سىرتقى ىستەر مينيسترلىگىنىڭ مالىمدەمەشىسى ا ق ش – نىڭ جۇڭگونىڭ تايۋان وڭىرىنە اسكەري كومەك بەرەتىنىن، قارۋ – جاراق ساتاتىنىن جاريالاعانى جونىندە تىلشىلەردىڭ سۇراۋىنا جاۋاپ قايتاردى 

شينحۋا اگەنتتىگىنىڭ 12 – ايدىڭ 22 – كۇنى بەيجيڭنەن بەرگەن حابارى. سىرتقى ىستەر مينيسترلىگىنىڭ مالىمدەمەشىسى 12 – ايدىڭ 22 – كۇنى ا ق ش – نىڭ جۇڭگونىڭ تايۋان وڭىرىنە اسكەري كومەك بەرەتىنىن، قارۋ – جاراق ساتاتىنىن جاريالاعانى جونىندە تىلشىلەردىڭ سۇراۋىنا جاۋاپ قايتاردى.

ءتىلشى بىلاي دەپ سۇرادى: 12 – ايدىڭ 21 – كۇنى، ا ق ش اق سارايى تايۋانعا 571 ميلليون 300 مىڭ ا ق ش دوللارىندىق اسكەري كومەك بەرەتىنىن جاريالاعان. سول كۇنى ا ق ش قورعانىس مينيسترلىگى جاريالاعان مالىمەتكە قاراعاندا، ا ق ش مەملەكەتتىك كەڭەسى جالپى سوماسى 295 ميلليون ا ق ش دوللارىندىق قارۋ – جاراقتى تايۋانعا ساتۋدى ماقۇلداعان. جۇڭگو جاق بۇعان قانداي پىكىر بىلدىرەدى؟

مالىمدەمەشى بىلاي دەدى: ا ق ش – نىڭ جۇڭگونىڭ تايۋان وڭىرىنە تاعى دا اسكەري كومەك بەرۋى، قارۋ – جاراق ساتۋى ءبىر جۇڭگو پرينسيبىنە جانە جۇڭگو مەن ا ق ش اراسىنداعى ءۇش رەتكى بىرلەسكەن مالىمدەمەدەگى، وتە – موتە، ”17 – تامىز“ مالىمدەمەسىندەگى بەلگىلەمەلەرگە اۋىر دارەجەدە قايشى كەلىپ، جۇڭگونىڭ يەلىك ۇقىعى مەن حاۋىپسىزدىك مۇددەسىنە اۋىر دارەجەدە سۇعاناقتىق جاساۋ سانالادى، ا ق ش – نىڭ مەملەكەت باسشىسىنىڭ ”تايۋان دەربەستىگىن“ قولداماۋ تۋرالى ۋادەسىنە اۋىر دارەجەدە قايشى كەلىپ، ”تايۋان دەربەستىگى“ بولشەكتەۋشى كۇشتەرىنە اۋىر دارەجەدە قاتە سيگنال بەرەدى. جۇڭگو جاق بۇعان قاتاڭ نارازىلىق بىلدىرەدى، باتىل قارسى تۇرادى، وسى جونىندە ا ق ش جاقپەن دەرەۋ قاتاڭ سويلەستى.

مالىمدەمەشى مىنانى اتاپ كورسەتتى: تايۋان ماسەلەسى — جۇڭگونىڭ وزەكتى مۇددەلەرىنىڭ ىشىندەگى وزەكتىسى، جۇڭگو – ا ق ش قارىم – قاتىناسىنداعى اتتاپ وتۋگە بولمايتىن قىزىل سىزىق. ا ق ش جاقتىڭ ”قارۋلى كۇشپەن دەربەستەنۋگە كومەكتەسۋى“ تەك پالەگە ۇرىنعاندىق، ”تايۋان ارقىلى جۇڭگونى تەجەۋدىڭ“ ىسكە اسپايتىنى داۋسىز. جۇڭگو جاق ا ق ش جاقتى تايۋاندى قارۋلاندىرۋدى توقتاتۋعا، تايۋان بۇعازىنىڭ بەيبىتشىلىگى مەن ورنىقتىلىعىن بۇلدىرەتىن حاۋىپتى ارەكەتتەردى توقتاتۋعا قۋزايدى. جۇڭگو جاق بارلىق قاجەتتى شارالاردى قولدانىپ، مەملەكەتتىڭ يەلىك ۇقىعىن، حاۋىپسىزدىگىن جانە تەرريتوريا تۇتاستىعىن باتىل قورعايدى.

كەلۋ قاينارى: حالىق تورابى