شي جينپيڭ جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسقان ءبىر ءبولىم مەملەكەت باسشىلارىمەن جەكە ـ جەكە كەزدەستى

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ساۋ جيايۋە، حۋاڭ ياڭ). 9 ـ ايدىڭ 4 ـ كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ حالىق سارايىندا 2025 ـ جىلعى شاڭحاي سەلبەستىك ۇيىمى باسشىلار ماجىلىسىنە جانە جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءارى قىزمەت ساپارىندا بولۋ ءۇشىن جۇڭگوعا كەلگەن لاوس حالىق توڭكەرىستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى تۇڭلۇنمەن كەزدەستى.

شي جينپيڭ بىلاي دەپ اتاپ كورسەتتى: 2023 ـ جىلى 10 ـ ايدا مەن باس شۋجي جولداسپەن بىرگە جۇڭگو - لاوس تاعدىرلاس ورتاق تۇلعاسىن قۇرۋدىڭ جاڭا 5 جىلدىق ارەكەت جوسپارىنا قول قويعاننان بەرى، ەكى جاقتىڭ ءار سالاداعى سەلبەستىك جەتىستىگى كورنەكتى بولدى. ەكى پارتيانىڭ نازاريا زەرتتەۋ ـ تالقى ءماجىلىسى مەن كادرلاردى باۋلۋ سەلبەستىگى تىڭعىلىقتى ىلگەرىلەتىلىپ، جۇڭگو - لاوس تەمىر جولى ”ءبىر جەردە ەكى تەكسەرۋ“ ۇكىمەت ارا كەلىسىمىنە رەسمي قول قويىلىپ، ءىرى نىساندار جانە شىرىكتەسۋگە قارسى تۇرۋ مەن قاشقىنداردى قۋعىنداۋ، ارام ولجانى قۋزاۋ سياقتى سەلبەستىكتەر مول ونىمدىلىككە يە بولىپ، جۇڭگو - لاوس تاعدىرلاس ورتاق تۇلعاسىنىڭ ستراتەگيالىق ءمانى مەن ۇلگىلىك رولىن ايگىلەدى.

شي جينپيڭ بىلاي دەپ باسا دارىپتەدى: كەزەكتە حالىقارالىق جانە وڭىرلىك جاعدايدا كۇردەلى دە تەرەڭ وزگەرىس تۋىلدى، ەكى جاق جۇڭگو - لاوس قارىم ـ قاتىناسىن ۇزاق بولاشاقتىق كوز ايامەن جانە ستراتەگيالىق ويمەن باعامداپ جانە يگەرىپ، ءبىر ـ ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ءبىر ـ ءبىرىن باتىل قولداۋى كەرەك. كەلەر جىلى ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 65 جىلدىعىن وراي ەتىپ، ءارقايسى سالاداعى بارىس ـ كەلىستى ويداعىداي جوسپارلاپ ورىستەتۋ كەرەك. جۇڭگو جاق لاوس جاقپەن پارتيانى باسقارۋ، ەل باسقارۋ تاجىريبەلەرى جونىندەگى اۋىس ـ كۇيىستى تەرەڭدەتىپ، لاوس حالىق توڭكەرىستىك پارتياسىنىڭ 12 ـ قۇرىلتايىنا دايىندىق كورۋىنە جانە ونى ويداعىداي اشۋىنا قولداۋ كورسەتۋدى قالايدى. جۇڭگو - لاوس تەمىر جولىن ىسكە قوسۋدى جانە جەلى بويىن اشۋدى تۇتقا ەتىپ، ”التىن ۇلكەن ارنانىڭ“ ىقپال جاساۋ، جەتەكتەۋ اسەرىن ۇزدىكسىز كەڭەيتىپ، ءتۇيىندى نىسانداردىڭ ساپاسىن جوعارىلاتىپ دارەجەسىن ءوسىرۋدى ىلگەرىلەتۋ كەرەك. قورعانىس ىستەرى، زاڭ اتقارۋ حاۋىپسىزدىگى سياقتى جاقتارداعى سەلبەستىكتى تەرەڭدەتىپ، شەكارا اتتاعان قۇمار ويىنى، تەلەگراف، ينتەرنەت الدامكوستىگى قىلمىسى سياقتىلارعا ۇزدىكسىز تەگەۋرىندى قاتاڭ سوققى بەرۋ كەرەك. جۇڭگو جاق لاوستىڭ شاڭحاي سەلبەستىك ۇيىمىنىڭ تىلدەسۋشى سەرىكتەس ەلى بولعاندىعىن قۇتتىقتايدى، لاوس جاقپەن جۇڭگو - شىعىس وڭتۇستىك ازيا ەلدەرى وداعى سەلبەستىگى، لانساڭجياڭ - مەكونگ سەلبەستىگى، شىعىس ازيا باسشىلار ءماجىلىسى سياقتى وڭىرلىك مەحانيزمدەر اياسىندا سايكەسۋدى جانە سەلبەسۋدى تەرەڭدەتىپ، ءوڭىردىڭ بەيبىتشىلىگى مەن دامۋىن جەبەۋدى قالايدى.

