جۇڭگو بويىنشا، ازيا بويىنشا تۇڭعىش رەت! جاۋ شينتۇڭ سنۋكەردەن دۇنيە جۇزىلىك جۇلدەلى جارىستا اعا جۇلدەگەر بولدى 

بەيجيڭ ۋاقىتى بويىنشا 5 – ايدىڭ 6 – كۇنى، انگليانىڭ شەففەلد قالاسىندا اياقتاعان سنۋكەردەن 2025 – جىلعى دۇنيە جۇزىلىك جۇلدەلى جارىستىڭ شەشۋشى جارىسىندا 28 جاستاعى جاۋ شينتۇڭ 18 : 12 ۇپايمەن اتالعان جارىستا بۇرىن ءۇش رەت اعا جۇلدەگەر بولعان ۆەلستىك ايگىلى سنۋكەرشى مارك ۆيليامستى جەڭىپ، وسى سپورت تۇرىنەن تۇڭعىش رەت دۇنيە جۇزىلىك جۇلدەلى جارىستا اعا جۇلدەگەر بولعان جۇڭگولىق سنۋكەرشى بولىپ، جۇڭگونىڭ سنۋكەر سپورتى تاريحىنىڭ جاڭا پاراعىن جازدى.

جاۋ شينتۇڭ سنۋكەردەن ”ءۇش ءىرى جارىستىڭ“ ەكەۋىنىڭ اعا جۇلدەگەرى بولدى، ول 2021 – جىلى انگليا جۇلدەلى جارىسىنىڭ اعا جۇلدەگەرى بولعان. ول ەندى شەبەرلەر جارىسىنىڭ جۇلدەسىنە قول جەتكىزسە، ”ءۇش ءىرى جارىستىڭ“ اعا جۇلدەگەرلىگىنە تولىق يە بولعان بولادى.

سنۋكەردەن دۇنيە جۇزىلىك جۇلدەلى جارىس 1927 – جىلدان باستالعان، انگليا جۇلدەلى جارىسى جانە شەبەرلەر جارىسىمەن بىرگە ”ءۇش ءىرى جارىس“ دەپ اتالادى. ”ءۇش ءىرى جارىس“ سنۋكەر سالاسىنداعى ەڭ ماڭىزدى داڭق سانالادى، مۇنىڭ ىشىندە، اسىرەسە دۇنيە جۇزىلىك جۇلدەلى جارىستىڭ قۇنى تىپتەن ماڭىزدى، ىقپالى ەڭ زور، سنۋكەرشىلەردىڭ تۇپكى نىساناسى سانالادى. وسى رەتكى جارىس ماۋسىمىنان بۇرىن، جۇڭگولىق سپورتشىلاردان تەك ديڭ جۇنحۇي عانا دۇنيە جۇزىلىك جۇلدەلى جارىستىڭ شەشۋشى جارىسىنا كىرگەن، وكىنشتىسى، ول اعا جۇلدەگەرلىككە قول جەتكىزە الماعان بولاتىن.

كەلۋ قاينارى: حالىق تورابى