋاكىلى ءسوز سويلەپ، ەلەكتر قۋاتى ءتۇزىلىسى رەفورماسىن تەرەڭدەتۋ، حاۋىپ – قاتەرى بار سالاعا قارجى قوسۋدى دامىتۋ، عىلىم - تەحنيكا ارقىلى ءداستۇرلى كاسىپ سالالارىن جاڭالاۋ، دەڭگەيىن جوعارىلاتۋ، حالىقتىق كاسىپورىنداردى جونگە سالۋ جۇيەسىن ورناتۋ، كەمەلدەندىرۋ، شەتەل قارجىلاندىرعان كاسىپورىنداردىڭ تيجارات - ساۋدا ورتاسىن ساپالىلاندىرۋ، شياڭگاڭنىڭ جاڭا دامۋ ارناسىمەن اناعۇرلىم ويداعىداي توعىسۋىن ىلگەرىلەتۋ، حالىق بۇقاراسىنىڭ رەفورماداعى تابىس سەزىمىن كۇشەيتۋ، قالا مەن اۋىلدىڭ توعىسپالى دامۋىن ىلگەرىلەتۋ، ماكرولىق ەكونوميكانى جونگە سالۋ جۇيەسىن كەمەلدەندىرۋ سياقتىلار جونىندە پىكىر - ۇسىنىستار قويدى. ءسوز سويلەۋ بارىسىندا شي جينپيڭ كوپشىلىكپەن ىشكەرىلەي اڭگىمەلەستى، اڭگىمە قىزۋ دا جالىندى بەينەدە ءوتتى.
كوپشىلىكتىڭ ءسوزىن تىڭداعان سوڭ شي جينپيڭ ماڭىزدى ءسوز سويلەدى. ول مىنالاردى ءبىلدىردى: پارتيا ورتالىق كوميتەتى كەلەلى شەشىم جاساعاندا، ماڭىزدى قۇجاتتار جاساعاندا، تۇگەلدەي ىشكەرىلەي تەكسەرۋ - زەرتتەۋ جۇرگىزىپ، ءار جاقتىڭ پىكىرىن كەڭىنەن تىڭدايدى، بۇل − پارتيامىزدىڭ دايەكتى ءادىسى جانە تاڭداۋلى ءداستۇرى. كوپشىلىك العا قويعان رەفورمانى ونان ارى تەرەڭدەتۋ جونىندەگى پىكىرلەر مەن ۇسىنىستاردى قاتىستى جاقتار مۇقيات زەرتتەپ، قابىلداۋى كەرەك.
شي جينپيڭ مىنالاردى اتاپ كورسەتتى: رەفورما − دامۋدىڭ قوزعاۋشى كۇشى. رەفورمانى ونان ارى جاپپاي تەرەڭدەتۋ ءۇشىن، جۇڭگوشا سوتسياليستىك ءتۇزىمدى كەمەلدەندىرۋ جانە دامىتۋ، مەملەكەتتى جونگە سالۋ جۇيەسى مەن جونگە سالۋ قابىلەتىن وسىزامانداندىرۋدى ىلگەرىلەتۋ سىندى باس نىسانانى ارقاۋ ەتىپ، جۇڭگو ۇلگىسىندەگى وسىزامانداندىرۋدى ىلگەرىلەتىپ، نىسانانى باعدار ەتۋ مەن ماسەلەنى باعدار ەتۋدى ءوزارا ۇشتاستىرۋدا تاباندى بولىپ، ماسەلەنى بەتكە الىپ، ماسەلەنى كوزدەي وتىرىپ تۇزەتىپ، جۇڭگو ۇلگىسىندەگى وسىزامانداندىرۋدى ىلگەرىلەتۋگە كەدەرگى بولاتىن يدەيالىق كوزقاراس پەن ءتۇزىلىس، مەحانيزم كىناراتتارىن باتىل الاستاپ، تەرەڭ قاتپارلى تۇزىلىستىك، مەحانيزمدىك كەدەرگىلەر مەن قۇرىلىمدىق قايشىلىقتاردى كۇش سالا شەشىپ، جۇڭگو ۇلگىسىندەگى وسىزامانداندىرۋعا ۇزدىكسىز پارمەندى قوزعاۋشى كۇش قوسىپ، پارمەندى تۇزىمدىك كەپىلدىك ازىرلەۋ كەرەك.
