شالعايدا تۇرساق تا، جاقسى قارىم – قاتىناس جاساپ، تاعدىرلاس بولايىق، قازىر قول ۇستاسىپ جەلكەن جايۋدىڭ دەر شاعىندا تۇرمىز

«حالىق گازەتى»، 11 - ايدىڭ 17 - كۇنى، ريو - دە جانە يرو ، سول جەر ۋاقىتى 11 - ايدىڭ 17 - كۇنى ريو - دە جانە يروعا بارىپ 20 ەل توبى باسشىلارىنىڭ 19 - رەتكى باسشىلار ماجىلىسىنە قاتىناسۋ ءارى برازيليادا مەملەكەتتىك ساپاردا بولۋ قارساڭىندا، مەملەكەت ءتوراعاسى شي جينپيڭ برازيليانىڭ «سان - پاۋلو گازەتىندە» «شالعايدا تۇرساق تا، جاقسى قارىم – قاتىناس جاساپ، تاعدىرلاس بولايىق، قازىر قول ۇستاسىپ جەلكەن جايۋدىڭ دەر شاعىندا تۇرمىز» دەگەن تاقىرىپتا اۆتورلى ماقالا جاريالادى. ماقالانىڭ تولىق مازمۇنى تومەندەگىدەي:

شالعايدا تۇرساق تا، جاقسى قارىم – قاتىناس جاساپ، تاعدىرلاس بولايىق، قازىر قول ۇستاسىپ جەلكەن جايۋدىڭ دەر شاعىندا تۇرمىز

جۇڭحۋا حالىق رەسپۋبليكاسىنىڭ ءتوراعاسى شي جينپيڭ

لۋلا زۇڭتۇڭنىڭ ۇسىنىسىمەن مەن برازيليا فەدەراتسيالىق رەسپۋبليكاسىندا مەملەكەتتىك ساپاردا بولامىن ءارى 20 ەل توبى باسشىلارىنىڭ ريو - دە جانە يرو باسشىلار ماجىلىسىنە قاتىناسامىن.

برازيليانىڭ جەرى كەڭ، بايلىعى مول، كورىنىسى كوركەم، مادەنيەتى كوپ نەگىزدى، جۇڭگو حالقى ۇناتاتىن مەملەكەت. 200 نەشە جىلدىڭ الدىندا جۇڭگونىڭ شاي، ليجى، حوش ءيىستى ماتەريالدار، فارفور ىدىستار سياقتىلارى شالعاي مۇحيتتاردان اسىپ برازيلياعا جەتكىزىلىپ، ەكى ەلدىڭ ەكونوميكا ـ ساۋدا بارىس ـ كەلىسىنىڭ كوپىرىن سالىپ، جۇڭگو، برازيليا حالقىنىڭ دوستىق اۋىس ـ كۇيىسىنىڭ دانەكەرىنە اينالدى.

1974 – جىلى 8 - ايدىڭ 15 - كۇنى جۇڭگو مەن برازيليا رەسمي ديپلوماتيالىق قارىم - قاتىناس ورناتتى. 50 جىلدان بەرى جۇڭگو ـ برازيليا قارىم - قاتىناسى حالىقارالىق اۋمالى ـ توكپەلى جاعدايدىڭ سىنىنان ءوتىپ، كۇن سايىن تولىسىپ، جاندانىپ، ەكى ەلدىڭ ءوز دامۋىن پارمەندى جەبەدى، سونداي ـ اق دۇنيە ءجۇزىنىڭ بەيبىتشىلىگى مەن ورنىقتىلىعىنا بەلسەندى ۇلەس قوسىپ، وركەندەپ كەلە جاتقان ەكى ءىرى ەلدىڭ سەلبەسىپ تەڭ يگىلىككە كەنەلۋىنىڭ، تاعدىرلاس بولۋىنىڭ ۇلگىسىن ورناتتى.

