شي جينپيڭ جۇڭگو - قىرعىزستان - وزبەكستان تەمىر جولى نىسانىنىڭ باستالۋ سالتىنا قۇتتىقتاۋ حاتىن جولدادى

شينحۋا اگەنتتىگى، 12 - ايدىڭ 27 – كۇنى، بەيجيڭ. 12 - ايدىڭ 27 - كۇنى جۇڭگو - قىرعىزستان - وزبەكستان تەمىر جولى نىسانىنىڭ باستالۋ سالتى قىرعىزستاننىڭ جالالاباد قالاسىندا وتكىزىلدى. جۇڭگونىڭ مەملەكەت ءتوراعاسى شي جينپيڭ باستالۋ سالتىنا قۇتتىقتاۋ حاتىن جولدادى، قىرعىزستان زۇڭتۇڭى جاپاروۆ ناق مايداندا قيمىلعا قاتىناستى، وزبەكستان زۇڭتۇڭى مىرزيويەۆ قۇتتىقتاۋ حاتىن جولدادى.

شي جينپيڭ بىلاي دەپ اتاپ كورسەتتى: جۇڭگو - قىرعىزستان - وزبەكستان تەمىر جولىن سالۋ − 3 ەل ۇكىمەتىنىڭ وڭىرلەردىڭ ۇلاسۋىن، تۇتاسۋىن، رايونداردىڭ گۇلدەنۋىن، ورنىقتىلىعىن جەبەۋدى كوزدە ۇستاپ شىعارعان ستراتەگيالىق شەشىمى، بۇل 3 ەل حالقىنىڭ وسى ستراتەگيالىق ارنانى اشۋداعى ىزگى ارمانىن ايگىلەيدى. بۇگىنگى باستالۋ سالتى نىساننىڭ ويداعى جوبادان اتقارىلۋعا ويىسقانىن، سالىنىپ بولىپ پويەز قاتىناۋ نىساناسىنا قاراي شەشۋشى قادام تاستاعاندىعىن ايگىلەيدى.

شي جينپيڭ بىلاي دەپ باسا دارىپتەدى: 3 ەلدىڭ قاتىستى تاراۋلارىنىڭ جانە كاسىپورىندارىنىڭ تىزە قوسا سەلبەسىپ، ينجەنەريا قۇرىلىسىن جوعارى ولشەممەن، جوعارى ساپامەن ىلگەرىلەتىپ، جۇڭگو - قىرعىزستان - وزبەكستان تەمىر جولىن ”ءبىر بەلدەۋ، ءبىر جولدى“ بىرگە قۇرۋ سەلبەستىگىنىڭ جاڭا ۇلگى كورسەتۋ نىسانى ەتىپ تۇلعالاۋعا قۇلشىنىپ، جەلى بويىنداعى وڭىرلەردىڭ ەكونوميكاسىنىڭ، قوعامىنىڭ دامۋىنا جانە حالىق تۇرمىسىنىڭ قۇت - ىرىسىن جاقسارتۋعا اناعۇرلىم ويداعىداي كۇش قوسىپ، اناعۇرلىم تىعىز جۇڭگو - ورتا ازيا تاعدىرلاس ورتاق تۇلعاسىن قۇرۋعا تىڭ قوزعاۋشى كۇش ۇستەۋىن ءۇمىت ەتەمىن.

جاپاروۆ مىنالاردى ءبىلدىردى: جۇڭگو - قىرعىزستان - وزبەكستان تەمىر جولى تەك قاتىناس - تاسىمال ءدالىزى عانا ەمەس ءارى شىعىس پەن باتىس جاقتى تۇتاستىراتىن ستراتەگيالىق ارنا. اتالعان نىسان قىرعىزستاننىڭ قاتىناس تورابى ورنىن كۇشەيتىپ قانا قويماي، قىرۋار جۇمىستانۋ ورنىن ازىرلەپ، ەكونوميكا - ساۋدا، ساياحات جانە ونەركاسىپ سياقتى سالالاردىڭ دامۋىن جەبەيدى. 3 ەلدىڭ تەمىر جول قۇرىلىسىن جوعارى ساپالى ورىنداپ، وسى رايوننىڭ بىرگە دامۋى ءۇشىن جاڭا دا كەڭ بولاشاق اشاتىندىعىنا سەنەمىن.

مىرزيويەۆ مىنالاردى ءبىلدىردى: جۇڭگو - قىرعىزستان - وزبەكستان تەمىر جولى نىسانىنىڭ رەسمي باستالۋى − 3 ەل مەملەكەت باسشىسىنىڭ ورتاق تانىمىن تياناقتاندىرۋداعى، ءوزارا تيىمدىلىك جەتكىزۋ سەلبەستىگىن جەبەۋدەگى، ”ءبىر بەلدەۋ، ءبىر جولدى“ بىرگە قۇرۋدى ىلگەرىلەتۋدەگى ماڭىزدى شارا، كەلەلى تاريحي مانگە يە. اتالعان تەمىر جول ءوڭىردىڭ ساۋدا - ساتىعىن جانە ءبىر تۇلعالانۋىن ىلگەرىلەتىپ، ادامداردىڭ بارىس - كەلىسى مەن گۋمانيتارلىق بايلانىسىن جەبەپ، وركەنيەتتەردىڭ ءوزارا ۇلگى الۋىنىڭ ماڭىزدى كوپىرىن سالىپ، وڭىردەگى مەملەكەتتەر مەن حالىقتاردى باقىتقا كەنەلتۋگە پايدالى.

جۇڭگو - قىرعىزستان - وزبەكستان تەمىر جولى نىسانىنىڭ باستالۋ سالتىن جۇڭگو مەملەكەتتىك دامۋ جانە رەفورما كوميتەتى، قىرعىزستان قاتىناس جانە حابارلاسۋ مينيسترلىگى، وزبەكستان قاتىناس مينيسترلىگى بىرگە وتكىزدى.

كەلۋ قاينارى: حالىق تورابى