تۇڭلۇن جۇڭگونىڭ شاڭحاي سەلبەستىك ۇيىمى تيانجين باسشىلار ءماجىلىسىن جانە جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىن ءساتتى وتكىزگەندىگىن قىزۋ قۇتتىقتادى، جۇڭگو جاقتىڭ ۇزاق مەزگىلدەن بەرى لاوس جاققا قىمباتتى قولداۋ جانە كومەك كورسەتكەندىگىنە العىس ايتىپ مىنالاردى ءبىلدىردى: كەزەكتە لاوس پەن جۇڭگونىڭ قارىم ـ قاتىناسى تاريحتاعى ەڭ تاماشا مەزگىلدە تۇر، لاوس - جۇڭگو تاعدىرلاس ورتاق تۇلعاسى قۇرىلىسىندا ۇزدىكسىز سۇبەلى جەتىستىكتەرگە قول جەتكىزىلدى. لاوس جاق جۇڭگو جاقپەن لاوس - جۇڭگو تاعدىرلاس ورتاق تۇلعاسىن قۇرۋدىڭ جاڭا 5 جىلدىق ارەكەت جوسپارىن ۇزدىكسىز ويداعىداي تياناقتاندىرىپ، لاوس - جۇڭگو ەكونوميكالىق ءدالىزى قۇرىلىسىن كۇش سالا ىلگەرىلەتىپ، لاوس - جۇڭگو تەمىر جولى ”ءبىر جەردە ەكى تەكسەرۋ“ كەلىسىمىن جەدەل تياناقتاندىرىپ، ءار سالاداعى ناقتى ىستەر سەلبەستىگىنىڭ ونىمدىلىگىن جوعارىلاتۋدى قالايدى. لاوس جاق جۇڭگو جاقتىڭ لاوستىڭ شاڭحاي سەلبەستىك ۇيىمىنىڭ تىلدەسۋشى سەرىكتەس ەلى بولۋىنا قولداۋ كورسەتكەنىنە شىن جۇرەكتەن العىس ايتادى، باس شۋجي شي جينپيڭ العا قويعان الەمدىك باسقارۋ باستاماسىن بار كۇشپەن قولدايدى، جۇڭگو جاقپەن حالىقارالىق ساحنادا سايكەسۋدى، سەلبەسۋدى كۇشەيتۋدى قالايدى. تۇڭلۇن ءارى جۇڭگو جاقتىڭ لاوس پارتياسىنىڭ 12 ـ قۇرىلتايعا دايىندىق كورۋىنە زور كۇشپەن قولداۋ كورسەتكەندىگىنە العىس ايتتى، جۇڭگو كوممۋنيستىك پارتياسى 20 ـ كەزەكتى ورتالىق كوميتەتى ءتورتىنشى جالپى ءماجىلىسىنىڭ تولىق تابىستى بولۋىن تىلەدى.

ساي چي، ۋاڭ ي كەزدەسۋگە قاتىناستى.

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ۋىن شين، ساۋ جيايۋە). 9 ـ ايدىڭ 4 ـ كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ بەيجيڭ حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن كۋبا كوممۋنيستىك پارتياسى ورتالىق كوميتەتىنىڭ ءبىرىنشى شۋجيى، كۋبانىڭ مەملەكەت ءتوراعاسى دياز كانەلمەن كەزدەستى.

شي جينپيڭ بىلاي دەپ اتاپ كورسەتتى: بەرتىنگى جىلدارى جۇڭگو - كۋبا تاعدىرلاس ورتاق تۇلعاسى قۇرىلىسى ۇزدىكسىز تەرەڭدەپ، ناقتىلانىپ، ەكى پارتيا، ەكى ەلدىڭ قۇرىشتاي بەرىك دوستىق سۇيىسپەنشىلىگىنىڭ ايقىن بەلگىسىنە اينالدى. بيىل — جۇڭگو مەن كۋبانىڭ ديپلوماتيالىق قارىم ـ قاتىناس ورناتقاندىعىنىڭ 65 جىلدىعى، ەكى جاق وسىنى وراي ەتىپ، جۇڭگو - كۋبا قارىم ـ قاتىناسىنىڭ اناعۇرلىم جوعارى دەڭگەيگە كوتەرىلۋىن ىلگەرىلەتىپ، ەكى ەل حالقىنا اناعۇرلىم ويداعىداي باقىت جاراتۋى كەرەك.

شي جينپيڭ بىلاي دەپ باسا دارىپتەدى: جۇڭگو - كۋبا ەكى جاق تاعدىرلاس بولۋعا تاباندى بولىپ، جوعارى دەڭگەيدەگى ساياسي ءوزارا سەنىمدىلىكتى تەرەڭدەتىپ، جوعارى جىكتەگىلەردىڭ بارىس ـ كەلىسىن ونان ارى جيىلەتىپ، پارتيانى باسقارۋ، ەل باسقارۋ تاجىريبەلەرى جونىندەگى اۋىس ـ كۇيىستى كۇشەيتىپ، تاباندىلىقپەن ءوزارا قولداۋ كورسەتىپ، ءبىر ـ بىرىنە شىن ادال بولعان ايرىقشا دوستىق سۇيىسپەنشىلىكتى ۇزدىكسىز تەرەڭدەتۋى؛ شىن نيەتپەن ءوزارا كومەكتەسۋگە تاباندى بولىپ، دامۋ سەلبەستىگىن جۇيەلى ىلگەرىلەتۋى كەرەك، جۇڭگو جاق شاماسى جەتەتىن كولەمدە كۋبا جاققا كومەك جانە قولداۋ كورسەتۋدى قالايدى؛ ءبىر نيەتپەن كۇش سالۋعا تاباندى بولىپ، جان ـ جاقتى ستراتەگيالىق ىستەستىكتى كۇشەيتىپ، 77 ەل توبى، بريكس ەلدەرى سياقتى جۇلگەلەردە ۇزدىكسىز سايكەسىپ جانە سەلبەسىپ، الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن، الەمدىك باسقارۋ باستاماسىن ويداعىداي تياناقتاندىرىپ، حالىقارالىق جاراستىرۋ مەكەمەسىن بىرگە ويداعىداي قۇرىپ، دۇنيە ءجۇزىنىڭ بەيبىتشىلىگى مەن دامۋىن جەبەۋگە اناعۇرلىم زور ۇلەس قوسۋى كەرەك. جۇڭگو جاق كۋبا جاقتىڭ كيلىگۋ مەن قۇرساۋلاۋعا قارسى تۇرۋ ادىلەتتى كۇرەسىن ۇزدىكسىز باتىل قولدايدى.