ەكى جاق باستان ـ اياق ءوزارا قۇرمەت ەتۋگە، تەڭ تۇرعىدا مامىلە جاساۋعا تاباندى بولىپ، ءوز حالقى تاڭداعان دامۋ جولىنا تۇسىنىستىكپەن قاراداى جانە قولداۋ كورسەتتى. برازيليا − جۇڭگومەن ستراتەگيالىق سەرىكتەستىك قارىم - قاتىناس ورناتقان تۇڭعىش مەملەكەت، سونداي ـ اق جۇڭگومەن جان ـ جاقتى ستراتەگيالىق سەرىكتەستىك قارىم - قاتىناس ورناتقان لاتىن امەريكاسىنداعى تۇڭعىش مەملەكەت، ەكى ەل قارىم - قاتىناسى باستان ـ اياق جۇڭگونىڭ وركەندەپ كەلە جاتقان ەلدەرمەن قارىم - قاتىناسىنىڭ الدىڭعى لەگىندە كەلەدى. جۇڭگو مەن برازيليا ۇكىمەتتەرى اراسىنداعى پىكىرلەسۋ، سەلبەستىك مەحانيزمى كەمەلدى، ەكى ەلدىڭ جوعارى جىكتەگىلەرىنىڭ سايكەستىرۋ جانە سەلبەستىك كوميتەتى 20 جىل تاماشا جۇمىس جۇرگىزىپ، ەكى جاقتىڭ ءار سالاداعى سەلبەستىگىن سايكەستىرۋ، جوبالاۋ، دامۋدى بىرگە جوسپارلاۋ جاقتارىندا ماڭىزدى رول اتقاردى.

ەكى جاق ءوزارا پايدا جەتكىزىپ، تەڭ يگىلىككە كەنەلۋگە، ابزالدىق ارقىلى ءبىرىن ـ ءبىرى تولىقتاۋعا باستان ـ اياق تاباندى بولىپ، وزدەرىنىڭ وسىزاماندانۋ اياق الىسىن قول ۇستاسا ىلگەرىلەتتى. جۇڭگو ءۇرتىس 15 جىل برازيليانىڭ ءبىرىنشى ۇلكەن ساۋدا سەرىگىنە اينالدى، برازيليانىڭ نەگىزگى شەتەل قارجىسى قاينارىنىڭ ءبىرى. جۇڭگو جاقتىىڭ ساناعىنا قاراعاندا، وتكەن 3 جىلدا جۇڭگونىڭ برازيليادان يمپورت ەتۋدەگى جىلدىق سوماسى 100 ميلليارد دوللاردان اسقان. ەكى ەلدىڭ بىرگە قۇلشىنۋىندا، ەكى جاقتى ساۋدا قۇرىلىمى كۇن سايىن ساپالىلانىپ، سەلبەستىك دەڭگەيى ۇزدىكسىز جوعارىلاپ، ورتاق مۇددە ۇزدىكسىز كەڭەيىپ، اۋىل شارۋاشىلىعى، نەگىزدىك قۇرىلعى، ەنەرگيا بايلىعى، جاسىل دامۋ، عىلىم ـ تەحنيكادا جاڭالىق اشۋ، فينانس سياقتى سالالارداعى ءوزارا ءتيىمدى سەلبەستىكتىڭ كورىنەۋ تۇيىندەرى ارت ـ ارتىنان جارىققا شىعىپ، كورنەكتى ونىمدىلىككە قول جەتكىزىپ، وزدەرىنىڭ ەكونوميكالىق، قوعامدىق دامۋىن پارمەندى جەبەدى.

