ا ق ش جاقتىڭ جۇڭگونىڭ ونىمدەرىنەن كەدەن باجىسىن ۇستەمەلەپ الۋ ىقتيمالدىعى جونىندە ساۋدا مينيسترلىگى جاۋاپ قايتاردى 

شينحۋا اگەنتتىگىنىڭ ءتىلشىسى تاڭ شىنيڭ 1 – ايدىڭ 23 – كۇنى بەيجيڭنەن حابارلايدى. ا ق ش جاقتىڭ جۇڭگونىڭ ونىمدەرىنەن كەدەن باجىسىن ۇستەمەلەپ الۋ ىقتيمالدىعىنا باعىتتاي وتىرىپ، ساۋدا مينيسترلىگىنىڭ اقپارات مالىمدەمەشىسى حى يادۇڭ 1 – ايدىڭ 23 - كۇنى: جۇڭگو جاقتىڭ كەدەن باجىسى ماسەلەسى جونىندەگى مايدانى دايەكتى. كەدەن باجىسىن ۇستەمەلەۋ شاراسى جۇڭگو مەن ا ق ش ەكى جاققا دا، بۇكىل دۇنيە جۇزىنە دە ءتيىمسىز، — دەگەن.

ساۋدا مينيسترلىگىنىڭ سول كۇنى اشىلعان اقپار جاريالاۋ ماجىلىسىندە ءبىر ءتىلشى بىلاي دەپ سۇراعان: ترامپ ا ق ش – نىڭ زۇڭتۇڭى بولعاننان كەيىنگى ءبىرىنشى كۇنى كەدەن باجىسىن دەرەۋ ۇستەمەلەمەيتىنىن ايتقان، الايدا، ەكىنشى كۇنى 2 – ايدىڭ 1 – كۇنىنەن باستاپ جۇڭگونىڭ ونىمدەرىنەن الىناتىن كەدەن باجىسىن %10 ۇستەمەلەۋى مۇمكىن ەكەنىن بىلدىرگەن، جۇڭگو جاق بۇل ىسكە قانداي پىكىر بىلدىرەدى؟ حى يادۇڭ بۇل سۇراۋعا جوعارىداعىداي جاۋاپ قايتارعان. ول ءسوزىن اناعۇرلىم تولىقتاي ءتۇسىپ بىلاي دەگەن: جۇڭگو جاق ءوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىكتەنۋ پرينسيبى بويىنشا، ا ق جاقپەن بىرگە جۇڭگو مەن ا ق ش – نىڭ ەكونوميكا - ساۋدا قارىم – قاتىناسىنىڭ ورنىقتى دا اقاۋسىز، باياندى باعىتقا قاراي دامۋىن ىلگەرىلەتۋدى قالايدى.

اقپار جاريالاۋ ماجىلىسىندە ءبىر ءتىلشى بىلاي دەپ سۇراعان: ا ق ش زۇڭتۇڭى ترامپ مىندەتكە وتىرعان العاشقى كۇنى قول قويعان اكىمشىلىك بۇيرىقتا جۇڭگونىڭ ونىمدەرىنەن الىناتىن كەدەن باجىسىن ۇستەمەلەۋ تۋرالى مازمۇن قامتىلماعان، الايدا، اقپارات قۇرالدارىنىڭ حابارلاۋىنشا، ول فەدەراتسيالىق قۇرىلىمدارعا ساۋدالىق قىزىل سيفر ماسەلەسىن ”تەكسەرۋدى جانە وڭالتۋدى“ ءارى جۇڭگو مەن ا ق ش – نىڭ ءبىرىنشى كەزەڭدەگى ساۋدالىق كەلىسىمشارتىنىڭ اتقارىلۋ جاعدايىنا ساراپتاما جاساۋدى تاپسىرعان، ساۋدا مينيسترلىگى وسى تۋرالى قانداي جاۋاپ قايتارادى؟ جۇڭگو جاق ا ق ش جاقتىڭ ەكونوميكا – ساۋدا ۇيىرمەسىمەن كەڭەسۋدى باستاپ كەتتى مە؟

وسى جونىندە حى يادۇڭ مىنانى ءبىلدىردى: جۇڭگو مەن ا ق ش – نىڭ اراسىنداعى ەكونوميكا – ساۋدا قارىم – قاتىناسىنىڭ سيپاتى ءوزارا تيىمدىلىك جەتكىزۋ، تەڭ يگىلىكتەنۋ، جۇڭگونىڭ ساۋدا مينيسترلىگى ا ق ش – نىڭ قاتىستى باسقارۋشى تاراۋلارىمەن كەڭەسۋدى جالعاستىرىپ كەلەدى. جۇڭگو جاق ەكى ەل باسشىلارىنىڭ ستراتەگيالىق جەتەكشىلىگىندە، ەكى جاقتىڭ ءوزارا قۇرمەت ەتۋ، بەيبىت قاتار تۇرۋ، سەلبەسىپ تەڭ يگىلىكتەنۋ پرينسيبى بويىنشا، كەڭەسۋدى كۇشەيتىپ، الاۋىزدىقتاردى ۇيلەسىمدى باسقارىپ جانە تەجەپ، ءوزارا تيىمدىلىك جەتكىزەتىن سەلبەستىكتەردى كەڭەيتىپ، جۇڭگو مەن ا ق ش – نىڭ ەكونوميكا – ساۋدا قارىم – قاتىناسىنىڭ ورنىقتى دا اقاۋسىز دامۋىن ىلگەرىلەتۋدى قالايدى.

كەلۋ قاينارى: حالىق تورابى