شي جينپيڭ اراب بىرىككەن امىرلىگىنىڭ جۇڭگو ءتىلى وقىتۋىنداعى ”ءجۇز مەكتەپ نىسانىنىڭ“ وقۋشىلار ۋاكىلدەرىنە جاۋاپ حات قايتاردى
2024.05.27 17:36 كەلۋ قاينارى : حالىق تورابى
شينحۋا اگەنتتىگى، 5 - ايدىڭ 26 – كۇنى، بەيجيڭ. جۋىقتا مەملەكەت ءتوراعاسى شي جينپيڭ اراب بىرىككەن امىرلىگىنىڭ جۇڭگو ءتىلى وقىتۋى بويىنشا ”ءجۇز مەكتەپ نىسانىنىڭ“ وقۋشىلار ۋاكىلدەرىنە جاۋاپ حات جازىپ، ولاردى جۇڭگو ءتىلىن جاقسى ۇيرەنىپ، جۇڭگونى ءتۇسىنىپ، جۇڭگو - اراب بىرىككەن امىرلىگى دوستىعىن جەبەۋگە كۇش قوسۋعا شابىتتاندىردى.
شي جينپيڭ مىنانى ءبىلدىردى: مەن سىزدەردىڭ حاتتارىڭىزدى وقىپ، سوزدەرىڭىزدەن، سۋرەتتەرىڭىزدەن كوپشىلىكتىڭ جۇڭگو مادەنيەتىنە، ەكى ەلدىڭ دوستىعىنا دەگەن تىلەگىن سەزىندىم. 5 جىلدىڭ الدىندا مەن مۇحاممەد زۇڭتۇڭمەن بىرگە اراب بىرىككەن امىرلىگىنىڭ جۇڭگو ءتىلى وقىتۋىنىڭ ”ءجۇز مەكتەپ نىسانىن“ باستادىم، بۇل كۇندە ”جۇڭگو ءتىلىن ۇيرەنۋ“ اراب بىرىككەن امىرلىگىندە جاڭا سالتقا اينالىپ، وزدەرىڭىز سياقتى جۇڭگو - اراب ەلدەرى اۋىس - كۇيىسىنىڭ ءبىر توپ بالا ەلشىلەرى تاربيەلەنىپ شىققانىن كورىپ ءسۇيىنىپ وتىرمىن.
شي جينپيڭ بىلاي دەپ اتاپ كورسەتتى: سىزدەر حاتتارىڭىزدا جۇڭگو مەن اراب بىرىككەن امىرلىگىنىڭ ”قول ۇستاسقانىنا“ 40 جىل بولدى دەپسىزدەر، جۇڭگو مەن اراب بىرىككەن امىرلىگىنىڭ ماڭگى جاقسى دوس بولۋىن ءۇمىت ەتەمىن، جۇڭگو حالقىنىڭ دا وسىنداي ارمان - تىلەگى بار. جاستار مەن ورەندەر جۇڭگو مەن اراب ەلدەرىنىڭ دوستىق قارىم - قاتىناسىنىڭ بولاشاعىنا ۋاكىلدىك ەتەدى. سىزدەردىڭ جۇڭگوعا كەلىپ مىسىق ايۋدى كورۋلەرىڭىزدى، ۇلى قورعانعا شىعۋلارىڭىزدى، ەسەيگەننەن كەيىن جۇڭگوعا كەلىپ داشۋە وقۋلارىڭىزدى قارسى الامىن، ءتىپتى دە كوپ اراب بىرىككەن امىرلىگى جاستارى مەن ورەندەرىنىڭ جۇڭگو ءتىلىن ۇيرەنىپ، جۇڭگونى ءتۇسىنىپ، جۇڭگو جاستارىمەن، ورەندەرىمەن اۋىس - كۇيىس جاساپ، ءوزارا ۇيرەنىپ، ءوزارا ۇلگى الىپ، دوستىقتىڭ تۇقىمىن كوكەيگە ءسىڭىرىپ، جۇڭگو - اراب بىرىككەن امىرلىگى قارىم - قاتىناسىنىڭ اناعۇرلىم كوركەم بولاشاعىن اشۋعا ۇلەس قوسۋلارىن قارسى الامىن.
2019 - جىلى 7 - ايدا ءتوراعا شي جينپيڭ مەن سول كەزدەگى اراب بىرىككەن امىرلىگىنىڭ ابۋدابي پاتشا مۇراگەرى مۇحاممەدتىڭ بىرگە كۋا بولۋىندا، جۇڭگو مەن اراب بىرىككەن امىرلىگى بەيجيڭدە ەسكەرتپە حاتقا قول قويىپ، اراب بىرىككەن امىرلىگىنىڭ جۇڭگو ءتىلى وقىتۋىنداعى ”100 مەكتەپ نىسانىن“ رەسمي باستادى. قازىرگە دەيىن اراب بىرىككەن امىرلىگىنىڭ 171 مەكتەبى جۇڭگو ءتىلى ساباعىن اشتى، 71 مىڭ وقۋشى جۇڭگو ءتىلىن ۇيرەندى. تاياۋدا اراب بىرىككەن امىرلىگىنىڭ ”100 مەكتەپ نىسانىنان“ ۇلگى كورسەتەتىن حامدان مەكتەبى مەن ياسى مەكتەبىندەگى ورتا، باستاۋىش مەكتەپ وقۋشىلارىنىڭ 40 ۋاكىلى جەكە - جەكە جۇڭگو تىلىندە ءتوراعا شي جينپيڭگە حات جازىپ، جۇڭگو مادەنيەتىنە دەگەن تالپىنىسى مەن سۇيىسپەنشىلىگىن ءبىلدىرىپ، جۇڭگو مەن اراب بىرىككەن امىرلىگىنىڭ دوستىق ەلشىسى بولۋعا بەل بايلاپ وتىرعاندارىن بىلدىرگەن بولاتىن.
كەلۋ قاينارى: حالىق تورابى
جاۋاپتى رەداكتورى : نۇرعيسا قۇرمانجان ۇلى
تەلەفون: 65367915-010 حات ساندىعى: kazakh@peopledaily.com.cn
بۇل بەتتىڭ باسپا ۇقىعى حالىق تورابىنا ءتان، كەلىسىمنەن وتپەي كوشىرىپ پايدالانۋعا بولمايدى
Copyright © 1997-2024 by www.people.com.cn. all rights reserved
جۇڭگو كوممۋنيستىك پارتياسى اقپارات تورابى
