لي چياڭ مەملەكەتتىك كەڭەستىڭ ۇنەمىلىك ىستەر ءماجىلىسىن باسقارىپ اشتى

شينحۋا اگەنتتىگى، 4 - ايدىڭ 27 - كۇنى، بەيجيڭ. مەملەكەتتىك كەڭەستىڭ زۇڭليى لي چياڭ 4 - ايدىڭ 27 - كۇنى مەملەكەتتىك كەڭەستىڭ ۇنەمىلىك ىستەر ءماجىلىسىن باسقارىپ اشىپ، كورىكتى وزەن – كولدەردى قورعاۋ جانە قۇرۋ قيمىلىن ورىستەتۋدى ورنالاستىردى، قيىنشىلىق قىسپاعىنداعى بالالاردى يگىلىك جاعىنان قامتاماسىزداندىرۋدى اناعۇرلىم كۇشەيتۋگە قاتىستى شارالاردى اقىلداستى، «جۇڭحۋا حالىق رەسپۋبليكاسىنىڭ ەمدەۋ قامتاماسىزداندىرۋ زاڭىن (جوبا)» تالقىلادى، جىجياڭ سانمىن 3 – مەرزىمدىك ينجەنەرياسى سياقتى يادرو ەلەكتر نىساندارىن تەكسەرىپ بەكىتۋدى ۇيعاردى.

ءماجىلىس مىنالاردى اتاپ كورسەتتى: تاياۋ جىلداردان بەرى تۇنىق سۋدى قورعاۋ شايقاسىن ىشكەرىلەي ورىستەتۋ ارقىلى ەلىمىزدىڭ سۋ ەكولوگيالىق ورتاسىنىڭ ساپاسى ۇزدىكسىز جاقساردى. جاۋاپكەرشىلىك سەزىمدى، بورىشتىلىق سەزىمدى اناعۇرلىم كۇشەيتىپ، لاستانۋدى دالمە - ءدال جونگە سالۋعا، لاستانۋدى عىلمي جونگە سالۋعا، لاستانۋدى زاڭ بويىنشا جونگە سالۋعا تاباندى بولىپ، سۋ بايلىعىن، سۋ ورتاسىن، سۋ ەكولوگياسىن جونگە سالۋدى ءبىر تۇتاس جوسپارلاپ، ماڭىزدى اعارلاردىڭ جوعارى - تومەنگى اعارىن تۇتاستىراتىن ەكولوگيالىق ورتانى جونگە سالۋ جۇيەسىن ورناتۋدى ىلگەرىلەتىپ، وزەن - كول ەكولوگياسىن قورعاۋ مەن قۇرۋدى كۇش سالا ىلگەرىلەتۋ كەرەك. تۋ باستان جونگە سالۋدى مىقتى يگەرىپ، ۇلكەن وزەن، ماڭىزدى كولدەردى ءتۇيىن ەتىپ، باقىلاۋ - تەكسەرۋدى، قاينارىن تەكتەۋدى كۇشەيتىپ، ونەركاسىپ لاس سۋلارى، تۇرمىستىق لاس سۋلار، اۋىل شارۋاشىلىعىنىڭ بەتتىك لاستانۋى سياقتىلاردا ولشەمنەن اسىرىپ ىعىستىرۋدان قاتاڭ ساقتانۋ كەرەك. باياندى مەحانيزمدى اقاۋسىزداندىرىپ، بىتىراتۋ مەن بوگەۋدى ۇشتاستىرۋعا تاباندى بولىپ، كاسىپورىنداردى ەنەرگيا ۇنەمدەپ، بىلعانىش ىعىستىرۋدى ازايتۋعا جەتەكشىلىك ەتىپ، جەرگىلىكتى ورىنداردىڭ قورشاعان ورتا نەگىزدىك قۇرىلعىلارىنداعى ولقىلىقتاردى تولىقتاۋىنا قولداۋ كورسەتىپ، جالپى حالىقتىڭ وزەن - كولدەردى قورعاۋ تانىمىن كۇشەيتىپ، كورىكتى وزەن - كولدەردى بىرگە قۇراتىن، بىرگە يگىلىكتەنەتىن تاماشا راي قالىپتاستىرۋ كەرەك.