شي جينپيڭ مىنالاردى باسا دارىپتەدى: رەفورمانى ونان ارى جاپپاي تەرەڭدەتۋدە باستى قايشىلىق پەن قايشىلىقتىڭ باستى جاعىن يگەرۋ كەرەك. ەلىمىزدىڭ نەگىزگى ەكونوميكالىق تۇزىمىندە تاباندى بولىپ جانە ونى دامىتىپ، جوعارى دەڭگەيدەگى سوتسياليستىك بازار شارۋاشىلىعى ءتۇزىلىسىن ورناتىپ، ماكرولىق ەكونوميكانى جونگە سالۋ جۇيەسىن جانە ساپالى دامۋدى ىلگەرىلەتۋ ءتۇزىلىس، مەحانيزمىن اقاۋسىزداندىرىپ، جاپپاي جاڭالىق اشۋدى قولداۋ، قالا مەن اۋىلدىڭ توعىسپالى دامۋى سياقتى ءتۇزىلىس، مەحانيزمدەردى كەمەلدەندىرىپ، قوعامدىق وندىرگىش كۇشتەردى ونان ارى ازات ەتىپ جانە دامىتىپ، قوعامنىڭ ومىرشەڭدىك كۇشىن ارتتىرىپ، وندىرىستىك قاتىناس پەن وندىرگىش كۇشتىڭ، قوندىرما مەن بازيستىڭ اناعۇرلىم ويداعىداي سايكەسۋىن ىلگەرىلەتۋ كەرەك. ەكونوميكالىق ءتۇزىلىس رەفورماسىن ىلگەرىلەتۋدە رەال قاجەتتى، ەڭ كوكەي تەستى ىستەردى نەگىز ەتىپ، امالياتتىق ماسەلەلەردى شەشۋ بارىسىندا نازاريادا جاڭالىق اشۋدى تەرەڭدەتىپ، تۇزىمدە جاڭالىق اشۋدى ىلگەرىلەتۋ كەرەك. باسقا سالالارداعى رەفورمادا دا جالپى جاعدايلىق، ستراتەگيالىق ماسەلەلەرگە نازار اۋدارىپ، رەفورما شارالارىن جوبالاپ، ارقاۋ ايقىن بولۋدى جۇزەگە اسىرۋ كەرەك.
شي جينپيڭ بىلاي دەپ اتاپ كورسەتتى: حالىقتىڭ تاماشا تۇرمىسقا تالپىنىسى − ءبىزدىڭ كۇرەس نىسانامىز، رەفورمانى يگەرىپ، دامۋدى جەبەۋ، تۇپتەپ كەلگەندە، حالىقتى اناعۇرلىم جاقسى تۇرمىسقا كەنەلتۋ ءۇشىن. حالىقتىڭ جالپىلىق مۇددەسىن، ءتۇبىرلى مۇددەسىن، ۇزاق بولاشاقتىق مۇددەسىن شىعار ءتۇيىن ەتە وتىرىپ رەفورمانى جوبالاپ جانە ىلگەرىلەتىپ، جاڭا داۋىردەگى پارتيانىڭ بۇقارالىق لۋشيانىمەن ويداعىداي ءجۇرىپ، جۇمىستاندىرۋ، كىرىستى ارتتىرۋ، وقۋعا ءتۇسۋ، ەمدەلۋ، تۇرعىن ءۇي، ءىس ءبىتىرۋ، بالاباقشاعا اماناتتاۋ، قارتتاردى كۇتىمدەۋ، سونداي - اق عۇمىر، مال - مۇلىك حاۋىپسىزدىگى سياقتى بۇقارانىڭ شۇعىل، قيىن، ۋايىمداعان، ءزارۋ ماسەلەلەرىنەن رەفورمانىڭ كۇش سالۋ ءتۇيىنى مەن تەتىگىن ءداپ باسىپ تاۋىپ، حالىق تۇرمىسى جاعىندا كوكەيتەستى بولىپ وتىرعان، حالىق قالاۋىنان شىعاتىن كەيبىر رەفورما شارالارىن كوبىرەك العا قويىپ، حالىق تۇرمىسىنا تيىمدىلىك جاسايتىن، جۇرت جۇرەگىن جىلىتاتىن، حالىق تىلەگىنە ۇيلەسەتىن ناقتى ىستەردى كوبىرەك ىستەپ، رەفورمانىڭ حالىق بۇقاراسىن اناعۇرلىم كوپ تابىس سەزىمىنە، باقىت سەزىمىنە، حاۋىپسىزدىك سەزىمىنە كەنەلتۋىنە مۇمكىندىك جاساۋ كەرەك.