دياز كانەل مىنالاردى ءبىلدىردى: جۇڭگو حالقىنىڭ جاپون شاپقىنشىلارىنا قارسى سوعىسى جەڭىسىنىڭ 80 جىلدىعىن ەسكە ءتۇسىرۋ قيمىلى سالتاناتتى دا دۋماندى بولدى، كەلەلى تاريحي مانگە يە. جۇڭگونىڭ دۇنيە جۇزىلىك فاشيزمگە قارسى سوعىس جەڭىسى ءۇشىن قوسقان ماڭىزدى ۇلەسى ماڭگى ۇمىتىلمايدى. كۋبا لاتىن امەريكاسىندا جۇڭگومەن ەكى جاقتى تاعدىرلاس ورتاق تۇلعانى قۇرعان تۇڭعىش مەملەكەت، ەكى پارتيا، ەكى ەلدىڭ قارىم ـ قاتىناسى تىعىز، دوستىعى بەرىك. كۋبا جاق ءبىر جۇڭگو پرينسيبىن باتىل اتقارادى، جۇڭگو جاقتىڭ كۋبانىڭ ەكونوميكالىق، قوعامدىق دامۋىنا كورسەتكەن قالتقىسىز قولداۋى مەن كومەگىنە العىس ايتادى، جان ـ جاقتى سەلبەستىكتى ۇزدىكسىز كۇشەيتىپ، ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ءۇمىت ەتەدى، جۇڭگو كاسىپورىندارىنا اناعۇرلىم جاقسى شارۋاشىلىق ـ ساۋدا ورتاسىن ازىرلەۋدى قالايدى. كۋبا جاق ءتوراعا شي جينپيڭ العا قويعان الەمدىك باسقارۋ باستاماسىن بارىنشا القايدى، بۇكىلدەي قولدايدى، الداعى جەردە بەلسەندى تياناقتاندىرىپ، حالىقارالىق باسقارۋ جۇيەسىنىڭ اناعۇرلىم ءادىل، ۇيلەسىمدى بولۋىن ىلگەرىلەتىپ، وركەندەپ كەلە جاتقان ەلدەردىڭ ورتاق مۇددەسىن قورعايدى.

ەكى جاق «جۇڭحۋا حالىق رەسپۋبليكاسى مەن كۋبا رەسپۋبليكاسىنىڭ جۇڭگو - كۋبا تاعدىرلاس ورتاق تۇلعاسىن جەدەل قۇرۋ جونىندەگى بىرلەسكەن مالىمدەمەسىن» جاريالادى، ”ءبىر بەلدەۋ، ءبىر جولدى“ بىرگە قۇرۋ، ناقتى ىستەر سەلبەستىگى، الەمدىك حاۋىپسىزدىك باستاماسى، جەرگىلىكتى اۋىل شارۋاشىلىعى، جاساندى زەردە سياقتى سالالارداعى كوپتەگەن ەكى جاقتى سەلبەستىك حۇجاتىنا قول قويدى.

ۋاڭ ي كەزدەسۋگە قاتىناستى.

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ساۋ جيايۋە، شاۋ يبو). 9 ـ ايدىڭ 4 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن زيمبابۆە زۇڭتۇڭى منانگاگۋامەن كەزدەستى. ەكى ەلدىڭ مەملەكەت باسشىلارى ەكى جاقتى قارىم ـ قاتىناستى جۇڭگو - زيمبابۆە بارلىق جاعدايدا بىردەي تاعدىرلاس ورتاق تۇلعاسى دەڭگەيىنە جوعارىلاتۋدى جاريالادى.

شي جينپيڭ بىلاي دەپ اتاپ كورسەتتى: بيىل — جۇڭگو مەن زيمبابۆەنىڭ ديپلوماتيالىق قارىم ـ قاتىناس ورناتقاندىعىنىڭ 45 جىلدىعى، ەكى ەلدىڭ ”بەس جۇلدىزدى قۇرىشتاي بەرىك“ دوستىعى ءۇرتىس تەرەڭدەپ، جۇڭگو مەن افريكا، ءتىپتى، جەر شارىنىڭ وڭتۇستىگىنىڭ ىنتىماقتاسا ىستەستىك جاساسۋىنا تيپتىك ۇلگى ورناتتى. جۇڭگو جاق زيمبابۆە جاقتىڭ ءوزىنىڭ مەملەكەت جاعدايىنا ۇيلەسەتىن دامۋ جولى جونىندە دەربەس، وزىنە ـ ءوزى قوجايىن بولا وتىرىپ ىزدەنىس جاساۋىن، سىرتتىڭ كيلىگۋىنە جانە زاڭسىز جازالاۋىنا قارسى تۇرۋىن ۇزدىكسىز باتىل قولدايدى، ەكى ەلدىڭ جانە جەر شارىنىڭ وڭتۇستىگىنىڭ ورتاق مۇددەسىن ويداعىداي قورعايدى.

شي جينپيڭ بىلاي دەپ باسا دارىپتەدى: ەكى جاق جۇڭگو - زيمبابۆە قارىم ـ قاتىناسىنىڭ ورنىن جوعارىلاتۋدى وراي ەتىپ، سەلبەسۋ وي جەلىسىندە جاڭالىق اشىپ، نەگىزدىك قۇرىلعى قۇرىلىسى، كەن كاسىبى، قارجى قوسۋ، ساۋدا سياقتى سەلبەستىكتەردى كەڭەيتىپ، ەكى ەل سەلبەستىگىنىڭ ساپاسىن جوعارىلاتىپ دارەجەسىن ءوسىرۋدى ىلگەرىلەتۋى كەرەك. جۇڭگو جاق زيمبابۆە جاقپەن جۇڭگو - افريكا سەلبەستىك تالقى مىنبەرى بەيجيڭ باسشىلار ءماجىلىسىنىڭ جەتىستىگىن تياناقتاندىرۋدى بىرگە ىلگەرىلەتىپ، زيمبابۆەنىڭ ەكونوميكالىق، قوعامدىق دامۋىنا كۇش قوسۋدى قالايدى. الەمدىك باسقارۋ باستاماسىن بىرگە تياناقتاندىرىپ، حالىقارالىق جاراستىرۋ مەكەمەسىن ويداعىداي قۇرىپ، جەر شارىنىڭ وڭتۇستىگىنىڭ سەلبەستىگىن كۇشەيتىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋدى قالايدى.

