گۋاڭشي جۋاڭزۋ اۆتونوميالى رايوندىق حالىق قۇرىلتايى تۇراقتى كوميتەتى پارتگرۋپپاسىنىڭ بۇرىنعى ورىنباسار شۋجيى، ورىنباسار مەڭگەرۋشىسى جاڭ شيۋلۇڭنىڭ پارا الۋ دەلوسىنا ءبىرىنشى سوتتا ۇكىم شىعارىلدى

شينحۋا اگەنتتىگىنىڭ 1 – ايدىڭ 8 – كۇنى چاڭشادان بەرگەن حابارى. 1 – ايدىڭ 8 – كۇنى، حۋنان ولكەسى چاڭدى قالالىق ورتا دارەجەلى حالىق سوت مەكەمەسى گۋاڭشي جۋاڭزۋ اۆتونوميالى رايوندىق حالىق قۇرىلتايى تۇراقتى كوميتەتى پارتگرۋپپاسىنىڭ بۇرىنعى ورىنباسار شۋجيى، ورىنباسار مەڭگەرۋشىسى جاڭ شيۋلۇڭنىڭ پارا الۋ دەلوسىنا ءبىرىنشى سوتتا اشىق ۇكىم شىعارىپ، ايىپكەر جاڭ شيۋلۇڭعا پارا الۋ قىلمىسى بويىنشا 13 جىلدىق مەرزىمدى قاماۋ جازاسىن بەردى، سونىمەن بىرگە 3 ميلليون يۋان ايىپ سالدى، پارامەن تاپقان مال - مۇلكى جانە ونىڭ ءوسىمىن زاڭ بويىنشا قايتارىپ الىپ، مەملەكەت قازىناسىنا تاپسىرادى.

تەكسەرۋ ارقىلى مىنالاردى انىقتادى: 2001 - جىلدان 2023 - جىلعا دەيىن ايىپكەر جاڭ شيۋلۇڭ گۋاڭشي جۋاڭزۋ اۆتونوميالى رايونى ناننيڭ ايماقتىق پارتكومنىڭ ورىنباسار شۋجيى، اكىمشىلىك مەكەمەسىنىڭ ءۋاليى، چۇڭزو قالالىق پارتكومنىڭ ورىنباسار شۋجيى، قالا باستىعى، گۇيلين قالالىق پارتكومنىڭ ورىنباسار شۋجيى، قالا باستىعى، لايبين قالالىق پارتكومنىڭ شۋجيى، گۋاڭشي جۋاڭزۋ اۆتونوميالى رايوندىق ساياسي كەڭەس پارتگرۋپپاسىنىڭ مۇشەسى، ورىنباسار ءتوراعاسى، گۋاڭشي جۋاڭزۋ اۆتونوميالى رايوندىق حالىق ۇكىمەتى پارتگرۋپپاسىنىڭ مۇشەسى، ورىنباسار ءتوراعاسى، گۋاڭشي جۋاڭزۋ اۆتونوميالى رايوندىق حالىق قۇرىلتايى تۇراقتى كوميتەتى پارتگرۋپپاسىنىڭ ورىنباسار شۋجيى، ورىنباسار مەڭگەرۋشىسى قاتارلى مىندەتىندەگى قولايلىلىقتاردان پايدالانىپ قاتىستى ورىندار مەن جەكەلەردىڭ نىساندى كوتەرەگە الۋ، كاسىپورىن ساۋداسى، مىندەتىن رەتتەۋ قاتارلى ىستەرىنە كومەكتەسىپ، تىكەلەي نەمەسە باسقالار ارقىلى زاڭسىز قابىلداعان مال - مۇلىك جيىنى 41 ميلليون 190 مىڭ يۋاننان اسقان.

چاڭدى قالالىق ورتا دارەجەلى حالىق سوت مەكەمەسى بىلاي دەپ قارادى؛ ايىپكەر جاڭ شيۋلۇڭنىڭ ارەكەتى پارا الۋ قىلمىسىن قالىپتاستىرادى، پارا الۋ سوماسى توتەنشە كوپ، ونى زاڭ بويىنشا جازالاۋ كەرەك. جاڭ شيۋلۇڭنىڭ پارا الۋ قىلمىسىنداعى ماقساتىنا جەتە الماعان جاعدايى بار، دەلوعا الىنعاننان كەيىن ءوزىنىڭ قىلمىسىن قاز - قالپىندا مويىنداپ، باقىلاۋ - تەكسەرۋ ورگانى ءالى يگەرمەگەن ءبىر ءبولىم قىلمىس فاكتىلەرىن ىرىقتىلىقپەن تاپسىرىپ، قىلمىسىن تانىپ، وكىنەتىندىگىن بىلدىرگەن، زاڭسىز ولجانى بەلسەنە قايتارىپ، دەلوعا قاتىستى زاڭسىز اقشا مەن مال – مۇلىكتى جانە ونىڭ ءوسىمىن تۇگەلدەي قۋزاپ قايتارىپ الدى، بۇل زاڭدا بەلگىلەنگەن، جاعدايعا قاراي جەڭىل جازا كەسۋ جاعدايىنا ۇيلەسەدى، زاڭ بويىنشا جەڭىل جازالاۋعا بولادى. سوت مەكەمەسى جوعارىداعىداي ۇكىم شىعاردى.

كەلۋ قاينارى: حالىق تورابى