ەكى جاق باستان ـ اياق اشىق، سيىسىمدى بولۋعا، ءوزارا ۇيرەنۋگە، ءوزارا ۇلگى الۋعا تاباندى بولدى، تابيعي جاقىندىق سەزىمى مەن تاماشا زاتتارعا دەگەن ورتاق تالپىنىسى بار. برازيليانىڭ ايگىلى اقىن، جازۋشىلارى سەسيليا مەرەلەس، ماچادو دە اشيس جۇڭگونىڭ تاڭ ءداۋىرىنىڭ ولەڭدەرىن اۋدارىپ، ەكى جاقتىڭ رۋحاني جاقتان ۋاقىت پەن كەڭىستىكتەن اتتاپ وتكەن ۇندەستىگىن اڭعارتقان بولاتىن. تاياۋ جىلداردان بەرى مۋزىكا، ءبي، ءدامدى تاعام، دەنە تاربيە سياقتىلار ەكى ەل حالقىن تۇتاستىراتىن جاڭا كوپىرگە اينالىپ، ەكى جاقتىڭ ءوزارا ءتۇسىنىسۋى مەن دوستىق سۇيىسپەنشىلىگى ۇزدىكسىز تەرەڭدەدى. برازيليانىڭ سۇيكىمدى حايۋاناتى دەلفين، بوسانوۆا مۋزىكاسى، ەرەكشە ءبيى سامبا جانە كاپوەيرا ونەرى جۇڭگودا كەڭىنەن قارسى الىندى، جۇڭگونىڭ كوكتەم مەرەكەسى سياقتى ءداستۇرلى مەرەكەلەرى، جۇڭگوشا شيپاگەرلىك، ءدارى ـ دارمەك سياقتى ءداستۇرلى مادەنيەتى برازيليا حالقىنا تانىس، ەكى ەلدىڭ جاستارى، تىلشىلەرى، وقىمىستىلارى ءجيى ـ ءجيى بارىس ـ كەلىس جاساپ، جەرگىلىكتى ورىنداردىڭ بارىس ـ كەلىسى بەلسەندى بولىپ، جاندانا ءتۇستى. بيىل ەكى جاق ديپلوماتيالىق قارىم - قاتىناس ورناتۋدىڭ 50 جىلدىعىن قۇتتىقتاۋ قيمىلدارىن وتكىزىپ، ەكى ەل حالقىنا تارتىمدى مادەنيەت سالتاناتىن سيلادى. بىرنەشە كۇننەن بەرى مەن برازيليا − جۇڭگو دوستىق قوعامىنداعىلار، برازيليا داشۋەسىنىڭ وقىتۋشى ـ وقۋشىلارى، ريو كوپاكابانا قامال وركەسترىنىڭ مۇشەلەرى قاتارلى برازيليانىڭ ءار سالاسىنداعى 100 دەن استام دوس قايراتكەردىڭ حاتىن ىركەس ـ تىركەس تاپسىرىپ الدىم، ولار ەكى ەل دوستىعىن تەرەڭدەتۋگە دەگەن شىنايى ءۇمىتىن ءبىلدىرىپتى، مەن بۇعان قاتتى اسەرلەندىم.

ەكى جاق باستان ـ اياق بەيبىت دامۋعا، ادىلدىك پەن ادىلەتتىلىككە تاباندى بولىپ، كوپتەگەن حالىقارالىق جانە وڭىرلىك ماسەلەدەگى كوزقاراسى ۇقساس نەمەسە قارايلاس بولدى. ەكى ەل حالىقارالىق قارىم - قاتىناستىڭ نەگىزگى ولشەمىنىڭ جانە كوپ جاقتىلىقتىڭ باتىل قورعاۋشىسى بولىپ، ۇزاق ۋاقىتتان بەرى بىرلەسكەن مەملەكەتتەر ۇيىمى، 20 ەل توبى، بريكس ەلدەرى سياقتى حالىقارالىق ۇيىمدار مەن كوپ جاقتى مەحانيزمدە دۇنيە جۇزىلىك باسقارۋ، كليمات وزگەرىسى سياقتى كەلەلى كەڭەستىك تاقىرىپتار جونىندە تىعىز سايكەستى. تاياۋدا جۇڭگو مەن برازيليا ۋكراينا داعدارىسىن ساياسي جولمەن شەشۋدى ىلگەرىلەتۋ جونىندەگى ”6 ءتۇرلى ورتاق تانىمدى“ بىرگە جاريالاپ، حالىقارالىق قوعامنىڭ بەلسەندى اڭىسىنا يە بولدى. جۇڭگو مەن برازيليا جاۋاپكەرشىلىك ارقالايتىن ءىرى ەلدىك رولى مەن جاۋاپكەرشىلىگىن قول ۇستاسا ساۋلەلەندىرىپ، دۇنيە ءجۇزىنىڭ كوپ ۇيەكتەنۋى مەن حالىقارالىق قارىم - قاتىناستىڭ دەموكراتيالانۋىن جەبەپ، دۇنيە ءجۇزىنىڭ بەيبىتشىلىگى مەن ورنىقتىلىعىنا وڭ ەنەرگيا قوستى.