منانگاگۋا مىنالاردى ءبىلدىردى: تاريحي مانگە يە جۇڭگو حالقىنىڭ جاپون شاپقىنشىلارىنا قارسى سوعىسى جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسقانىما قاتتى قۋاندىم، حالىقارالىق قوعام جۇڭگونىڭ دۇنيە جۇزىلىك فاشيزمگە قارسى سوعىستىڭ جەڭىسى ءۇشىن قوسقان كەلەلى ۇلەسىن ەستە بەرىك ساقتاپ، دۇنيە جۇزىلىك 2 ـ سوعىس جونىندەگى دۇرىس تاريح كوزقاراسىنا تاباندى بولۋى كەرەك. زيمبابۆە - جۇڭگو قارىم ـ قاتىناسى 45 جىلدىق دامۋدى باستان وتكەرىپ، كۇن سايىن تولىسىپ بەكەمدەلدى. زيمبابۆە جاق جۇڭگو جاقپەن بارلىق جاعدايدا بىردەي تاعدىرلاس ورتاق تۇلعانى بىرگە قۇرىپ، ءبىر جۇڭگو پرينسيبىن باتىل اتقارىپ، ءار سالاداعى ءوزارا پايدا جەتكىزۋ سەلبەستىگىن تەرەڭدەتىپ، ەكى ەل قارىم ـ قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتىپ، ەكى ەل حالقىنا اناعۇرلىم مول قۇت ـ ىرىس اكەلۋدى ءۇمىت ەتەدى. جۇڭگو الەمدىك باسقارۋ باستاماسى سياقتى ءبىر قىدىرۋ كەلەلى باستامانى العا قويىپ، حالىقارالىق جاراستىرۋ مەكەمەسىن قۇرۋدى دارىپتەدى، افريكا ەلدەرىنەن كەدەن باجىسىن الماۋدى اتقارىپ، حالىقارالىق ىستەردە كۇن سايىن اناعۇرلىم بەلسەندى جانە ماڭىزدى رول اتقاردى. زيمبابۆە جاق جۇڭگو جاقپەن قاتىستى باستامالاردى امالياتتا بىرگە ايگىلەپ، حالىقارالىق ادىلدىكتى، تۋراشىلدىقتى قورعاۋدى قالايدى.

ۋاڭ ي كەزدەسۋگە قاتىناستى.

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ساۋ جيايۋە، حۋاڭ ياڭ). 9 ـ ايدىڭ 4 ـ كۇنى تۇستە مەملەكەت ءتوراعاسى شي جينپيڭ بەيجيڭ حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن كونگو (براززاۆيل) زۇڭتۇڭى ساسوۋمەن كەزدەستى. ەكى ەلدىڭ مەملەكەت باسشىلارى ەكى جاقتى قارىم ـ قاتىناستىڭ ورنىن جۇڭگو - كونگو جوعارى دەڭگەيدەگى تاعدىرلاس ورتاق تۇلعاسىنا جوعارىلاتۋدى جاريالادى.

شي جينپيڭ بىلاي دەپ اتاپ كورسەتتى: جۇڭگو - كونگو قارىم ـ قاتىناسى — جۇڭگو - افريكا دوستىعىنىڭ تيپتىك ۇلگىسى. كونگو (براززاۆيل) ەكونوميكالىق سەرىكتەستىك قارىم ـ قاتىناستى بىرگە دامىتۋ كەلىسىمىنىڭ باستاپقى مەزگىلدەگى ناتيجەسىن ورنالاستىرۋ جونىندە جۇڭگومەن ءبىر اۋىزدىلىققا كەلگەن تۇڭعىش مەملەكەت، تەز ارادا كەدەن باجىسىن الماۋ شاراسىنىڭ يگىلىگىن كورىپ، ەكى ەلدىڭ ساۋدا جانە قارجى قوسۋ سەلبەستىگىنىڭ جاڭا جاعدايىن اشادى. كونگو (براززاۆيل) ءارى ءبىرىنشى بولىپ حالىقارالىق جاراستىرۋ مەكەمەسى شارتىن بەكىتكەن افريكا ەلى. جۇڭگو - كونگو جوعارى دەڭگەيدەگى تاعدىرلاس ورتاق تۇلعاسى قۇرىلىسىندا زامانعا، جاعدايعا ۇيلەسۋ، تۋراشىلدىقتان اينىماي جاڭالىق اشۋ كەرەك. ەكى جاق دوس بولۋ، ءوزارا سەنىم ارتۋ ساياسي ابزالدىلىعىن ساۋلەلەندىرىپ، ءوزارا پايدا جەتكىزىپ تەڭ يگىلىككە كەنەلۋگە، شىندىقتى ءىس جۇزىنەن ىزدەۋگە، باياندى دامۋعا تاباندى بولىپ، سەلبەسۋ جاڭا جولىن اشىپ، سەلبەسىپ دامۋدىڭ قوزعالىس قۋاتىن ۇزدىكسىز كۇشەيتۋى كەرەك.

