وقۋ – اعارتۋ مينيسترلىگى: دەنە تاربيە وقىتۋشىلارى باسقا ءپان وقىتۋشىلارىمەن ۇقساس مامىلەدەن يگىلىكتەنۋى كەرەك 

شينحۋا اگەنتتىگىنىڭ ءتىلشىسى ۋاڭ جيڭيۇي 1 – ايدىڭ 25 – كۇنى بەيجيڭنەن حابارلايدى. ءتىلشىنىڭ وقۋ – اعارتۋ مينيسترلىگىنىڭ تورابىنان ۇعىسۋىنشا، جۋىردا وقۋ – اعارتۋ مينيسترلىگى «جاڭا داۋىردە ورتا، باستاۋىش مەكتەپتەردەگى دەنە تاربيە وقىتۋشىلارى قوسىنىنىڭ قۇرىلىسىن كۇشەيتۋدەگى ءبىرقانشا شارا جونىندەگى ۇقتىرۋدى» (تومەندە قىسقارتىلىپ «ۇقتىرۋ» دەپ اتالادى) باسىپ تاراتقان. بۇل قۇجاتتا ”دەنە تاربيە وقىتۋشىلارى، ءسوزسىز، دەنە تاربيە كاسىبىنەن وقۋ تاۋىسقان بولۋى كەرەك“، ”دەنە تاربيە وقىتۋشىلارى باسقا ءپان وقىتۋشىلارىمەن بىردەي مامىلەدەن يگىلىكتەنۋى كەرەك“، ”’ءۇش ۇلكەن دوپ‘ وقىتۋشىلارى قوسىنىنا ءمان بەرۋدى كورنەكتىلەندىرۋ كەرەك“ دەگەن تالاپتار بار.

وقۋ – اعارتۋ مينيسترلىگىنىڭ بۇل قۇجاتتى شىعارۋىنداعى ماقساتى دەنە تاربيە جاعىنداعى وقىتۋشىلار قوسىنى قۇرىلىسىنىڭ ءتۇزىلىس مەحانيزمىن ونان ارى كەمەلدەندىرىپ، ورتا، باستاۋىش مەكتەپتەردە جوعارى ساپالى، ماماندانعان دەنە تاربيە وقىتۋشىلارى قوسىنىن قۇلشىنا قۇرىپ، وقۋ ـ اعارتۋدا قۋاتتى ەل، دەنە تاربيەدە قۋاتتى ەل قۇرۋدى جەدەلدەتۋگە ۇلەس قوسۋ بولىپ تابىلادى.

وقۋ – اعارتۋ مينيسترلىگىنىڭ وقىتۋشىلار قىزمەتى مەڭگەرمەسىنىڭ جاۋاپتىسى وسى قۇجات جونىندە تۇسىنىك جاساعاندا بىلاي دەدى: وقۋ ـ اعارتۋدا قۋاتتى ەل، دەنە تاربيەدە قۋاتتى ەل قۇرۋ نىساناسىن ولشەم ەتىپ، ءمورال، اقىل ـ وي، دەنە، ەستەتيكا، ەڭبەك جاعىنان جان ـ جاقتى جەتىلگەن سوتسياليستىك قۇرىلىستىڭ ءىزباسارلارىن جەتىلدىرۋ جاعىندا، دەنە تاربيە وقىتۋشىلارى قوسىنىنىڭ سانى ءالى دە كەمشىل بولۋ، تولىقتاۋ قيىن بولۋ، ماماندانۋ دارەجەسى تومەن بولۋ قاتارلى ماسەلەلەر ورىن تەۋىپ وتىر، دەنە تاربيە وقىتۋشىلارى قوسىنىنىڭ قۇرىلىسىن كۇشەيتۋ جاعىندا ارناۋلى شارالاردى شىعارۋعا تۋرا كەلدى. وقۋ – اعارتۋ مينيسترلىگى ارناۋلى ءماجىلىس اشىپ، كەڭ كولەمدى تەكسەرۋ - زەرتتەۋ جۇرگىزۋ، پىكىر الۋ نەگىزىندە وسى «ۇقتىرۋدى» باسىپ تاراتتى.

كەلۋ قاينارى: حالىق تورابى