جياڭ پىڭجۇي ا ق ش – نان ەلگە قايتارىپ اكەلىندى 

جۋىردا ورتالىقتىڭ شىرىكتەسۋگە قارسى تۇرۋدى سايكەستىرۋ گرۋپپاسىنىڭ حالىقارالىق قاشقىنداردى قۋعىنداۋ، قاراجاتتى قايتارىپ الۋ قىزمەتى كەڭسەسىنىڭ ءبىرتۇتاس جوسپارلاپ سايكەسۋىندە، بەيجيڭ قالاسىنداعى باقىلاۋ ورگاندارى مەن قوعام حاۋىپسىزدىگى ورگاندارى قاتىستى مەملەكەتتەردىڭ زاڭ اتقارۋ قۇرىلىمدارىمەن سەلبەستىك جاساپ، قىزمەتتىك قىلمىس وتكىزۋ كۇمانىمەن شەتەلدە قاشىپ جۇرگەن جياڭ پىڭجۇيدى شەكارا سىرتىندا قولعا ءتۇسىردى ءارى ەلىمىزگە قايتارىپ اكەلدى.

جياڭ پىڭجۇي، ەر، 1978 – جىلى 1 – ايدا تۋعان، بەيجيڭ استىق توبى شەكتى جاۋاپكەرشىلىك سەرىكتەستىگىنىڭ بۇرىنعى ورىنباسار باس مەڭگەرۋشىسى، اۋىر قىزمەتتىك قىلمىس وتكىزۋ كۇمانىنا شاتىلعان، 2023 – جىلى 11 – ايدا شەتەلگە قاشقان. 2024 – جىلى 4 – ايدا بەيجيڭ چاۋياڭ رايوندىق باقىلاۋ كوميتەتى ونىڭ ۇستىنەن دەلو تۇرعىزىپ، تەكسەرۋ جۇرگىزگەن. دەلونى ءبىتىرۋشى ورگاندار قاشقىندى قۋعىنداۋ، قاراجاتتى قايتارىپ الۋ قىزمەتىن كۇش سالا ورىستەتىپ، جياڭ پىڭجۇيدىڭ شەتەلدە ىرىقتىلىقپەن ءوزىن مالىمدەۋىن ىسكە اسىرعان.

ورتالىقتىڭ قاشقىنداردى قۋعىنداۋ كەڭسەسىنىڭ جاۋاپتىسى مىنانى ءبىلدىردى: جياڭ پىڭجۇيدىڭ ءوزىن مالىمدەۋى ”الەمدىك تور جايۋ ارەكەتىن“ ۇزدىكسىز ورىستەتۋدەگى كەلەلى جەتىستىك بولىپ تابىلادى. ءبىز قاشقانداردى، ءسوزسىز، قۋعىنداۋدا، سوڭىنا دەيىن قۋعىنداۋدا تاباندى بولىپ، قاشقىنداردى قۋعىنداۋ، قىلمىس كۇماندىلارىنىڭ شەتەلگە قاشۋىنان ساقتانىپ، اقشانى قايتارىپ الۋ مەحانيزمىن كەمەلدەندىرىپ، شىرىكتەسۋگە قارسى تۇرۋ جاعىندا حالىقاراداعى ءادىليا جانە زاڭ اتقارۋ جاعىنداعى سەلبەستىكتى كۇشەيتىپ، شەتەلگە قاشقان شىرىكتەسكەندەردى قولعا ءتۇسىرىپ، زاڭ قۇرىعىنا ءىلىندىرىپ، مەملەكەت پەن حالىقتىڭ مۇددەسىن باتىل قورعايمىز.

كەلۋ قاينارى: حالىق تورابى