اۋىر مەتال قۇرامى مولشەردەن اسقان! مىناداي ”ۇلكەن التىن بىلەزىكتەردى“، استە، ساتىپ الماڭىز

ءتىلشى ساۋدا تەكشەلەرىنەن ىزدەۋ بارىسىندا، كەبەك التىننان جاسالعان اشەكەي بۇيىمدارىن ساتاتىن دۇكەندەردىڭ كوپ ەكەنىن بايقاعان، كەيبىر دۇكەندەر ءبىر ايداعى ساتىلىم مولشەرىنىڭ 10 مىڭ دانادان اسقانىن جازعان. ءبىر قاراعاندا التىنعا ۇقسايتىن، ينتەرنەت ارقىلى جانە ينتەرنەتتەن تىس كوپ مولشەردە ساتىلىپ جاتقان اتالمىش ”كەبەك التىننان جاسالعان“ اشەكەي بۇيىمدارى، زايىرى، قانداي ماتەريالداردان جاسالادى، شىنايى باعاسى قانشا؟ ءتىلشىنىڭ تەكسەرۋ بارىسىندا بايقاۋىنشا، اتالمىش ”كەبەك التىننان جاسالعان“ اشەكەي بۇيىمدارىنىڭ كەيبىرەۋىنىڭ قۇرامىندا كەبەك التىن مۇلدە جوق ەكەن. ال، ساۋدا دۇكەندەرىنىڭ اتالمىش ”ۆيەتنامنىڭ كەبەك التىنى“، ”بيرمانىڭ كەبەك التىنى“، ”تايلاندتىڭ كەبەك التىنى“ دەپ ۇگىتتەگەن زاتتارى، كوبىنەسە، شىرعالاۋدىڭ ءبىر ءتۇرى عانا. وسىنداي اشەكەي بۇيىمداردى ۇزاق ۋاقىت پايدالانسا، دەنساۋلىققا ىقپال جاساي ما؟

جىجياڭ ولكەسى حاڭجوۋ قالاسى حالىقارالىق اشەكەي بۇيىمدار قالاشىعىنداعى التىن اشەكەي بۇيىمداردىڭ ساپاسىن تەكسەرۋ ورتالىعىندا، ءتىلشى ۇزاق جىلدان بەرى التىن بۇيىمداردى تەكسەرۋمەن شۇعىلدانىپ كەلگەن يان شۋەجۇنمەن كەزدەسكەن. ونىڭ تىلشىگە ايتۋىنشا، مەيلى، كەبەك التىن بولسىن، الدە، ساپ التىن بولسىن، بارلىعى دا التىن قۇرامى بار زاتتاردىڭ حالىق اراسىنداعى اتاۋى، ال، بازاردا ساتىلىپ جاتقان كەبەك التىننان جاسالعان بۇيىمدار، باستىسى، مىس قورىتپاسى نەمەسە التىن جالاتىلعان ۇقساتپالى اشەكەي بۇيىمدار سانالادى. ول ءتىلشى الىپ كەلگەن كەبەك التىننان جاسالعان ەكى دانا اشەكەي بۇيىمعا تەكسەرۋ جۇرگىزگەندە، باستى قۇرامى تۇگەلدەي مىس – نيكەل قورىتپاسى بولىپ شىققان.

شاڭحاي فۋدان داشۋەسىنىڭ قاراماعىنداعى حۋادۇڭ ەمحاناسىنىڭ تەرى اۋرۋلارى ءبولىمىنىڭ ورىنباسار مەڭگەرۋشى شيپاگەرى شى لەي بىلاي دەيدى: مەتالمەن جۇعىسۋ رەاكسيا بەرگەننەن تۋىلاتىن تەرى قابىنۋى كلينيكادا ءبىرشاما ءجيى ۇشىرايتىن قۇبىلىس. مىسالى، تاققان القاڭىز رەاكسيا بەرسە، موينىڭىزدىڭ تەرىسىندە قىزىل تاڭداق بايقالىپ، قىشۋى مۇمكىن. ەگەر بۇل جاعدايدىڭ القانىڭ سەبەبىنەن تۋىلعانىن بايقاماي، القانى جالعاستى تاعا بەرسەڭىز، وسىنىڭ سالدارىنان تەرى سۋلى كوپىرشىكتەنىپ قىزارا ءبورتۋى، قىشۋى، ءتىپتى بۇل اۋرۋ بەلگىسىنىڭ كولەمىنىڭ ۇلعايۋى، القانىڭ بۇكىل دەنەگە رەاكسيا بەرۋى ىقتيمال.

ءتىلشىنىڭ ىزدەۋ بارىسىندا بايقاۋىنشا، حيماۋ شاعىمدانۋ تەكشەسىندە تۇتىنۋشىلار ”كەبەك التىننان جاسالعان اشەكەي بۇيىمداردى تاققاندا رەاكسيا بەرگەنى“ جونىندە قاتىستى ەلەكتروندىق ساۋدا تەكشەلەرىنە شاعىمدانىپ، ۇقىعىن قورعاعان.

كەلۋ قاينارى: حالىق تورابى