شينجياڭ ءوندىرىس – قۇرىلىس بيڭتۋانىنىڭ بۇرىنعى ورىنباسار سىليڭيۋانى جياۋ شياۋپيڭ ءبىرىنشى رەتكى سوتتا 14 جىلدىق مەرزىمدى قاماق جازاسىنا ۇكىم ەتىلدى 

2024 – جىلى 12 – ايدىڭ 23 – كۇنى، چۇڭچيڭ قالالىق 5 – ورتا دارەجەلى حالىق سوتى شينجياڭ ءوندىرىس – قۇرىلىس بيڭتۋانى پارتكومىنىڭ بۇرىنعى تۇراقتى مۇشەسى، بۇرىنعى ورىنباسار سليڭيۋانى جياۋ شياۋپيڭنىڭ پارا الۋ دەلوسى تۋرالى ءبىرىنشى رەتكى سوتتىڭ ۇكىمىن اشىق جاريالاپ، جياۋ شياۋپيڭدى پارا الۋ قىلمىسى بويىنشا 14 جىلدىق مەرزىمدى قاماق جازاسىنا ۇكىم ەتتى ءارى وعان حالىق اقشاسى بويىنشا بەس ميلليون يۋان ايىپ سالدى، ونىڭ پاراعا العان مال – مۇلكى مەن ءوسىمىن زاڭ بويىنشا قايتارىپ الىپ، مەملەكەت قازىناسىنا تاپسىردى.

تەكسەرىپ انىقتاۋعا قاراعاندا، ايىپكەر جياۋ شياۋپيڭ 2000 – جىلدان 2022 – جىلعا دەيىن قازىنا مينيسترلىگى كەڭسە مەڭگەرمەسى مينيستر كەڭسەسىنىڭ ورىنباسار باسقارما باستىعى دارەجەسىندەگى حاتشىسى، قازىنا مينيسترلىگىنىڭ حالىقارالىق مەڭگەرمەسىنىڭ قازىنانى ساناققا الۋ باسقارماسىنىڭ باسقارما باستىعى دارەجەلى كادرى، جۇڭگو پاك دامۋ مەحانيزمى قور باسقارۋ ورتالىعىنىڭ ورىنباسار مەڭگەرۋشىسى، مەڭگەرۋشىسى، قازىنا مينيسترلىگىنىڭ ۇكىمەت پەن قوعامدىق كاپيتالدىڭ سەلبەسۋى ورتالىعىنىڭ مەڭگەرۋشىسى قاتارلى قىزمەتتەردى ىستەگەن كەزدە، قىزمەتتەگى قولايلىلىقتان، سونداي – اق، قىزمەت ۇقىعى مەن قىزمەت ورنىنان قالىپتاسقان قولايلى شارت – جاعدايدان پايدالانىپ، قاتىستى ورىندار مەن جەكەلەرگە قارىز اقشا الۋىن بەكىتۋ، جارنا ۇقىعىن ساتىپ الۋ قاتارلى جاقتاردا كومەكتەسىپ، جيىنى 67 ميلليون 430 مىڭ يۋان اقشانى زاڭسىز تۇردە قابىلداعان.

چۇڭچيڭ قالالىق ورتا دارەجەلى 5 – حالىق سوتى بىلاي دەپ قاراعان: ايىپكەر جياۋ زوپيڭنىڭ ارەكەتى قىلمىس قالىپتاستىرعان، سوماسى ەرەكشە قوماقتى، زاڭ بويىنشا جازالاۋ كەرەك. جياۋ شياۋپيڭنىڭ پارا الۋ قىلمىسىنىڭ اراسىندا ىسكە اسپاعان تۇستارى بار، دەلو بايقالعان سوڭ ءوزىنىڭ قىلمىسىن شىنايى بايانداعان، دەلو ءبىتىرۋشى قۇرىلىمدار ءالى بايقاماعان پارا الۋعا قاتىستى ءىشىنارا فاكتتەردى ىرىقتىلىقپەن بايانداعان، قىلمىسىن مويىنداپ، وكىنەتىنىن بىلدىرگەن، قاراجاتتى بەلسەندىلىكپەن قايتارعان، دەلوعا قاتىستى قاراجات تۇگەلىمەن قايتارىپ الىنعان، زاڭ بويىنشا جازانى جەڭىلدەتىپ كەسۋگە بولادى. سوت مەكەمەسى جوعارىداعىداي ۇكىم شىعارعان.

(باس ستانسيا ورتالىق تەلەۆيزيا ءتىلشىسى شي دانني، جاڭ ساي)

كەلۋ قاينارى: حالىق تورابى