شي جينپيڭ لي جياچاۋدىڭ قىزمەتتەن ەسەپ بەرۋ مالىمەتىن تىڭدادى

12 - ايدىڭ 13 - كۇنى مەملەكەت ءتوراعاسى شي جينپيڭ جۇڭنانحايدا بەيجيڭگە قىزمەتىنەن ەسەپ بەرۋگە كەلگەن شياڭگاڭ ەرەكشە اكىمشىلىك رايونىنىڭ اكىمى لي جياچاۋمەن كەزدەستى.

سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن

شينحۋا اگەنتتىگى، 12 - ايدىڭ 13 - كۇنى، بەيجيڭ. مەملەكەت ءتوراعاسى شي جينپيڭ 12 - ايدىڭ 13 - كۇنى تۇستەن كەيىن جۇڭنانحايدىڭ يىڭتاي سارايىندا بەيجيڭگە قىزمەتتەن ەسەپ بەرۋگە كەلگەن شياڭگاڭ ەرەكشە اكىمشىلىك رايونىنىڭ اكىمى لي جياچاۋمەن كەزدەسىپ، ونىڭ شياڭگاڭنىڭ قازىرگى جاعدايىنان جانە ەرەكشە اكىمشىلىك رايون ۇكىمەتىنىڭ قىزمەت احۋالىنان بەرگەن مالىمەتىن تىڭدادى.

شي جينپيڭ مىنالاردى ءبىلدىردى: ءبىر جىلدان بەرى اكىم لي جياچاۋ ەرەكشە اكىمشىلىك رايون ۇكىمەتىن باستاپ، جاۋاپكەرلىك ارقالاپ، ىسكەرلىك كورسەتىپ، ناقتى ىستەر ىستەپ العا باسىپ، ءتۇبىرلى زاڭنىڭ 23 - تارماعىنداعى زاڭ شىعارۋدى تاريحي تۇردە ورىنداپ، زەيىن - زەردەنى شوعىرلاندىرا وتىرىپ ەكونوميكاعا ۇمتىلىپ، دامۋدى جوبالاپ، تۇرعىن ءۇي، ەمدەۋ سياقتى حالىق تۇرمىسىنداعى قيىن ماسەلەلەردى شەشۋدى ىلگەرىلەتىپ، سىرتپەن اۋىس - كۇيىستى، سەلبەستىكتى كۇشەيتىپ، حالىقارالىق ىقپالىن ۇزدىكسىز جوعارىلاتىپ، شياڭگاڭنىڭ ورنىقتىلىق، دامۋ تاماشا جاعدايىن ونان ارى بەكەمدەدى. ورتالىق اكىم لي جياچاۋ مەن ەرەكشە اكىمشىلىك رايون ۇكىمەتىنىڭ قىزمەتىن تولىق تۇراقتاندىرادى.

شي جينپيڭ بىلاي دەپ اتاپ كورسەتتى: جۇڭگو كوممۋنيستىك پارتياسى 20 - كەزەكتى ورتالىق كوميتەتىنىڭ ءۇشىنشى جالپى ءماجىلىسى رەفورمانى اناعۇرلىم جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىندە جۇيەلى ورنالاستىرۋ جاساپ، ”ءبىر ەل، ەكى ءتۇزىمنىڭ“ تۇزىمدىك ابزالدىعىن ساۋلەلەندىرۋ كەرەكتىگىن باسا دارىپتەدى، شياڭگاڭنىڭ دامۋى جاڭا تاريحي ورايعا ءدوپ كەلدى. ورتالىق ”ءبىر ەل، ەكى ءتۇزىم“ باعىتىن ۇزدىكسىز جان - جاقتى، دۇرىس دايەكتىلەندىرىپ، اكىم مەن ەرەكشە اكىمشىلىك رايون ۇكىمەتىنىڭ قوعامنىڭ ءار سالاسىنداعىلاردى ىنتىماقتاستىرىپ، باستاپ، باتىلدىقپەن رەفورما جاساپ، قايراتتانا العا ۇمتىلىپ، مەملەكەت ستراتەگياسىمەن بەلسەنە ۇشتاسىپ، ەكونوميكالىق دامۋدىڭ جاڭا قوزعاۋشى كۇشىن، جاڭا ابزالدىعىن سومداپ، جاڭالىق اشۋ، جاسامپازدىق جاراتۋ بارىسىندا شياڭگاڭدى باسقارۋدى جانە گۇلدەندىرۋدى ىلگەرىلەتىپ، شياڭگاڭنىڭ گۇلدەنۋى مەن ورنىقتىلىعى ءۇشىن اناعۇرلىم زور ۇلەس قوسۋىن بار كۇشپەن قولدايدى.

لي چياڭ، ساي چي، ديڭ شۋەشياڭ، شى تايفىڭ، چىن ۋىنچيڭ، شيا باۋلۇڭ قاتارلىلار كەزدەسۋگە قاتىناستى.

كەلۋ قاينارى: حالىق تورابى