شي جينپيڭ بىلاي دەپ باسا دارىپتەدى: كونگو (براززاۆيل) جۇڭگو افريكا سەلبەستىك تالقى مىنبەرىنىڭ افريكا جاق ورتاق ءتوراعا ەلى مىندەتىن اتقارعاننان بەرى، جۇڭگو جاقپەن بىرگە بەيجيڭ باسشىلار ءماجىلىسىنىڭ جەتىستىگىن تياناقتاندىرۋدى بەلسەنە ىلگەرىلەتىپ، قۋانارلىق ناتيجەگە قول جەتكىزدى. جۇڭگو جاق افريكا جاقپەن بىرگە ”ون ءىرى سەرىكتەستىك ارەكەتىن“ ويداعىداي اتقارىپ، جاسىل كاسىپ سالاسى، ەلەكتروندى ساۋدا ىستەرى جانە تولەۋ، عىلىم ـ تەحنولوگيا، جاساندى زەردە سياقتى جاڭا ارتۋ ءتۇيىنىن تۇلعالاپ، جۇڭگو - افريكا سەلبەستىگىنىڭ ساپاسىن جوعارىلاتىپ دارەجەسىن ءوسىرۋدى ىلگەرىلەتۋدى قالايدى. قازىر حالىقارالىق جاعدايدا وزگەرىس پەن بىلىقپالىق قاباتتاسۋدا، جۇڭگو مەن افريكا جەر شارىنىڭ وڭتۇستىگىنىڭ ماڭىزدى مۇشەسى رەتىندە، حالىقارانىڭ ادىلدىگىن، تۋراشىلدىعىن ساقتاۋ، دۇنيە ءجۇزىنىڭ بەيبىتشىلىگىن قورعاۋ، بىرگە دامۋدى جەبەۋ تاريحي جاۋاپكەرشىلىگىن ارقالاپ، ادامزاتتىڭ تاعدىرلاس ورتاق تۇلعاسىن قۇرۋدى قول ۇستاسا ىلگەرىلەتۋى كەرەك.

ساسوۋ مىنالاردى ءبىلدىردى: جۇڭگو جاپون شاپقىنشىلارىنا قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىن ءساتتى وتكىزىپ، جۇڭگو حالقىنىڭ ەرلىگى مەن دۇنيە ءجۇزى حالقىنىڭ ىنتىماعىن تولىق ايگىلەدى، بۇل قيمىلعا قاتىناسىپ، جۇڭگو جاقپەن بىرگە بەيبىتشىلىكتى قورعاپ، بولاشاق اشقانىمدى وتە داڭق سانايمىن. كونگو - جۇڭگو قارىم ـ قاتىناسى جوعارى دەڭگەيدەگى تاعدىرلاس ورتاق تۇلعاسىنا جوعارىلاپ، ەكى جاق جونىنەن بىرگە گۇلدەنىپ ـ كوركەيۋ، بىرگە دامۋ جاڭا جۇلگەسىن تۇراقتاندىردى. كونگو جاق ءبىر جۇڭگو پرينسيبىن باتىل اتقارادى، جۇڭگو جاقپەن ءار سالاداعى سەلبەستىكتى جيىلەتىپ، ەكى ەلدىڭ قارىم ـ قاتىناسىنا قۋاتتى قوزعاۋشى كۇش ۇستەۋدى ءۇمىت ەتەدى. جۇڭگو - افريكا سەلبەستىك تالقى مىنبەرىنىڭ ورتاق ءتوراعا ەلى رەتىندە، كونگو جاق جۇڭگو جاقپەن بىرگە جۇڭگو - افريكا سەلبەستىگىنىڭ اناعۇرلىم زور دامۋعا قول جەتكىزۋىن ىلگەرىلەتىپ، افريكا ەلدەرىنىڭ ەكونوميكالىق، قوعامدىق دامۋىنا كۇش قوسۋدى قالايدى. كونگو جاق ءتوراعا شي جينپيڭ العا قويعان الەمدىك باسقارۋ باستاماسىن بۇكىلدەي قۇپتايدى، بۇل كەلەلى باستاما اناعۇرلىم ءادىل، ۇيلەسىمدى حالىقارالىق باسقارۋ جۇيەسىن قۇرۋدى ىلگەرىلەتۋگە پايدالى، جەر شارىنىڭ وڭتۇستىگىندەگى ەلدەردى پايداعا كەنەلتەدى. كونگو جاق جۇڭگونىڭ افريكا ەلدەرىنەن كەدەن باجىسىن الماۋدى اتقارعاندىعىن جوعارى باعالايدى، افريكا - جۇڭگو ساۋدا ساياساتى سىندى وسى جاڭا ورايدى يگەرۋدى قالايدى.

ۋاڭ ي كەزدەسۋگە قاتىناستى.

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ۋىن شين، ساۋ جيايۋە). 9 ـ ايدىڭ 4 ـ كۇنى تۇستەن كەيىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن سەربيا زۇڭتۇڭى ۆۋچيچپەن كەزدەستى.

شي جينپيڭ بىلاي دەپ اتاپ كورسەتتى: جۇڭگو مەن سەربيا دۇنيە جۇزىلىك 2 ـ سوعىستىڭ ازيا مەن ەۆروپا سوعىس مايدانىندا فاشيزمدى جەڭۋ ءۇشىن جەكە ـ جەكە وراسان زور قۇرباندىق بەردى، ماڭىزدى ۇلەس قوستى. قازىر حالىقارالىق جاعدايدا وزگەرىس پەن بىلىقپالىق قاباتتاسىپ وتىر، جۇڭگو - سەربيا ەكى ەل دۇنيە جۇزىلىك 2 ـ سوعىس جونىندەگى دۇرىس تاريح كوزقاراسىن اسقاقتاتىپ، فاشيزمگە قارسى سوعىس جەڭىسىنىڭ جەتىستىگىن قورعاۋى كەرەك. كوپ جاقتى ىستەستىكتى ۇزدىكسىز قويۋلاتىپ، باستان ـ اياق تاريحتىڭ دۇرىس جاعىندا تۇرىپ، ءوز ۇقىق ـ مۇددەسى مەن حالىقارانىڭ ادىلدىگىن، تۋراشىلدىعىن باتىل قورعاپ، بىرلەسكەن مەملەكەتتەر ۇيىمى ۋستاۆىنىڭ باس ماقساتى مەن پرينسيبىن باتىل قورعاۋى كەرەك.

