شي جينپيڭ برازيليالىق دوس قايراتكەرلەرگە جاۋاپ حات قايتاردى

شينحۋا اگەنتتىگى، 11 - ايدىڭ 11 - كۇنى، بەيجيڭ. تاياۋدا مەملەكەت ءتوراعاسى شي جينپيڭ برازيليانىڭ ءار سالاسىنداعى دوس قايراتكەرلەرگە جاۋاپ حات جازىپ، ولاردى جۇڭگو - برازيليا دوستىق ىستەرىنە ۇزدىكسىز ۇلەس قوسۋعا شابىتتاندىردى.

شي جينپيڭ بىلاي دەپ اتاپ كورسەتتى: جۇڭگو مەن برازيليانىڭ دوستىق ىستەرىنىڭ ۇرپاقتان - ۇرپاققا جالعاسىپ، ءىزباسارلارى شىعىپ جاتقاندىعىن كورىپ قاباعات قۋاندىم. ديپلوماتيالىق قارىم - قاتىناس ورناتقان 50 جىلدان بەرى جۇڭگو - برازيليا ەكى ەل قول ۇستاسا بىرگە ءجۇرىپ، بەينەت پەن زەينەتتى بىرگە وتكەرىپ، تاۋ – تەڭىزدەن اتتاپ وتكەن جاقسى دوستارعا اينالدى. جۇڭگو جاق برازيليا جاقپەن ەكى ەل دوستىعىنىڭ داۋىرلىك ءمانىن ۇزدىكسىز بايىتىپ، جۇڭگو - برازيليا قارىم - قاتىناسىن وركەندەپ كەلە جاتقان ءىرى ەلدەردىڭ ىنتىماقتاسا سەلبەسۋىنىڭ، بىرگە دامۋىنىڭ، ءوزارا پايدا جەتكىزىپ، تەڭ يگىلىككە كەنەلۋىنىڭ ۇلگىسىنە اينالدىرىپ، ادامزاتتىڭ بەيبىتشىلىگى مەن العا باسۋ ىستەرىنە اناعۇرلىم زور ۇلەس قوسۋدى قالايدى. برازيليالىق دوستاردىڭ جۇڭگوعا كوبىرەك كەلىپ جۇڭگونىڭ وسىزاماندانۋىنىڭ سان قيلى جاعدايىن تىكەلەي سەزىنۋىن قارسى الامىز. ەكى ەلدىڭ ءار سالا قايراتكەرلەرىنىڭ جۇڭگو – برازيليا قارىم - قاتىناسىنىڭ ۇزدىكسىز دامۋىن ىلگەرىلەتۋدە بەلسەندى رول اتقارىپ، جۇڭگو - برازيليا دوستىعىن چاڭجياڭ وزەنى مەن امازونكا وزەنى سياقتى تىنباي جالعاستىرۋىن ءۇمىت ەتەمىن.

تاياۋدا برازيليانىڭ سان - پاۋلو شتاتى كامپيناس قالاسىنىڭ بۇرىنعى ورىنباسار باستىعى ەنريك تەشەلا، برازيليا - جۇڭگو دوستىق قوعامىنداعىلار، برازيليا سان - پاۋلو داشۋەسى مەن سان - پاۋلو شتاتتىق داشۋەسىندەگى وقىتۋشى - وقۋشىلار، ريو كوپاكابانا قامال وركەسترى سياقتى ورىندارداعى برازيليالىق دوستار جەكە - جەكە ءتوراعا شي جينپيڭگە حات جولداپ، جۇڭگو ۇكىمەتىنىڭ، كاسىپورىندارىنىڭ جانە جوعارى مەكتەپتەرىنىڭ برازيليا مەن جۇڭگونىڭ دوستىق اۋىس - كۇيىسىنە جانە جەرگىلىكتى ورىننىڭ حالىق تۇرمىسىن جاقسارتۋىنا قوسقان ۇلەسىنە العىس ايتقان بولاتىن.

كەلۋ قاينارى: حالىق تورابى