شي جينپيڭ بىلاي دەپ باسا دارىپتەدى: رەفورمادا كۇشىنەن قالدىرۋ دا، ورناتۋ دا بولادى، ءوز قاعيداسىمەن ىستەگەندە از كۇشپەن كوپ ءىس تىندىرۋعا بولادى، ويتپەگەندە ەڭبەك زايا كەتەدى، اۋەلى، كەرى اسەر تۋدىرادى. دۇرىس جولدان تايماي، جاڭالىق اشۋدا تاباندى بولۋ كەرەك، رەفورما مەيلى قالاي جۇرگىزىلسىن، پارتيانىڭ جالپى بەتتىك باسشىلىعىندا، ماركسيزمدە تاباندى بولۋ، جۇڭگوشا سوتسياليزم جولىندا تاباندى بولۋ، حالىق دەموكراتياسى ديكتاتۋراسىندا تاباندى بولۋ سياقتى ءتۇبىرلى نارسەلەردەن استە اۋىتقىماۋ كەرەك، سونىمەن بىرگە، باتىلدىقپەن جاڭالىق اشىپ، وزگەرتۋگە تيىستىلەرىن، وزگەرتۋگە بولاتىندارىن ويداعىداي تۇزەتىپ، تىڭعىلىقتى تۇزەتىپ، ءداپ باسىپ بايقاعان زامان تاباندىلىقپەن يگەرۋ كەرەك. رەفورمادا جۇيەلى شوعىرلاندىرۋعا اناعۇرلىم ءمان بەرىپ، جالپى جاعداي كوزقاراسى جانە جۇيەلى وي جەلىسى ارقىلى جوسپارلاپ ىلگەرىلەتۋدە تاباندى بولىپ، ءتۇرلى رەفورما شارالارىنىڭ سايكەسۋىن، ۇشتاسۋىن كۇشەيتىپ، ءار سالاداعى، ءار جاقتاعى رەفورما شارالارىنىڭ ءبىر باعىتتا كۇش سالۋىن، بىرىككەن كۇش قالىپتاستىرۋىن ىلگەرىلەتىپ، جالپىلىق ونىمدىلىكتى كۇشەيتىپ، اركىم ءوز بىلگەنىنشە ىستەۋ، ءبىر - بىرىنە ورالعى بولۋ قۇبىلىسىنان ساقتانۋ جانە ونى جويۋ كەرەك. رەفورمانى جوبالاۋعا ءمان بەرۋ، تياناقتاندىرۋعا ءتىپتى دە ءمان بەرۋ كەرەك. شەگە قاعۋ رۋحىمەن رەفورمانى تياناقتاندىرۋدى مىقتى يگەرۋ، بەلسەندى، ىرىقتى بولۋ، ونان دا ماڭىزدىسى، تىڭعىلىقتى، ورنىقتى بولۋ، رەت - ءتارتىپتى ايقىنداۋ، ۋاقىت، ولشەم ونىمدىلىگىن يگەرۋ، بار كۇشىن سالۋ، كورپەگە قاراي كوسىلۋ، ءىس جۇزىندىكتەن قول ۇزبەۋ كەرەك.
لي گانجيە، حى ليفىڭ اڭگىمە ماجىلىسىنە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، شاندۇڭ ولكەسىندەگى جاۋاپتى جولداستار، مەملەكەت مەنشىگىندەگى كاسىپورىنداردىڭ، حالىقتىق كاسىپورىنداردىڭ، شەتەل قارجىلاندىرعان كاسىپورىنداردىڭ، شياڭگاڭ، اۋمىن، تايۋان قارجىلاندىرعان كاسىپورىنداردىڭ، ارنايىلاندىرىلعان، كەمەلدەندىرىلگەن، ەرەكشەلەندىرىلگەن، جاڭاشالاندىرىلعان ”شاعىن الپاۋىت“ كاسىپورىنداردىڭ، جەكە ساۋدا - ونەركاسىپشىلەردىڭ جانە مامان - وقىمىستىلاردىڭ ۋاكىلدەرى قاتارلىلار اڭگىمە ماجىلىسىنە قاتىناستى.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