قازىر دۇنيە ءجۇزىنىڭ 100 جىلدىق وزگەرىس جاعدايى جەدەل قۇبىلىپ، جاڭا سىن ـ سايىس، جاڭا وزگەرىستەر تولاسسىز جارىققا شىعۋدا. ”ءدۇيىم جۇرت اتقا قوندى، كۇرەسكەرلەر، باتىلدىقپەن العا ۇمتىلعاندار وزىپ شىعىپ، جەڭىسكە جەتەدى“. شىعىس، باتىس جارتى شارداعى وركەندەپ كەلە جاتقان ەكى ءىرى ەل جانە بريكس ەلدەرىنىڭ ماڭىزدى مۇشەسى رەتىندە، جۇڭگو مەن برازيليا اناعۇرلىم تىعىز ىنتىماقتاسىپ، باتىلدىقپەن ”جول اشۋشى“ جانە ”تولقىن قۋۋشى“ بولىپ، تىزە قوسا جاڭا سۋ جولىن اشىپ، ەكى ەل حالقىنا ادامزاتقا ءتان اناعۇرلىم كوركەم بولاشاققا قاراي قول ۇستاسا قادام تاستاۋى كەرەك.

ءبىز جۇڭگو ـ برازيليا دوستىعىنىڭ جالپى بەتالىسىن مىقتى يگەرۋىمىز كەرەك. ەكى جاق ءوزارا قۇرمەت ەتۋگە، ءوزارا سەنىم ارتۋعا، ءوزارا ۇيرەنۋگە، ءوزارا ۇلگى الۋعا باستان ـ اياق تاباندى بولىپ، ۇكىمەت، ساياسي پارتيا، زاڭ شىعارۋ ورگانى سياقتى ءار دارەجەلى، ءار سالاداعى بارىس ـ كەلىستى ونان ارى جيىلەتىپ، ەل باسقارۋ جانە دامۋ تاجىريبەلەرى اۋىس ـ كۇيىسىن كۇشەيتىپ، ستراتەگيالىق ءوزارا سەنىمدىلىكتى ۇزدىكسىز بەكەمدەپ، ەكى ەل قارىم - قاتىناسىنىڭ ساياسي نەگىزىن بەكەمدەۋى كەرەك. ەكى ەلدىڭ جوعارى جىكتەگىلەرىنىڭ سايكەستىرۋ جانە سەلبەستىك كوميتەتى، جالپى بەتتىك ستراتەگيالىق پىكىرلەسۋ سياقتى سەلبەستىك مەحانيزمىنىڭ رولىن ۇزدىكسىز تولىق ساۋلەلەندىرىپ، ورنىقتى، پىسىپ ـ جەتىلگەن ءىرى ەلدىك قارىم - قاتىناستى بەلسەنە ورناتىپ، ەكى ەل قارىم - قاتىناسىنىڭ ورنىقتى، باياندى دامۋىن ىلگەرىلەتۋ كەرەك.