ءماجىلىس مىنالاردى اتاپ كورسەتتى: قيىنشىلىق قىسپاعىندا قالعان بالالاردىڭ يگىلىگىن قامتاماسىز ەتۋدى كۇشەيتۋ بالالاردىڭ ءتول مۇددەسىنە، وتباسىنىڭ جاراسىمدىلىعىنا، باقىتىنا، قوعامدىق وركەنيەتتىڭ العا باسۋىنا سايادى. بالالار ىستەرىن الدىمەن دامىتۋ جانە بالالارعا ەڭ ءتيىمدى بولۋ پرينسيبىنە تاباندى بولىپ، جاۋاپكەرشىلىكپەن، سۇيىسپەنشىلىكپەن قيىنشىلىق قىسپاعىندا قالعان بالالاردىڭ اقاۋسىز ەسەيىپ - ەرجەتۋىنە بىرگە جارشى بولۋ كەرەك. نەگىزگى تۇرمىستى قامتاماسىز ەتۋ، ەمدەۋ، ساۋىقتىرۋ، نەگىزگى الەۋمەتتىك تاربيە، پسيحيكالىق اقاۋسىزدىققا قامقورلىق جاساۋ سياقتى قىزمەت وتەۋ جۇيەسىن ۇزدىكسىز كەمەلدەندىرىپ، قيىنشىلىق قىسپاعىندا قالعان بالالاردىڭ قاجەتىنە قاراي تۇرگە ءبولىپ شارا قولدانىپ، يگىلىكتى قامتاماسىز ەتۋ دەڭگەيىن ءونىمدى جوعارىلاتۋ كەرەك. باس اماندىعىن قورعاۋ جۇيەسىن بەكەمدەپ، قيىنشىلىق قىسپاعىنداعى بالالارعا زالال جەتكىزەتىن ءتۇرلى زاڭعا قايشى قىلمىستىق ارەكەتتەردەن ساقتانۋ جانە ونى زاڭ بويىنشا قاتاڭ جازالاۋ كەرەك. قىزمەتتەگى ىرىقتىلىقتى، كورەگەندىكتى كۇشەيتىپ، ءار جاقتىڭ جاۋاپكەرشىلىگىن ناقتىلاندىرىپ، قيىنشىلىق قىسپاعىنداعى بالالاردىڭ زاڭدى ۇقىق - مۇددەسىن شىنايى قورعاۋ كەرەك.

ءماجىلىس «جۇڭحۋا حالىق رەسپۋبليكاسىنىڭ ەمدەۋ قامتاماسىزداندىرۋ زاڭىن (جوبا)» تالقىلادى جانە پرينسيپتىك جاقتان ماقۇلدادى، جوبانى مەملەكەتتىك حالىق قۇرىلتايى تۇراقتى كوميتەتىنىڭ قاراپ شىعۋىنا ۇسىنۋدى ۇيعاردى. ءماجىلىس بىلاي دەپ اتاپ كورسەتتى: وسى رەتكى زاڭ شىعارۋدى وراي ەتىپ، ەلىمىزدىڭ ەمدەۋدى قامتاماسىز ەتۋ ساياسات جۇيەسىن ونان ارى كەمەلدەندىرىپ، قامسىزداندىرۋعا قاتىناسۋشىلاردىڭ زاڭدى ۇقىق - مۇددەسىن ءونىمدى قورعاپ، حالىق بۇقاراسىنىڭ ەمدەلە الۋ تۇزىمدىك نەگىزىن بەكەمدەۋ كەرەك. ەمدەۋ قامسىزداندىرۋ قورىن باقىلاۋ - باسقارۋدى كۇشەيتىپ، باقىلاۋ - تەكسەرۋ مەحانيزمىن كەمەلدەندىرىپ، جالعان ەمدەۋ، جالعان ءدارى - دارمەك ساتۋ سياقتى الدامكوستىك ارەكەتتەرگە قاتاڭ سوققى بەرۋ كەرەك. زاڭ جالپىلاستىرۋ ۇگىت - تاربيەسىن كۇشەيتىپ، ەمدەۋ قۇرىلىمدارىنىڭ، ەمدەۋ قىزمەتكەرلەرىنىڭ جانە بۇقارانىڭ زاڭعا بويسۇنۋ تانىمىن جوعارىلاتىپ، ەمدەلۋ ءتارتىبى مەن ەمدەۋ ارەكەتىن ارناعا ءتۇسىرۋ كەرەك.

ءماجىلىس بىلاي دەپ باسا دارىپتەدى: يادرو ەلەكترىن دامىتۋدا، ءسوز جوق، حاۋىپسىزدىككە شىنايى كەپىلدىك ەتۋ، قۇرىلىسقا قاتىناسقان ورىن مەن مەنشىك يەسى ورىننىڭ تۇلعالىق جاۋاپكەرشىلىگىن ناقتىلاندىرىپ، دۇنيە جۇزىلىك ەڭ جوعارى حاۋىپسىزدىك ولشەمى بويىنشا يادرو ەلەكتر گەنەراتور اگراگاتىن قۇرىپ جانە ىسكە قوسىپ، حاۋىپسىزدىكتى باقىلاۋ - باسقارۋ قابىلەتى قۇرىلىسىن ۇزدىكسىز كۇشەيتىپ، يادرو ەلەكتر حاۋىپسىزدىگىن قامتاماسىز ەتۋ تورىن شىن مانىندە بەكەمدەۋ كەرەك.

ءماجىلىس باسقا ىستەردى دە اقىلداستى.

كەلۋ قاينارى: حالىق تورابى