شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ جينالىسى سالتاناتپەن وتكىزىلدى

«حالىق گازەتى»، 9 - ايدىڭ 25 - كۇنى، ءۇرىمجى. ۇدەرە العا تارتقان 70 جىلدا تيانشان تاۋىنىڭ تۇستىگى مەن تەرىستىگىندە جاڭا بەينە جارىققا شىقتى. 9 - ايدىڭ 25 - كۇنى تۇستەن بۇرىن شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ جينالىسى شينجياڭ حالىق سارايىندا سالتاناتپەن وتكىزىلدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ قۇتتىقتاۋ جينالىسىنا قاتىناستى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك ساياسي كەڭەستىڭ ءتوراعاسى، ورتالىق ۋاكىلدەر ۇيىرمەسىنىڭ باستىعى ۋاڭ حۋنيڭ قاتىناستى ءارى ءسوز سويلەدى، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، ورتالىق كوميتەت كەڭسە مەڭگەرمەسىنىڭ مەڭگەرۋشىسى ساي چي قاتىناستى.

شينجياڭ حالىق سارايىندا شامدار سامالاداي جارقىراپ، دۋماندى بەينەگە شومدى. ءتوراعالار مىنبەسىنىڭ جوعارعى جاعىنا ”شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ جينالىسى“ دەگەن كەرمە تۋ ىلىنگەن، ارتقى پەردەنىڭ ءدال ورتاسىنا جۇڭحۋا حالىق رەسپۋبليكاسىنىڭ گەربى ءىلىنىپ، ەكى جاعىنا بەستەن نارت قىزىل تۋ قويىلعان. زالدىڭ ارتقى جاعىنا ”شي جينپيڭ جولداستى ۇيىتقى ەتكەن پارتيا ورتالىق كوميتەتىنىڭ توڭىرەگىنە اناعۇرلىم تىعىز ىنتىماقتاسىپ، ىنتىماقتى، جاراسىمدى، گۇلدەنگەن، باي، وركەنيەتتى، العا باسقان، تىنىش ءومىر، شات - شادىمان تىرشىلىك كەشىرگەن، ەكولوگياسى تاماشا سوتسياليستىك وسىزاماندانعان شينجياڭ قۇرۋ جولىندا قاجىماي - تالماي كۇرەس جۇرگىزەيىك“ دەگەن ۇران ىلىنگەن.

تۇستەن بۇرىن ساعات 10 نان 30 مينۋت وتكەندە ويناقى مۋزىكا ءۇنى ىشىندە شي جينپيڭ قاتارلى باسشى جولداستار ءتوراعالار مىنبەسىنە شىقتى، بۇكىل زالدان ۇزاققا سوزىلعان قىزۋ شاپالاق ءۇنى كوتەرىلدى.

شينجياڭ ۇيعۇر اۆتونوميالى رايوندىق پارتكومنىڭ ورىنباسار شۋجيى، اۆتونوميالى رايوندىق حالىق ۇكىمەتىنىڭ ءتوراعاسى ەركىن تۇنياز جينالىستىڭ باستالعانىن جاريالادى. بارلىق ادام ورىندارىنان تۇرىپ، مەملەكەت ءانىن اسقاقتاتا شىرقادى.

جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت بىرلىكساپ ءبولىمىنىڭ باستىعى، ورتالىق ۋاكىلدەر ۇيىرمەسى باستىعىنىڭ ورىنباسارى لي گانجيە جۇڭگو كوممۋنيستىك پارتياسى ورتالىق كوميتەتىنىڭ، مەملەكەتتىك حالىق قۇرىلتايى تۇراقتى كوميتەتىنىڭ، مەملەكەتتىك كەڭەستىڭ، مەملەكەتتىك ساياسي كەڭەستىڭ، ورتالىق اسكەري ىستەر كوميتەتىنىڭ شينجياڭ ۇيعۇر اۆتونوميالى رايونى قۇرىلعاندىعىنىڭ 70 جىلدىعىن قۇتتىقتاۋ جونىندەگى قۇتتىقتاۋ تەلەگرامماسىن وقىدى.

ۋاڭ حۋنيڭ ءسوز سويلەدى (تولىق مازمۇنىن «حالىق گازەتىنىڭ» 4 - بەتىنەن وقي الاسىزدار). ول بىلاي دەدى: 70 جىلدىڭ الدىندا پارتيا ورتالىق كوميتەتىنىڭ شىنايى قامقورلىعى مەن پارتيانىڭ ۇلت ساياساتىنىڭ نۇر - شۇعىلاسىندا شينجياڭ ۇيعۇر اۆتونوميالى رايونى قۇرىلعاندىعى جاريالاندى. 70 جىلدان بەرى، اسىرەسە، جاڭا داۋىردەن بەرى پارتيانىڭ باسشىلىعىندا، شينجياڭداعى ءار ۇلت حالقى بىرگە قوجايىن بولىپ، سوتسياليستىك توڭكەرىستىڭ، قۇرىلىستىڭ جانە رەفورما جاساپ، ەسىك اشۋدىڭ ۇلى جەڭىسىنە ۇزدىكسىز قول جەتكىزدى. شي جينپيڭ جولداستى ۇيىتقى ەتكەن پارتيا ورتالىق كوميتەتى شينجياڭ قىزمەتىن ستراتەگيالىق تۇرعىدان باعامداۋعا جانە جوسپارلاۋعا تاباندى بولىپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تۇراقتاندىرىپ، شينجياڭنىڭ ءتۇرلى ىستەرىندە تاريحي جەتىستىكتەرگە قول جەتكىزۋدى ىلگەرىلەتتى، شينجياڭ بۇكىل ەلمەن بىرگە كەدەيلىكتەن ارىلتۋدان قامال الۋ شايقاسىنىڭ جەڭىسىنە قول جەتكىزىپ، جاپپاي دوڭگەلەك داۋلەتتى قوعام ورناتتى، شينجياڭداعى ۇلتتاردىڭ ۇلى ىنتىماعى ۇزدىكسىز بەكەمدەلىپ، تەرەڭدەپ، جۇڭحۋا ۇلتى ورتاق تۇلعا تانىمى جۇرت جۇرەگىنە تەرەڭ ۇيالادى. ءار ۇلت حالقى اناردىڭ دانىندەي تىعىز ۇيىسىپ، جۇڭگو ۇلگىسىندەگى وسىزامانداندىرۋ جولىندا ارشىندى قاداممەن العا باستى.