شي جينپيڭ بىلاي دەپ باسا دارىپتەدى: سەربيا جۇڭگومەن جاڭا داۋىردەگى تاعدىرلاس ورتا تۇلعانى بىرگە قۇرعان تۇڭعىش ەۆروپا ەلى بولىپ، ەكى ەل قارىم ـ قاتىناسىنىڭ ەرەكشە سيپاتىن جانە جوعارى دەڭگەيىن تولىق ايگىلەدى. قۇرىشتاي بەرىك دوس رەتىندە، جۇڭگو جاق سەربيا جاقتىڭ مەملەكەتتىڭ مۇددەسى مەن قوعام ورنىقتىلىعىن قورعاۋىن، ءوز ەلىنىڭ مەملەكەت جاعدايىنا ۇيلەسەتىن ءساتتى دامۋ جولىمەن ءجۇرۋىن قولدايدى. ەكى جاق دامۋ ستراتەگيالارىن ءتۇيىلىستىرۋدى كۇشەيتىپ، ەركىن ساۋدا كەلىسىمى جانە ءوزارا ۆيزا كەشىرىم ەتۋ، تىكە قاتىنايتىن كەزەكشى ۇشاق جەلىسى سياقتى قولايلى ورنالاستىرۋلاردان ويداعىداي پايدالانىپ، جاساندى زەردە، سيفرلى ەكونوميكا، جاڭا ەنەرگيا سياقتى سالالارداعى سەلبەستىكتى تەرەڭدەتىپ، جۇڭگو - سەربيا قارىم ـ قاتىناسىنىڭ ۇزدىكسىز العا قاراي دامۋىن ىلگەرىلەتۋى كەرەك.

ۆۋچيچ مىنالاردى ءبىلدىردى: جۇڭگو جاقتىڭ جۇڭگو حالقىنىڭ جاپون شاپقىنشىلارىنا قارسى سوعىسى جەڭىسىنىڭ 80 جىلدىعىن ەسكە ءتۇسىرۋ قيمىلىن ءساتتى وتكىزىپ، دۇنيە جۇزىنە جۇڭگو حالقىنىڭ ءتوراعا شي جينپيڭنىڭ ەرەن باسشىلىعىندا قول جەتكىزگەن ۇلى تابىسىن ايگىلەگەندىگىن قۇتتىقتايمىن. الەمدىك باسقارۋ باستاماسى — ءتوراعا شي جينپيڭ كەزەكتەگى حالىقارالىق جاعدايعا تەرەڭ تالداۋ جاساۋ نەگىزىندە العا قويعان تاعى ءبىر كەلەلى باستاما، مۇنىڭ ىشىندە يەلىك ۇقىق تەڭدىگىن جۇرگىزۋ، ادامدى نەگىز ەتۋدى دارىپتەۋ سىندى ۇستانىمدار الەمدىك باسقارۋ جۇيەسىنە رەفورما جاساۋ، كەمەلدەندىرۋ جونىنەن ماڭىزدى ءمان الادى، سەربيا جاق بۇكىلدەي قولدايدى. سەربيا مەن جۇڭگو قۇرىشتاي بەرىك دوستار، سەربيا جاق جۇڭگو جاقتىڭ سەربيا قيىنشىلىققا ۇشىراعان كەزدە كورسەتكەن قىمباتتى قولداۋى مەن كومەگىن ماڭگى ۇمىتپايدى، جۇڭگو جاقتىڭ وزەكتى مۇددەسىنە ساياتىن بارلىق ماسەلەلەردە جۇڭگو جاقتى ۇزدىكسىز باتىل قولدايدى. سەربيا مەن جۇڭگونىڭ ناقتى ىستەر سەلبەستىگىن ونان ارى جيىلەتۋدى ءۇمىت ەتەدى، جۇڭگو كاسىپورىندارىنىڭ سەربياعا كەلىپ قارجى قوسىپ شارۋاشىلىعىن گۇلدەندىرۋىن قارسى الادى.

ۋاڭ ي كەزدەسۋگە قاتىناستى.

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ساۋ جيايۋە، يۋان رۇي). 9 ـ ايدىڭ 4 ـ كۇنى تۇستەن بۇرىن مەملەكەت ءتوراعاسى شي جينپيڭ بەيجيڭ حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن ۆيەتنامنىڭ مەملەكەت ءتوراعاسى لياڭ چياڭمەن كەزدەستى.

شي جينپيڭ بىلاي دەپ اتاپ كورسەتتى: دۇنيە جۇزىلىك فاشيزمگە قارسى سوعىس جەڭىسى مىنانى تولىق بەينەلەدى: ادىلەتتىگە كومەك كوپ، ادىلەتسىزگە قولداۋ جوق، جەڭىس، ءسوز جوق، ادىلەت جاعىنا ءتان. جۇڭگو - ۆيەتنام ەكى جاق بىرلىكتە تاريحتى ەستە بەرىك ساقتاپ، ارداگەر قۇربانداردى ساعىنا ەسكە الىپ، ستراتەگيالىق ىستەستىكتى كۇشەيتىپ، دۇنيە جۇزىلىك 2 ـ سوعىستىڭ جەڭىس جەتىستىگىن قورعاپ، حالىقارالىق ادىلدىكتى، تۋراشىلدىقتى قورعاپ، تاريحتىڭ دۇرىس جاعىندا باتىل تۇرۋى كەرەك.