ءبىز جۇڭگو مەن برازيليانىڭ ءوزارا ءتيىمدى سەلبەستىگىنىڭ جاڭا قوزعاۋشى كۇشىن جەتىلدىرۋىمىز كەرەك. جۇڭگو مەن برازيليا ەكونوميكانىڭ دامۋىن جەدەلدەتۋدى، حالىقتىڭ ىرىس - قۇتىن جاقسارتۋدى ماڭىزدى نىسانا ەتىپ، وسىزامانداندىرۋدى جۇزەگە اسىرۋ جولىندا قۇلشىنا العا باسىپ كەلەدى. قازىر جاڭا كەزەكتى عىلىم ـ تەحنيكا توڭكەرىسى مەن كاسىپ سالاسى وزگەرىسى جەدەل دامۋدا، ەكى جاق ءداۋىر ورايىن مىقتاپ يگەرىپ، ”ءبىر بەلدەۋ، ءبىر جولدى“ بىرگە قۇرۋ باستاماسىن برازيليانىڭ دامۋ ستراتەگياسىمەن ۇشتاستىرۋدى ۇزدىكسىز ىلگەرىلەتىپ، ەكى ەلدىڭ ءوزارا ءتيىمدى سەلبەستىگىنىڭ ستراتەگيالىق، جان ـ جاقتى، باستامالىق سيپاتىن ۇزدىكسىز جوعارىلاتىپ، ءداۋىر اعىمىنا ۇيلەسەتىن، حالىققا باياندى تيىمدىلىك جەتكىزەتىن اناعۇرلىم كوپ ۇلگى نىساندارىن تۇلعالاپ، ءوز ەلدەرىنىڭ جانە وڭىرلەرىنىڭ بىرگە دامۋىن جەبەۋى كەرەك.

ءبىز جۇڭگو - برازيليا حالىقتارىنىڭ دوستىق نەگىزىن بەكەمدەۋىمىز كەرەك. جۇڭگو مەن برازيليانىڭ مادەنيەتى باي مازمۇندى، باۋراعىشتىعى وزگەشە، ءوزارا كورىك قوسىپ، ءبىرىن ـ ءبىرى باۋرايدى. ەكى جاق اشىق، سيىسىمدى بولۋ تاڭداۋلى ءداستۇرىن ۇزدىكسىز ساۋلەلەندىرىپ، مادەنيەت، وقۋ ـ اعارتۋ، عىلىم ـ تەحنيكا، دەنساۋلىق ساقتاۋ، دەنە تاربيە، ساياحات، جەرگىلىكتى ورىندار سياقتى سالالارداعى اۋىس ـ كۇيىستى، سەلبەستىكتى تەرەڭدەتىپ، ەكى ەلدىڭ قارسى جاق حالقىنىڭ كوكەيىندە اناعۇرلىم شىنايى، سترەولدى، جاندى بولۋىنا مۇمكىندىك جاساپ، جۇڭگو مەن برازيليانىڭ ءداستۇرلى دوستىعىن جالعاستىرۋ ءۇشىن اناعۇرلىم كوپ حالىقتىق ەلشىلەردى جەتىلدىرىپ، ەكى ەل وركەنيەتىنىڭ دوستىق بارىس ـ كەلىس بارىسىندا جاراسىمدى قاتار ءومىر سۇرۋىنە، سيىسىمدى بولۋىنا مۇمكىندىك جاساپ، دۇنيە ءجۇزى وركەنيەتىنىڭ گۇل باقشاسىن ۇزدىكسىز بايىتۋى كەرەك.

