شي جينپيڭ ا ق ش - نىڭ سايلانعان زۇڭتۇڭى ترامپپەن تەلەفوندا سويلەستى

شينحۋا اگەنتتىگى، 1 - ايدىڭ 17 – كۇنى، بەيجيڭ. 1 - ايدىڭ 17 - كۇنى كەشتە مەملەكەت ءتوراعاسى شي جينپيڭ ۋادە بويىنشا ا ق ش - نىڭ سايلانعان زۇڭتۇڭى ترامپپەن تەلەفوندا سويلەستى.

شي جينپيڭ ترامپتىڭ ا ق ش – نىڭ زۇڭتۇڭى بولىپ تاعى دا سايلانعاندىعىن قۇتتىقتاپ، بىلاي دەپ اتاپ كورسەتتى: ءبىز ءوزارا ىقپالداسۋعا ايرىقشا ءمان بەرىپ كەلەمىز، ءبارىمىز جۇڭگو - ا ق ش قارىم - قاتىناسىنىڭ ا ق ش زۇڭتۇڭىنىڭ جاڭا مىندەت وتەۋ مەزگىلىندە جاقسى باستاما اشۋىن ءۇمىت ەتەمىز، جۇڭگو - ا ق ش قارىم - قاتىناسىنىڭ جاڭا باستامادا اناعۇرلىم زور ىلگەرىلەۋشىلىككە قول جەتكىزۋىن ىلگەرىلەتۋدى قالايمىز.

شي جينپيڭ بىلاي دەپ باسا دارىپتەدى: جۇڭگو مەن ا ق ش سىندى ەكى ۇلى مەملەكەت تۇگەلدەي ءوز ارماندارىنا تالپىنۋدا، تۇگەلدەي حالىقتىڭ ءتىپتى دە تاماشا تۇرمىس كەشىرۋىنە كۇش سالۋدا. جۇڭگو مەن ا ق ش ەكى ەل اراسىندا كەڭ كولەمدى ورتاق مۇددە جانە كەڭ سەلبەستىك كەڭىستىگى بار، سەرىككە جانە دوسقا اينالىپ، ءبىرىن - ءبىرى تابىسقا جەتكىزىپ، بىرگە گۇلدەنىپ - كوركەيىپ، ەكى ەلدى باقىتقا كەنەلتىپ، دۇنيە جۇزىنە تيىمدىلىك جەتكىزۋىنە بولادى.

شي جينپيڭ بىلاي دەپ اتاپ كورسەتتى: مەملەكەت جاعدايى ۇقسامايتىن ەكى ءىرى ەل رەتىندە، جۇڭگو مەن ا ق ش - نىڭ اراسىندا كەيبىر الاۋىزدىقتاردىڭ تۋىلۋىنان اۋلاق بولۋ قيىن، مۇنداعى شەشۋشى ءتۇيىن − ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە قۇرمەت ەتىپ، ماسەلەنى ۇيلەسىمدى شەشۋدىڭ ءادىسىن تابۋ. تايۋان ماسەلەسى جۇڭگونىڭ مەملەكەت يەلىك ۇقىعىنا جانە تەرريتوريا تۇتاستىعىنا سايادى، ا ق ش جاقتىڭ، ءسوز جوق، بايسالدىلىقپەن ءبىر جاقتى ەتۋىن ءۇمىت ەتەمىن. جۇڭگو - ا ق ش ەكونوميكا - ساۋدا قارىم - قاتىناسىنىڭ ءمانى − ءوزارا پايدا جەتكىزىپ تەڭ يگىلىككە كەنەلۋ، قارسىلاسۋ، قاقتىعىسۋ ءبىزدىڭ تاڭداۋىمىز بولماۋعا ءتيىس. ەكى جاق ءوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىككە كەنەلۋ پرينسيبى بويىنشا سەلبەستىكتى كۇشەيتىپ، ەكى ەلگە جانە دۇنيە جۇزىنە پايدالى ءىرى ىستەردى، ناقتى ىستەردى، جاقسى ىستەردى كوبىرەك ىستەپ، جۇڭگو مەن ا ق ش سىندى ەكى الىپ كەمەنىڭ ورنىقتى، اقاۋسىز، باياندى دامۋ جەلىسىن بويلاپ ۇزدىكسىز العا ىلگەرىلەۋىنە مۇمكىندىك جاساۋى كەرەك.

ترامپ ءتوراعا شي جينپيڭنىڭ قۇتتىقتاۋىنا العىس ايتىپ مىنالاردى ءبىلدىردى: ءتوراعا شي جينپيڭمەن اراداعى ۇلى بايلانىستى ايرىقشا قاستەرلەيمىن، تىلدەسۋدى، بايلانىستى ۇزدىكسىز ساقتاۋدى ءۇمىت ەتەمىن، ءتوراعا شي جينپيڭمەن تەز ارادا كەزدەسۋدى كۇتەمىن. ا ق ش مەن جۇڭگو − بۇگىنگى دۇنيە جۇزىندەگى ەڭ ماڭىزدى مەملەكەتتەر، باياندى دوستىقتى ساقتاپ، دۇنيە ءجۇزىنىڭ بەيبىتشىلىگىن بىرگە قورعاۋعا ءتيىس.

ەكى ەلدىڭ مەملەكەت باسشىلارى ۋكراينا داعدارىسى، پالەستينا - يزرايل قاقتىعىسى سياقتى بىرگە كوڭىل ءبولىپ وتىرعان كەلەلى حالىقارالىق جانە وڭىرلىك ماسەلەلەر جونىندە پىكىر اۋىستىردى.

ەكى ەلدىڭ مەملەكەت باسشىلارى ستراتەگيالىق بايلانىس ارناسىن ورناتىپ، ەكى ەلدىڭ بىرگە كوڭىل ءبولىپ وتىرعان كەلەلى ماسەلەلەرى جونىندە ۇنەمىلىك بايلانىستى ساقتاۋعا ماقۇل بولدى.

كەلۋ قاينارى: حالىق تورابى