شي جينپيڭ بىلاي دەپ باسا دارىپتەدى: جۇڭگو جاق ۆيەتنامنىڭ ءوز ەلىنىڭ مەملەكەت جاعدايىنا ۇيلەسەتىن سوتسياليزم جولىمەن ويداعىداي ءجۇرۋىن، ۆيەتنام كوممۋنيستىك پارتياسىنىڭ 14 ـ قۇرىلتايىن ويداعىداي اشۋىن قولدايدى. ەكى جاق جولداس ۇستىنە باۋىرلاس بولۋ رۋحىن نەگىزگە الىپ، پارتيانى باسقارۋ، ەل باسقارۋ تاجىريبەلەرى جونىندەگى اۋىس ـ كۇيىستى تەرەڭدەتىپ، ديپلوماتيالىق قارىم ـ قاتىناس ورناتقاندىعىنىڭ 75 جىلدىعى جانە ”جۇڭگو - ۆيەتنام گۋمانيتارلىق اۋىس ـ كۇيىس جىلى“ جەلىلەس قيمىلىن ويداعىداي وتكىزىپ، ەكى ەل حالقىنا ناقتى پايدا اكەلۋى كەرەك. سىڭار جاقتىلىق، ورمان زاڭى كەرى اعىمى الدىندا، ءتىپتى دە كوپ ەل ىمىرالاسۋدىڭ، جول بەرۋدىڭ شىعار جولى جوق ەكەندىگىن، بىرلەسىپ ءوزىن الۋەتتەندىرگەندە عانا ءۇمىت بار ەكەندىگىن تانىپ جەتتى. مەنىڭ الەمدىك باسقارۋ باستاماسىن العا قويۋىم الەمدىك باسقارۋ جۇيەسىنىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋ ءۇشىن. جۇڭگو جاق ۆيەتنام جاقپەن بىرگە جەر شارىنىڭ وڭتۇستىگىنىڭ ورتاق ۇقىق ـ مۇددەسىن قورعاپ، دۇنيە جۇزىنە اناعۇرلىم كوپ وڭ ەنەرگيا ازىرلەۋدى قالايدى.

لياڭ چياڭ جۇڭگونىڭ جۇڭگو حالقىنىڭ جاپون شاپقىنشىلارىنا قارسى سوعىسى جەڭىسىنىڭ 80 جىلدىعىن ەسكە ءتۇسىرۋ قيمىلىن جانە شاڭحاي سەلبەستىك ۇيىمى تيانجين باسشىلار ءماجىلىسىن ءساتتى وتكىزگەندىگىن قىزۋ قۇتتىقتاپ، مىنالاردى ءبىلدىردى: 2 ماڭىزدى قيمىل تۇگەلدەي جۇڭگونىڭ حالىقاراداعى ورنى مەن ىقپالىن ايگىلەدى. ۆيەتنام جاق جۇڭگونىڭ ۇزدىكسىز دامىپ، زورايىپ، جۇڭگو ۇلگىسىندەگى وسىزامانداندىرۋ نىساناسىن جۇزەگە اسىرىپ، ءوڭىر مەن دۇنيە ءجۇزىنىڭ بەيبىتشىلىگى، دامۋى ءۇشىن اناعۇرلىم زور رول ساۋلەلەندىرەتىندىگىنە كامىل سەنەدى. ۆيەتنام - جۇڭگو ەكى پارتيا، ەكى ەل قارىم ـ قاتىناسىنىڭ دامۋى جاقسى، جوعارى جىكتەگىلەردىڭ بارىس ـ كەلىسى ءجيى، ءار سالاداعى سەلبەستىكتەردىڭ اياق الىسى ءساتتى. جۇڭگومەن قارىم ـ قاتىناس ۆيەتنام جونىنەن ستراتەگيالىق مانگە يە، ۆيەتنامنىڭ ديپلوماتيالىق ساياساتىندا ماڭداي الدى ورىندا تۇرادى، الدىمەن ويلاستىرىلادى. وزگەرىس پەن بىلىقپالىق قاباتتاسقان دۇنيە ءجۇزى جاعدايى الدىندا، ۆيەتنام جاق جۇڭگومەن قارىم ـ قاتىناستى تاباندىلىقپەن دامىتادى. ۆيەتنام جاق جۇڭگو جاقپەن تىعىز ىنتىماقتاسىپ، ءوزارا قولداۋ كورسەتىپ، ساياسي ءوزارا سەنىمدىلىكتى نىعايتىپ، ەل باسقارۋ جونىندەگى تاجىريبە اۋىس ـ كۇيىسىن كۇشەيتۋدى قالايدى. ەكى ەلدىڭ دامۋ ستراتەگيالارىن ءتۇيىلىستىرۋدى تەرەڭدەتىپ، ەكونوميكا ـ ساۋدا، نەگىزدىك قۇرىلعى، عىلىم ـ تەحنولوگيا، وقۋ ـ اعارتۋ سياقتى سالالارداعى سەلبەستىكتى كەڭەيتەدى. كوپ جاقتى تۇعىرلاردا ءوزارا سەلبەسىپ، بىرلەسكەن مەملەكەتتەر ۇيىمىنىڭ بەدەلى مەن حالىقارالىق ساۋدا ەرەجەسىن قورعاپ، الەمدىك باسقارۋ جۇيەسىنە رەفورما جاساۋدى، ونى كەمەلدەندىرۋدى ىلگەرىلەتەدى.

ۋاڭ ي كەزدەسۋگە قاتىناستى.

شينحۋا اگەنتتىگىنىڭ 9 ـ ايدىڭ 4 ـ كۇنى بەيجيڭنەن بەرگەن حابارى (تىلشىلەر ساۋ جيايۋە، حۋاڭ ياڭ). 9 ـ ايدىڭ 4 ـ كۇنى تۇستە مەملەكەت ءتوراعاسى شي جينپيڭ بەيجيڭ حالىق سارايىندا جۇڭگو حالقىنىڭ جاپون شاپقىنشىلارىنا قارسى سوعىسى مەن دۇنيە جۇزىلىك فاشيزمگە قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىنا قاتىناسۋ ءۇشىن جۇڭگوعا كەلگەن سلوۆاكيا زۇڭليى فيزومەن كەزدەستى.