ءبىز جۇڭگو مەن برازيليانىڭ ىنتىماقتى، ءوزارا كومەكتەسەتىن ءىرى ەلدىك جاۋاپكەرشىلىگىن ايگىلەۋىمىز كەرەك. قازىر ”دۇنيە ءجۇزىنىڭ وڭتۇستىگى“ توپتىق ەڭسە كوتەردى، ءبىراق ونىڭ ءۇنى مەن تالابى قازىرگى حالىقارالىق باسقارۋ جۇيەسىندە ءالى تولىق بەينەلەنبەدى. دۇنيە جۇزىندەگى باستى وركەندەپ كەلە جاتقان ءىرى ەل رەتىندە، ءبىز تاريح بىزگە جۇكتەگەن جاۋاپكەرشىلىكتى ارقالاپ، ”دۇنيە ءجۇزىنىڭ وڭتۇستىگىندەگى“ قالىڭ ەلمەن بىرگە وركەندەپ كەلە جاتقان ەلدەردىڭ ورتاق مۇددەسىن باتىل قورعاپ، دۇنيە جۇزىلىك سايىستارعا سەلبەسە توتەپ بەرىپ، دۇنيە جۇزىلىك باسقارۋ جۇيەسىنىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتىپ، دۇنيە ءجۇزىنىڭ بەيبىتشىلىگىنە، ورنىقتىلىعىنا جانە بىرگە دامۋىنا جۇڭگو مەن برازيليانىڭ ۇلەسىن قوسۋىمىز كەرەك.

مەنىڭ بۇل جولعى برازيلياعا ساپارلاي بارۋداعى تاعى ءبىر ماڭىزدى ماقساتىم − 20 ەل توبى باسشىلارىنىڭ ماجىلىسىنە قاتىناسۋ. 20 ەل توبى − حالىقارالىق ەكونوميكالىق سەلبەستىكتىڭ ماڭىزدى تۇعىرى. برازيليا ءتوراعا ەل بولعاننان كەيىن، ”ءادىل دۇنيە ءجۇزىن جانە باياندى پلانەتانى قۇرۋ“ نەگىزگى تاقىرىبىن تۇراقتاندىرىپ، 20 ەل توبىنىڭ ءار سالاداعى سەلبەستىگىن بەلسەنە ىلگەرىلەتىپ، ريو - دە جانە يرو باسشىلار ءماجىلىسىن ءساتتى وتكىزۋگە تاماشا نەگىز قالادى. لۋلا زۇڭتۇڭ ”اشارشىلىق پەن كەدەيلىككە قارسى اتتانۋدى“ ريو - دە جانە يرو باسشىلارءماجىلىسىنىڭ باستى تاقىرىبى ەتىپ، ”اشارشىلىق پەن كەدەيلىككە قارسى اتتانۋ دۇنيە جۇزىلىك وداعىن“ قۇرۋ جونىندە باستاما كوتەردى، جۇڭگو جاق مۇنى ايرىقشا القايدى ءارى بەلسەنە قولدايدى.

ءادىل دۇنيە ءجۇزىن قۇرۋ 20 ەل توبىنىڭ ءوزارا قۇرمەت ەتۋ، تەڭ تۇرعىدا سەلبەسۋ، ءوزارا پايدا جەتكىزىپ، تەڭ يگىلىككە كەنەلۋ پرينسيبى بويىنشا، ”دۇنيە ءجۇزىنىڭ وڭتۇستىگىندەگى“ ەلدەردىڭ اناعۇرلىم زور دامۋدى جۇزەگە اسىرۋىن قولداۋىن قاجەت ەتەدى. دامۋدى 20 ەل توبى سەلبەستىگىنىڭ وزەكتى ورنىنا قويىپ، بىرلەسكەن مەملەكەتتەر ۇيىمىنىڭ 2030 ـ جىلعا دەيىنگى باياندى دامۋ كۇن ءتارتىبىن جۇزەگە اسىرۋدى ماڭداي الدى قىزمەت ەتىپ، دۇنيە جۇزىلىك باياندى دامۋ سەرىكتەستىك قارىم - قاتىناسىن ورناتىپ، اناعۇرلىم سيىسىمدى، اناعۇرلىم جالپىعا ءتيىمدى، اناعۇرلىم سەرپىمدى دۇنيە جۇزىلىك دامۋدى جۇزەگە اسىرۋدى ىلگەرىلەتۋ كەرەك. حالىقارالىق اقشا قورى ۇيىمى، دۇنيە ءجۇزى بانكەسى، دۇنيە جۇزىلىك ساۋدا ۇيىمى رەفورماسىن بەلسەنە ىلگەرىلەتىپ، ”دۇنيە ءجۇزىنىڭ وڭتۇستىگىنىڭ“ ۋاكىلدىك سيپاتى مەن ءسوز سويلەۋ ۇقىعىن جوعارىلاتۋ كەرەك. ماكرولىق ەكونوميكا ساياساتىن سايكەستىرۋدى كۇشەيتىپ، ساۋدا مەن قارجى قوسۋدىڭ ەركىن، قولايلى بولۋىن ىلگەرىلەتىپ، اشىق، سيىسىمدى، كەمسىتپەيتىن حالىقارالىق ەكونوميكالىق سەلبەستىك ورتاسىن قالىپتاستىرۋ كەرەك.

