قازاق كاسىپكەر بەيجيڭدە 8 كيىز ءۇي تىگىپ، ۇلتتىق تاعامجاي اشتى

2013.12.30 14:50   كەلۋ قاينارى : حالىق تورابى

　　حالىق تورابى قازاقشا ارناسىنىڭ 30 – جەلتوقساندا بەيجيڭنەن بەرگەن حابارى. بەيجيڭدە دە كيىز ۇيدە قارا دومبىرانىڭ ءۇنىن ەستي وتىرىپ، قازاقتىڭ ۇلتتىق تاعامدارىنان اۋىز تيۋگە بولاتىن بولدى! بەيجيڭ قالاسى چاۋياڭ رايونى شىعىس 5-اينالما جولدىڭ سىرتىنداعى شۋاڭچياۋدا اشىلعان كيىز ءۇيلى «وردا» ۇلتتىق تاعامجايى ساۋداسىن رەسمي باستاپ كەتتى.

　　تاعامجاي قالانىڭ ۋ - شۋىنان تىسقارىلاۋ ورىنعا جايعاسقان، بەيجيڭدەگى كوشە تولى كولىكتىڭ شۋىلىنان شىعا بەرە از- كەم جول جۇرگەن سوڭ، تىپ – تىنىش، جايبىراقات ورتاداعى «وردا» تاعامجايىنا جەتىپ باراسىز، قاتار – قاتار تىزىلگەن كيىز ۇيلەر اراسىندا قازاقتىڭ ۇلتتىق كيىمدەرىن كيىپ، تاباق تاسىپ ابىگەر بولىپ جۇرگەن بوز بالالار مەن قارا كوزدەردى كورگەندە قازاق اۋىلىنا كەلىپ قالعانداي كۇي كەشەسىز.

　　تاعامجاي قوجايىنى مۇرات قۇسايىن ۇلىن تابىسىمەن قۇتتىقتاپ، سوزگە تارتتىق. ونىڭ ايتۋىنشا، بەيجيڭنەن ۇلتتىق اسپۇزىل اشۋدى ول 7 ~ 8 جىلدان بەرى ارمانداپ كەلگەن ەكەن. ءوزى ءۇرىمجى ماڭىندا ساياحات كاسىبىمەن شۇعىلدانعانىنا 20 جىلدان اسقان كاسىپكەر بەيجيڭگە كەلگەن سايىن وسى ءبىر ويىنا تياناق ىزدەي جۇرەدى ەكەن، مىنە سول ويى بۇگىن ىسكە اسىپ وتىر. ول تاعى ىشكى ولكەلەردەگى باسقا ۇلكەن قالالاردان دا وسىنداي اق وردالى اسپۇزىلدار اشۋعا ءۇمىتتى بولىپ جۇرگەنىن جاسىرمادى.

　　كاسىپكەردىڭ تۇپكى ماقساتى ساۋداسىن جانداندىرىپ، شارۋاسىن شالقىتا بەرۋ دەسەك تە، مۇرات قۇسايىن ۇلىنىڭ بۇدان وزگە ىزگى ماقساتتارى، بيىك مۇراتتارى دا جوق ەمەس. وسى ۇلتتىق تاعامجاي ارقىلى قازاقتىڭ ءتۇرلى ۇلتتىق سالت – ساناسىن، كيىم- كەشەگىن، تاعام مادەنيەتىن ورتالىق قالاداعى وزگە ۇلت وكىلدەرىنە تانىستىرۋدى ءوزىنىڭ ۇلاعاتتى پارىزى سانايدى. اسپۇزىلدا قىزمەت وتەيتىن قازاقتىڭ قارا كوز ۇل – قىزدارىن ءوزى بىردەن تاڭداپ، سارالاپ اكەلگەن، ونداعى ويى ولاردى كەزەگىمەن ورتالىق قالاداعى ءتىل ۇيرەنۋ كۋرستارىنا بەرىپ، تالاپتى ۇل – قىزداردىڭ بولاشاق جولىن اشۋ. «وسى بالالار وسىنداعى جاقسى شارت – جاعدايدان پايدالانىپ كوكەيلەرىنە ءبىلىم توقىپ، بولاشاق جولدارىنا ساۋلە تۇسىرسە، مەن ءۇشىن دە ماقتانىش ەمەس پە»،-دەيدى ول.

　　كەلۋ قاينارى: حالىق تورابى