شي جينپيڭ لحاساعا جەتتى

8 - ايدىڭ 20 - كۇنى تۇستە جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ورتالىق ۋاكىلدەر ۇيىرمەسىن باستاپ لحاساعا بارىپ، شيزاڭ اۆتونوميالى رايونى قۇرىلعاندىعىنىڭ 60 جىلدىعىن قۇتتىقتاۋ قيمىلىنا قاتىناستى.

سۋرەتتە: شي جينپيڭ قارسى العان بۇقاراعا قول بۇلعاپ قۇرمەت بىلدىرۋدە.

سۋرەتتى شينحۋا اگەنتتىگىنىڭ ءتىلشىسى يىن بوگۋ تۇسىرگەن

«حالىق گازەتى»، 8 - ايدىڭ 20 - كۇنى، لحاسا. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ ورتالىق ۋاكىلدەر ۇيىرمەسىن باستاپ 8 - ايدىڭ 20 - كۇنى تۇستە ارناۋلى ۇشاقپەن لحاساعا جەتىپ، شيزاڭ اۆتونوميالى رايونى قۇرىلعاندىعىنىڭ 60 جىلدىعىن قۇتتىقتاۋ قيمىلىنا قاتىناستى. شي جينپيڭنىڭ ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى رەتىندە ورتالىق ۋاكىلدەر ۇيىرمەسىن باستاپ شيزاڭعا بارىپ، شيزاڭ اۆتونوميالى رايونىنىڭ قۇرىلعاندىعىن قۇتتىقتاۋ قيمىلىنا قاتىناسۋى پارتيا مەن مەملەكەت تاريحىندا تۇڭعىش رەت بولىپ، پارتيا ورتالىق كوميتەتىنىڭ شيزاڭ قىزمەتىنە وسكەلەڭ ءمان بەرەتىندىگىن، شيزاڭداعى ءار ۇلت كادرلارى مەن بۇقاراسىنا دەگەن شىنايى قامقورلىعىن تولىق ايگىلەدى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى، ورتالىق ۋاكىلدەر ۇيىرمەسىنىڭ باستىعى ۋاڭ حۋنيڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسەسىنىڭ مەڭگەرۋشىسى ساي چي وسى ۇشاقپەن بىرگە باردى.

كۇز باسىنداعى چيڭحاي - شيزاڭ ۇستىرتىندە سالقىن سامال ەسەدى. لحاسا گۇڭگا اۋەجايىندا قىزىل تۋلار جەلبىرەپ، قىزۋ مەرەيگە شومدى.

ساعات 12 مولشەرىندە شي جينپيڭ وتىرعان ارناۋلى ۇشاق گونگا اۋەجايىنا قوندى، ۇشاق الاڭقىسىندا كۇتىپ تۇرعان شيزاڭداعى ءار ۇلت، ءار سالا بۇقاراسى قىزۋ قول شاپالاق سوقتى. شي جينپيڭ ۇشاق ەسىگىنەن شىعىپ، قارسى العان بۇقاراعا قول بۇلعاپ قۇرمەت ءبىلدىردى.

شيزاڭ اۆتونوميالى رايوندىق پارتكومنىڭ شۋجيى ۋاڭ جۇنجىڭ، اۆتونوميالى رايوندىق حالىق قۇرىلتايى تۇراقتى كوميتەتىنىڭ مەڭگەرۋشىسى يان جينحاي، اۆتونوميالى رايوندىق حالىق ۇكىمەتىنىڭ ءتوراعاسى گامازەدەن، اۆتونوميالى رايوندىق ساياسي كەڭەس پارتيا باسشىلىق گرۋپپاسىنىڭ شۋجيى ليۋ جياڭ قاتارلىلار ۇشاق باسپالداعىنىڭ استىندا قارسى الدى. شي جينپيڭ ۇشاق باسپالداعىنان تۇسكەندە، ۋاڭ جۇنجىڭ حادا ۇسىندى، قۇرمەت قاراۋىلى چەمما جانە قارسى الۋ شارابىن ۇسىندى. ءار ۇلت بۇقاراسىنىڭ ۋاكىلدەرى مەرەكەلىك كيىم كيىپ، قىزىل تۋ مەن الۋان ءتۇستى گۇل شوعىن بۇلعاپ، ويناقى ۇلتتىق ءبي بيلەپ، باس شۋجيدىڭ كەلگەنىن قارسى الىپ، باس شۋجيگە دەگەن شىنايى تىلەگىن ءبىلدىردى.

مەرەكەلىك تۇسكە تولى بايىرعى قالا لحاسادا اۋەجايدان قونالقى ورىنعا دەيىنگى نەگىزگى كوشەلەردىڭ ەكى جاعىنداعى ءتۇستى تۋلار بيگە باسىپ، ءار ۇلت بۇقاراسى قولدارىنا قىزىل تۋ، حادا ۇستاپ، ءبىر اۋىزدان الاقايلاپ، قارسى الۋ جانە العىس ايتۋ سەزىمىن ءبىلدىردى. شي جينپيڭ اۆتوكولىكتىڭ تەرەزەسىن اشىپ، جول بويىنداعى بۇقاراعا ءالسىن - ءالى قول بۇلعاپ قۇرمەت ءبىلدىردى.

ورتالىق ۋاكىلدەر ۇيىرمەسىنىڭ ورىنباسار باستىعى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت بىرلىكساپ ءبولىمىنىڭ باستىعى لي گانجيە، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسارى جاڭ گوچيڭ، مەملەكەتتىك حالىق قۇرىلتايى تۇراقتى كوميتەتى باستىعىنىڭ ورىنباسارى لوساڭجياڭسۇن، مەملەكەتتىك ساياسي كەڭەس ءتوراعاسىنىڭ ورىنباسارى حۋ چۇنحۋا، ورتالىق اسكەري ىستەر كوميتەتىنىڭ مۇشەسى جاڭ شىڭمين، قيمىلعا بىرگە قاتىناسۋعا كەلگەن جۇڭگو كوممۋنيستىك پارتياسى ساياسي بيۋروسىنىڭ مۇشەسى، مەملەكەتتىك كەڭەس زۇڭليىنىڭ ورىنباسارى حى ليفىڭ، جۇڭگو كوممۋنيستىك پارتياسى ورتالىق كوميتەتى شۋجيچۋىنىڭ شۋجيى، مەملەكەتتىك كەڭەستىڭ مۇشەسى ۋاڭ شياۋحۇڭ قاتارلىلار وسى ۇشاقپەن بىرگە باردى.

ورتالىق ۋاكىلدەر ۇيىرمەسىنىڭ مۇشەلەرى ءبىر ۋاقىتتا كەلدى، كەلگەن مۇشەلەر ورتالىق پەن مەملەكەت ورگاندارىنىڭ قاتىستى تاراۋلارىنىڭ، ارميانىڭ قاتىستى ورىندارىنىڭ، شيزاڭعا باعىتتامالى كومەكتەسەتىن قاتىستى ولكە، قالالاردىڭ جاۋاپتى جولداستارىن قامتيدى.