قازاقستاندىق جاس ءانشى ايقىن تولەپبەرگەنوۆپەن سۇحپات

ءانشى باقىتى ــ اندەرىنىڭ تىڭدارمان جۇرەگىنەن ورىن الۋى

سۇحپاتتاسقان جانار قاناپيا قىزى

2015.05.15 18:08   كەلۋ قاينارى : حالىق تورابى

　　وزىندىك ءان ورىنداۋ دارالىعىمەن تىڭدارمان قاۋىمنىڭ سۇيىكتى جۇلدىزىنا اينالعان، بارشاعا تانىس قازاقستاننىڭ جاس ەسترادا جۇلدىزى ايقىن تولەپبەرگەنوۆ ءساۋىردىڭ سوڭعى كۇندەرى قۇلجا قالاسىنا كونسەرتتىك ساپارمەن كەلىپ ەدى. سول ورايدا ونەرپازبەن سۇحپاتتاسۋدىڭ ءساتى ءتۇستى.

　　جانار قاناپيا قىزى: ءوز ومىرىڭىزدى قىسقاشا تانىستىرا كەتسەڭىز؟

　　ايقىن تولەپبەرگەنوۆ: مەن الماتى قالاسىندا تۋىپ -وسكەم.

　　ج. قاناپيا قىزى: ونەر جولىنا قاي كەزدەن باستاپ قادام باستىڭىز، ونەرگە كەلۋىڭىزگە اسەر ەتكەن ادامدار بولدى ما، قانداي تابىستارعا قول جەتكىزدىڭىز؟

　　ا. تولەپبەرگەنوۆ: 16 جاسىمنان باستاپ العاش رەت قولىما گيتار الىپ اندەتتىم، ستۋدەنت كەزدە جۇمىس ىستەۋ كەرەك بولعان سوڭ رەستوراندا ءان ايتىپ مۋزىكانت بولىپ ىستەدىم، وسى جەردەگى «جۇڭگو ءۇنى»سياقتى بىزدە دە سونداي جارىس بولدى، ونىڭ وندىعىنا جەتتىم، قازىر انشىلىك جولىندا، ۇلكەن ساحنادا جۇرگەنىمە 2003-جىلدان بەرى 12 جىلداي بولدى، كوپتەگەن ءان، بەينە بايان شىقتى. ونەرگە كەلۋىمە اسەر ەتكەن ادام ــ اكەم نۇرتان تولەپبەرگەن ۇلى. ءانشى، ساتيريك، وسى قۇلجا قالاسىندا تۋىلعان. اتام 1916-جىلدارى قازاقستاننان بەلگىلى جاعدايلارمەن وسى قۇلجا قالاسىنا كوشىپ كەلگەن، 1953-جىلى قازاقستانعا قايتىپ بارعان، اكەم ــ وسى قۇلجا قالاسىنىڭ تۋماسى، ءانشى بولعاننان كەيىن جاس كەزىندە ءان ايتتى، جۋرناليست بولدى، گازەتتەردە، جۋرنالداردا جۇمىس ىستەدى، ۇيدە دە اندەتىپ وتىراتىن، مۇمكىن سول كىسىدەن جۇققان شىعار، ونەر جولىنداعى تابىسىمدى ايتاتىن بولسام، وتە ۇلكەن تابىسقا جەتتىم دەپ ايتا المايمىن، 12 جىل ساحنادا ءجۇرۋدىڭ ءوزى ءبىر ەڭبەك، سەبەبى كەلىپ -كەتىپ جاتقان ءانشى وتە كوپ، قۇدايعا شۇكىر، كونسەرتتەرمەن قازاقستاندى ارالاپ ءجۇرمىز، قازىر جۇڭگوعا كەلدىم، بولاشاقتا موڭعۇلياعا بارۋ ويىم بار، قىرعىزستانداعى كورەرمەندەر دە تانيدى، نەشە ءتۇرلى ۇلتتىق بايگەلەردە دە جۇلدە العام، «ساز الەمى» سياقتى داۋىس بەرەتىن جوبانىڭ ەكى رەت ۇزدىك ءانشىسى اتاندىم، «اسىلىم» دەگەن ءان ۇزدىك ءان قاتارىنا كىردى، «مۇزون» دەگەن تەلە كانالدىڭ ۇزدىك ءانشىسى بولدىم، كوپ ءان شىعىپ جاتىر، اندەرىمدى جاستار دا بىلەدى، ءانشى ءۇشىن ەڭ ۇلكەن تابىس اندەرىنىڭ تىڭدارماننىڭ جۇرەگىنەن ورىن تالۋى.