ۋاڭ حۋنيڭ مىنالاردى ءبىلدىردى: شينجياڭ ۇيعۇر اۆتونوميالى رايونىنىڭ 70 جىلدان بەرى قول جەتكىزگەن شۇعىلالى تابىستارى پارتيانىڭ باسشىلىعى مەن سوتسياليستىك ءتۇزىمنىڭ ابزالدىعىن تولىق ايگىلەدى، ۇلت ماسەلەسىن شەشۋدىڭ جۇڭگوشا دۇرىس جولىنىڭ قۇدىرەتتى ومىرشەڭدىك كۇشىن تولىق ايگىلەدى، جاڭا داۋىردەگى پارتيانىڭ شينجياڭدى باسقارۋ جالپى جوباسىنىڭ بۇكىلدەي دۇرىس ەكەندىگىن تولىق دالەلدەدى.

ۋاڭ حۋنيڭ مىنالاردى ءبىلدىردى: شينجياڭنىڭ وسىزامانداندىرۋ قۇرىلىسى جاڭا تاريحي باستامادا تۇر، شي جينپيڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا 20 - قۇرىلتايىنىڭ جانە پارتيا 20 - كەزەكتى ورتالىق كوميتەتى ەكىنشى، ءۇشىنشى جالپى ماجىلىستەرىنىڭ رۋحىن جاپپاي دايەكتىلەندىرىپ، تياناقتاندىرىپ، ”ەكىنى تۇراقتاندىرۋدىڭ“ شەشۋشى ءمانىن تەرەڭ ءتۇسىنىپ، ”ءتورت تانىمدى“ كۇشەيتىپ، ”ءتورت سەنىمدى“ بەكەمدەپ، ”ەكىنى قورعاۋدى“ ورىنداپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دۇرىس، جان - جاقتى دايەكتىلەندىرىپ، ۇلتتىق وڭىرلىك اۆتونوميا تۇزىمىنە تاباندى بولىپ جانە ونى كەمەلدەندىرىپ، شينجياڭ قىزمەتىنىڭ باس نىساناسىن مىقتاپ يگەرىپ، جۇڭحۋا ۇلتى ورتاق تۇلعا تانىمى نەگىزگى جەلىسىن مىقتاپ يگەرىپ، شينجياڭدى زاڭمەن جونگە سالۋعا، شينجياڭدى ىنتىماقتاسا ورنىقتىرۋعا، شينجياڭدى مادەنيەتپەن نارلەندىرۋگە، حالىقتى اۋقاتتاندىرىپ، شينجياڭدى گۇلدەندىرۋگە، شينجياڭدى باياندى كوركەيتۋگە باستان - اياق تاباندى بولىپ، ىنتىماقتى، جاراسىمدى، گۇلدەنگەن، باي، وركەنيەتتى، العا باسقان، تىنىش ءومىر، شات - شادىمان تىرشىلىك كەشىرگەن، ەكولوگياسى تاماشا سوتسياليستىك وسىزاماندانعان شينجياڭ قۇرۋ جولىندا قاجىماي - تالماي كۇرەس جۇرگىزۋ كەرەك.

شينجياڭ ۇيعۇر اۆتونوميالى رايوندىق پارتكومنىڭ شۋجيى چىن شياۋجياڭ، شينجياڭ ءوندىرىس - قۇرىلىس بيڭتۋانىنىڭ جىڭۋيى حى جۇڭيۋ، ۇيعۇر بۇقاراسىنىڭ ۋاكىلى امىراگۇل ابدۇل، حانزۋ بۇقاراسىنىڭ ۋاكىلى گۋ شياڭفىڭ جينالىستا ءسوز سويلەدى.

حى ليفىڭ، ۋاڭ شياۋحۇڭ، شوكىرات زاكىر، چىن ي - چين، ۋاڭ دۇڭفىڭ جانە ليۋ جىنلي، شينجياڭدا قىزمەت ىستەگەن ساقا جولداستار، سونداي - اق ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، ورتالىق ۋاكىلدەر ۇيىرمەسىنىڭ بارلىق مۇشەسى، شينجياڭ ۇيعۇر اۆتونوميالى رايونىنىڭ پارتيا، ۇكىمەت، ارميا ورىندارىنداعى جاۋاپتى جولداستار قاتارلىلار جينالىسقا قاتىناستى.

كەلۋ قاينارى: حالىق تورابى