باياندى پلانەتا قۇرۋ 20 ەل توبىنىڭ باياندى ءوندىرىس ءتاسىلىن، تۇرمىس ءتاسىلىن دارىپتەپ، ادام مەن تابيعاتتىڭ جاراسىمدى قاتار ءومىر ءسۇرۋىن جۇزەگە اسىرۋىن قاجەت ەتەدى. جاسىل، تومەن كومىرتەكتى بولۋ، قورشاعان ورتانى قورعاۋ، ەنەرگيادا بۇرىلىس جاساۋ، كليمات وزگەرىسىنە توتەپ بەرۋ سياقتى سالالارداعى حالىقارالىق سەلبەستىكتى ىشكەرىلەي ىلگەرىلەتىپ، ورتاق، ءبىراق پارىقتى جاۋاپكەرشىلىك پرينسيبىن ۇستانىپ، قارجى، تەحنيكا، قابىلەت قۇرىلىسى سياقتى جاقتاردا ”دۇنيە ءجۇزىنىڭ وڭتۇستىگىندەگى“ ەلدەرگە اناعۇرلىم كوپ قولداۋ كورسەتۋ كەرەك. 32 جىلدىڭ الدىندا بىرلەسكەن مەملەكەتتەر ۇيىمىنىڭ قورشاعان ورتا جانە دامۋ جينالىسى ريو - دە جانە يرودا وتكىزىلىپ، «21 - عاسىر كۇن ءتارتىبى» سياقتى ماڭىزدى تابىستارعا قول جەتكىزدى. 20 ەل توبى باسشىلارىنىڭ ريو - دە جانە يرودا باس قوسۋىنداعى ماڭىزدى كۇن ءتارتىبىنىڭ ءبىرى − دۇنيە ءجۇزىنىڭ جاسىل، تومەن كومىرتەكتى دامۋىن تالقىلاۋ. ريو - دە جانە يرو باسشىلار ءماجىلىسىنىڭ دۇنيە ءجۇزىنىڭ باياندى دامۋىنا اناعۇرلىم زور قوزعاۋشى كۇش جانە اناعۇرلىم كۇشتى سەنىم ۇستەۋىن ءۇمىت ەتەمىن.

مەن 20 ەل توبى باسشىلارىنىڭ ريو - دە جانە يرو باسشىلار ءماجىلىسىنىڭ، ءسوز جوق، سۇبەلى تابىستارعا قول جەتكىزىپ، 20 ەل توبىنىڭ تاريحي ۇردىسىندە ايقىن ”برازيليا تاڭباسىن“ قالدىراتىندىعىنا سەنەمىن. مەن دە لۋلا زۇڭتۇڭمەن بىرگە قۇلشىنىپ، جۇڭگو ـ برازيليا قارىم ـ قاتىناسىنىڭ جاڭا ”التىن 50 جىلدىققا“ قادام تاستاۋىنا جەتەكشىلىك ەتىپ، اناعۇرلىم ءادىل جانە اناعۇرلىم باياندى تاعدىرلاس ورتاق تۇلعا قۇرۋدى ءۇمىت ەتەمىن.