　　ج. قاناپيا قىزى: قازىرگى تۇرمىسىڭىز، وتباسىڭىز جايىندا جانكۇيەرلەرىڭىزگە ايتا وتىرساڭىز؟

　　ا. تولەپبەرگەنوۆ: وتباسىم جايىندا ايتار بولسام، ايەلىم بار، ءۇش جاسار ۇلىم بار.

　　ج. قاناپيا قىزى: الدىڭعى ءبىر سۇحپاتىڭىزدا اكەم قۇلجانىكى، ەگەر قۇلجادا تۋىلعان بولسام «جۇڭگو ۇنىنە» قاتىناساتىن ەدىم دەگەنسىز، سول جايىندا ە ايتاسىز، جۇڭگو قازاق انشىلەرىنەن، حانزۋ انشىلەرىنەن ءوزىڭىز ۇناتاتىن، مويىندايتىن انشىلەرىڭىز بار ما؟ا. تولەپبەرگەنوۆ: ءيا، ول كەزدە سۇراپ قالدى، قۇلجادا اكەڭىز قالىپ قالعاندا قالاي بولادى دەپ. ارينە وسى جەردە تۋىلسام مۇمكىن ول كەزدە دە ءانشى بولسام «جۇڭگو ۇنىنە» قاتىناساتىن ەدىم، ءبىراق نە بولاتىنىن ءبىر قۇداي بىلەدى، بولجاماي -اق قويايىق، ال اكەمنىڭ قۇلجا قالاسىندا تۋىلعانى راس. جۇڭگو قازاق انشىلەرىنەن «كۇمىس كومەيدىڭ» جۇلدەگەرى شالقار الىمبەك ۇلىنىڭ ءانىن ۇناتتىم جانە اراي ايدارقان ۇلى مەن «دۋدارايدى» ايتقان تاسقىندى تەلەۆيزوردان، عالامتوردان كورگەم. جۇڭگو انشىلەرىنە كەلەتىن بولساق، ۋاڭ ليحۇڭدى بىلەمىن، ەلدىڭ ءبارى ماعان ۇقساتادى جانە جىچيۋ دەگەن ءانشىنى بىلەم، تاعى كينو اكتەرى چىڭ لۇڭدى ۇناتام.

　　ج. قاناپيا قىزى: كونسەرتتىك ساپارىڭىز كوڭىلدى مە، بولاشاق جوسپارىڭىز قانداي؟

　　ا. تولەپبەرگەنوۆ: وتە كوڭىلدى، جۇڭگوداعى قانداستارىمىزدىڭ قارسى العانىنا ريزامىن، بارعان جەردەن شاپان جاۋىپ جاتىر، قۇرمەتتەپ جاتىر، ەڭ باستىسى حالىق كونسەرتكە كەلىپ جاتىر، حالىقتىڭ ءىلتيپاتىنا ريزامىن. بولاشاق جوسپار دەمەكشى،ءانشى ءۇشىن جوسپار سول كونسەرت بەرۋ، ءان جازۋ، بەينە بايان ءتۇسىرۋ، جاقسى - جاقسى ءان شىعارۋ.

　　ج. قاناپيا قىزى: الداعى كونسەرتتىك ساپارىڭىز كوڭىلدى ، ويعا العان جۇمىستارىڭىز ءساتتى بولسىن! راقىمەت!