شي جينپيڭ بىلاي دەپ اتاپ كورسەتتى: جۇڭگو - سلوۆاكيا ەكى ەل تۇگەلدەي كەزىندە دۇنيە جۇزىلىك فاشيزمگە قارسى سوعىس جەڭىسى ءۇشىن اسا زور ۇلتتىق قۇرباندىق بەرگەن، ەلەۋلى تاريحي ۇلەس قوسقان. قازىر دۇنيە جۇزىندە 100 جىلدىق وزگەرىس جەدەل قۇبىلىپ، حالىقارالىق قوعام بۇرىنعى ءارقانداي كەزدەگىمەن سالىستىرعاندا ىنتىماقتاسىپ سەلبەسۋگە اناعۇرلىم مۇقتاج بولىپ وتىر. ەكى جاق ادامزات تاعدىرلاس ورتاق تۇلعا ۇستانىمىنان جازباي، ناعىز كوپ جاقتىلىقتى امالياتتا ايگىلەپ، الەمدىك باسقارۋ جۇيەسىنە رەفورما جاساۋدى، ونى كەمەلدەندىرۋدى ىلگەرىلەتىپ، دۇنيە ءجۇزىنىڭ بەيبىتشىلىگى مەن دامۋىن جەبەۋگە بىرگە اناعۇرلىم زور ۇلەس قوسۋعا ءتيىس.

شي جينپيڭ بىلاي دەپ باسا دارىپتەدى: جۇڭگو جاق سلوۆاكيانىڭ جۇڭگومەن دوستىققا تاباندى بولعاندىعىن ايرىقشا القايدى، سلوۆاكيا جاقپەن جوعارى جىكتەگىلەردىڭ بارىس ـ كەلىسىن قويۋلاتىپ، وزدەرىنىڭ تاڭداعان دامۋ جولىن تاباندىلىقپەن قولداپ، ەل باسقارۋ تاجىريبە اۋىس ـ كۇيىسىن كۇشەيتىپ، ساياسي ءوزارا سەنىمدىلىكتى ۇزدىكسىز تەرەڭدەتۋدى قالايدى. جاڭا ەنەرگيا، نەگىزدىك قۇرىلعى، زات اينالىمى سياقتى ناقتى ىستەر سەلبەستىگىن بەلسەنە ىلگەرىلەتىپ، گۋمانيتارلىق اۋىس ـ كۇيىستى جەبەپ، ەكى ەل حالقىنا اناعۇرلىم مول قۇت ـ ىرىس اكەلەدى. سلوۆاكيا جاقتىڭ جۇڭگو - ەۆروپا وداعى قارىم ـ قاتىناسىنىڭ اقاۋسىز، ورنىقتى دامۋىن ىلگەرىلەتۋدە ۇزدىكسىز بەلسەندى رولىن ساۋلەلەندىرۋىن ءۇمىت ەتەمىن.

فيزو مىنالاردى ءبىلدىردى: جۇڭگو دۇنيە جۇزىلىك فاشيزمگە قارسى سوعىستىڭ جەڭىسكە جەتۋىنە، دۇنيە ءجۇزىنىڭ بەيبىتشىلىگىن قورعاۋعا ەلەۋلى ۇلەس قوستى. جۇڭگو جاق جۇڭگو حالقىنىڭ جاپون شاپقىنشىلارىنا قارسى سوعىس جەڭىسىنىڭ 80 جىلدىعىن ەسكە ءتۇسىرۋ قيمىلىن ءساتتى وتكىزىپ، دۇنيە جۇزىنە ادىلەت، ءسوزسىز، جەڭەدى، بەيبىتشىلىك، ءسوزسىز، جەڭەدى، حالىق، ءسوزسىز، جەڭەدى دەگەن كۇشتى ينفورماتسيا تاراتىپ، كىسىنى ءسۇيىندىردى. مەن ۇسىنىسپەن جۇڭگوعا كەلىپ وسى سالتاناتتى ىسكە كۋا بولعاندىعىمدى ايرىقشا ماقتانىش سانايمىن. سلوۆاكيا مەن جۇڭگو ستراتەگيالىق سەرىكتەستىك قارىم ـ قاتىناس ورناتقاننان بەرى، ەكى ەل سەلبەستىگىنىڭ اياق الىسى جەدەل ءارى ءساتتى بولدى. سلوۆاكيا جۇڭگومەن قارىم ـ قاتىناسىنا وسكەلەڭ ءمان بەرەدى، ءبىر جۇڭگو ساياساتىن تاباندىلىقپەن اتقارادى، جۇڭگو جاقپەن ەل باسقارۋ تاجىريبە اۋىس ـ كۇيىسىن تەرەڭدەتىپ، ءار سالاداعى سەلبەستىكتەردى كۇشەيتىپ، ادامداردىڭ بارىس ـ كەلىسىنە اناعۇرلىم قولايلىلىق جاساۋدى قالايدى، اناعۇرلىم كوپ جۇڭگو كاسپورىندارىنىڭ سلوۆاكياعا كەلىپ قارجى قوسىپ، شارۋاشىلىعىن گۇلدەندىرۋىن قارسى الادى. سلوۆاكيا جاق ءتوراعا شي جينپيڭ العا قويعان الەمدىك باسقارۋ باستاماسىنىڭ نەگىزگى پرينسيبىن قولدايدى، جۇڭگو جاقپەن ءجىتى بايلانىس، ىستەستىك جاساپ، الەمدىك باسقارۋ جۇيەسىنە رەفورما جاساۋ جانە ونى كەمەلدەندىرۋ ءۇشىن بەلسەندى قۇلشىنىس جاساۋدى قالايدى.

ۋاڭ ي كەزدەسۋگە قاتىناستى.