ساياحاتشى اۆتوموبيلمەن جايىلىمدى تاپتاعان
شينجياڭ قۇلجا اۋدانى حابارلاندىرۋ شىعاردى: 5000 يۋان اقشالاي ايىپ سالىندى، شەكتەۋلى مەرزىم ىشىندە قالپىنا كەلتىرۋگە بۇيىرىلدى
2024.05.23 14:52 كەلۋ قاينارى : حالىق تورابى
5 – ايدىڭ 21 – كۇنى، شينجياڭ قۇلجا اۋدانىنداعى قاتىستى تاراۋلار اۆتوموبيلمەن شينجياڭداعى تابيعي جايىلىمدا شىر اينالىپ، اۆتوموبيلدىڭ دوڭگەلەگىمەن جايىلىمدى بۇلدىرگەن ادامدى ءبىرجاقتى ەتۋ ناتيجەسىن جاريالادى.
5 – ايدىڭ 17 – كۇنى، شينجياڭ ىلە وبلىسى قۇلجا اۋدانىنىڭ تۋراسۋ كورىنىس رايونىندا ءبىر جىگىت اۆتوموبيلمەن تابيعي جايىلىمدا شىر اينالىپ، جايىلىمدا اۆتوموبيلدىڭ ىزدەرى قالعان. ىلە وبلىستىق ورمان شارۋاشىلىعى جانە جايىلىم مەكەمەسى بۇل ءىستى اشكەرەلەگەن مالىمدەۋدى تاپسىرىپ العاننان كەيىن دەرەۋ تەكسەرۋ جۇرگىزگەن. تەكسەرۋگە قاراعاندا، ول اۆتوموبيلدى سول جەردەن مايعا الىپ، رۇقساتسىز تۇردە تابيعي جايىلىمعا كىرىپ، اۆتوموبيلمەن شىر اينالعان. وسىدان سوڭ، ول اشىق تۇردە كەشىرىم سۇراعان ءارى تەكسەرىپ ءبىرجاقتى ەتۋگە سايكەسەتىنىن بىلدىرگەن.
5 – ايدىڭ 21 – كۇنى، قۇلجا اۋداندىق مادەنيەت – دەنە تاربيە – راديو – تەلەۆيزيا جانە ساياحات مەكەمەسى ”ورىكتى اۋىلدىڭ مادەنيەتى مەن ساياحاتى“ اتتى كەسكىندى تەكشەسىندە وسى ءىستى تەكسەرىپ ءبىرجاقتى ەتۋ جاعدايىن جالپىعا جاريالاعان.
جالپىعا حابارلاندىرۋدا بىلاي دەلىنگەن: قۇلجا اۋدانى تۋراسۋ كورىنىس رايونىندا ساياحاتشىنىڭ اۆتوموبيلمەن جايىلىمدى تاپتاۋىنا قاتىستى پىكىرگە قۇلجا اۋداندىق حالىق ۇكىمەتى بارىنشا ءمان بەرىپ، قۇلجا اۋداندىق ورمان شارۋاشىلىعى جانە جايىلىم مەكەمەسى باستاماشىلدىق ەتكەن بىرلەسكەن قىزمەت گرۋپپاسىن دەرەۋ ۇيىمداستىرىپ، كورىنىس رايونىنا بارىپ جاعدايعا تەكسەرۋ جۇرگىزگەن.
تەكسەرۋگە قاراعاندا، بۇل ءىس شىن بولعان، ساياحاتشى شۇي X (ەر، 33 جاستا، جەكە كاسىپكەر) 5 – ايدىڭ 17 – كۇنى ساعات 15 اينالاسىندا تۋراسۋ كورىنىس رايونىندا اۆتوموبيلمەن جايىلىمعا قالاعانىنشا كىرىپ، جايىلىمدى تاپتاعان، 2 مۋ جەردەگى جايىلىمداعى وسىمدىكتەر زيانعا ۇشىراعان، جايىلىمنىڭ ەكولوگيالىق ورتاسى مەن كەيىنگى جەتىلۋىنە اۋىر ىقپال جاساعان.
قۇلجا اۋداندىق ورمان شارۋاشىلىعى جانە جايىلىم مەكەمەسى 5 – ايدىڭ 21 – كۇنى دەلو تۇرعىزىپ تەكسەرۋ جۇرگىزگەن ءارى اكىمشىلىك جاقتان 5000 يۋان اقشالاي ايىپ سالعان، ونى شەكتى مەرزىم ىشىندە وسىمدىك جامىلعىسىن قالپىنا كەلتىرۋگە، مالشىلارعا جايىلىم زيانىن تولەپ بەرۋگە بۇيىرعان.
جالپىعا حابارلاندىرۋدا مىناداي ۇندەۋ تاستاعان: ءاربىر ساياحاتشى، ءسوزسىز، جايىلىمدى سانالىلىقپەن ايالاۋى، ءارقانداي بۇلدىرگىش ارەكەتتىڭ تۋىلۋىنان قاتاڭ ساقتانۋى كەرەك. كورىنىس رايونىنىڭ ءتۇرلى بەلگىلەمەلەرىنە قاتاڭ بويسۇنىپ، جاراتىلىستىق ورتانى ايالاۋشىلىق تۇرعىسىنان قۇرمەتتەۋى كەرەك. الدا – جالدا باسقالاردىڭ ءبۇلدىرۋ ارەكەتىن بايقاساڭىز، دەرەۋ توقتاۋ سالىڭىز ءارى دەر كەزىندە قىزمەتكەرلەرگە مالىمدەڭىز.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
