شي جينپيڭ فينلانديانىڭ زۇڭليى وربومەن كەزدەستى

1 - ايدىڭ 27 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن فينلانديانىڭ زۇڭليى وربومەن كەزدەستى.

سۋرەتتى شينحۋا اگەنتتىگىنىڭ ءتىلشىسى لي شياڭ تۇسىرگەن

شينحۋا اگەنتتىگى، 1 - ايدىڭ 27 - كۇنى، بەيجيڭ (ءتىلشى فىڭ ران). 1 - ايدىڭ 27 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا رەسمي ساپارمەن كەلگەن فينلانديانىڭ زۇڭليى وربومەن كەزدەستى.

شي جينپيڭ مىنالاردى اتاپ كورسەتتى: فينلانديا _ جاڭا جۇڭگومەن ەڭ ەرتە ديپلوماتيالىق قارىم - قاتىناس ورناتقان ەلدەردىڭ ءبىرى. ديپلوماتيالىق قارىم - قاتىناس ورناتقان 76 جىلدان بەرى، حالىقارالىق جاعداي قالاي وزگەرسە دە، جۇڭگو - فينلانديا قارىم - قاتىناسى باستان - اياق ورنىقتى دامىپ، ءوزارا قۇرمەت ەتۋگە، تەڭ تۇرعىدا مامىلە جاساۋعا، بولاشاقتى بەتكە الۋعا، سەلبەسىپ تەڭ يگىلىككە كەنەلۋگە تاباندى بولدى. جۇڭگو مەن فينلانديا حالقى قايسار، تالىقپاي تالپىناتىن رۋحقا يە، ەكى جاق ءوزارا سەنىمدىلىكتى ارتتىرىپ، اۋىس - كۇيىستى كۇشەيتىپ، سەلبەستىكتى تەرەڭدەتىپ، ءوز ەلدەرىنىڭ دامۋىنا دەم بەرىپ، ەكى ەل حالقىنا ءتىپتى دە كوپ باقىت جاراتۋى كەرەك.

شي جينپيڭ مىنالاردى باسا دارىپتەدى: جۇڭگو مەن فينلانديانىڭ دوستىق، ءوزارا سەنىمدىلىگى تاريحي نەگىزگە يە. بيىل _ جۇڭگونىڭ ”15 - بەسجىلدىق“ جوباسىنىڭ باستالعان جىلى. جۇڭگو جوعارى ساپالى دامۋدى ۇزدىكسىز ىلگەرىلەتىپ، جوعارى دەڭگەيدەگى سىرتقا ەسىك اشۋدى كەڭەيتەدى. ەكى جاق ءوزارا ءتيىمدى سەلبەستىكتى تەرەڭدەتىپ، ەنەرگيا تيپىندە بۇرىلىس جاساۋ، اينالمالى ەكونوميكا، اۋىل شارۋاشىلىعى، ورمان شارۋاشىلىعى، عىلىم - تەحنيكادا جاڭالىق اشۋ سياقتى سالالاردا اناعۇرلىم كوپ سەلبەستىك جەتىستىكتەرىن قالىپتاستىرۋى كەرەك. فينلانديا كاسىپورىندارىنىڭ جۇڭگونىڭ وراسان كەڭ بازارىنا كەلىپ ەمىن - ەركىن ”سەرۋەندەپ“، دۇنيە جۇزىلى باسەكەلىك قۋاتىن جوعارىلاتۋىن قارسى الامىز. فينلانديا _ قار - مۇز جاعىندا قۋاتتى ەل، جۇڭگو دا _ قار - مۇز جاعىندا ءىرى ەل، ەكى جاق اۋىس - كۇيىستى، سەلبەستىكتى كۇشەيتىپ، قار - مۇز دوستىعىن جالعاستىرۋى كەرەك. فينلانديا بۇقاراسىنىڭ جۇڭگوعا كەلىپ بايىرعى ءارى وسىزامانعى جۇڭگونى سەزىنۋىن قارسى الامىز.

شي جينپيڭ بىلاي دەپ اتاپ كورسەتتى: بۇگىنگى دۇنيە ءجۇزى كوپ ءتۇرلى حاۋىپ - قاتەر مەن سىن - سايىسقا ءدوپ كەلىپ وتىر، حالىقارالىق قوعام قول ۇستاسا توتەپ بەرۋگە مۇقتاج، ءىرى ەلدەر، اسىرەسە، باستاماشىلدىقپەن تەڭدىكتى، زاڭمەن جونگە سالۋدى، سەلبەستىكتى، سەنىمدىلىكتى دارىپتەۋى كەرەك. جۇڭگو جاق فينلانديا جاقپەن بىرگە بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيە مەن حالىقارالىق زاڭدى نەگىز ەتكەن حالىقارالىق ءتارتىپتى باتىل قورعاپ، دۇنيە جۇزىلىك سايىستارعا بىرگە توتەپ بەرىپ، تەڭ، ءتارتىپتى دۇنيە ءجۇزىنىڭ كوپ ۇيەكتەنۋىن، جالپىعا ءتيىمدى، سيىسىمدى ەكونوميكانىڭ جاھاندانۋىن ىلگەرىلەتۋدى قالايدى. جۇڭگو مەن ەۆروپا قارسىلاس ەمەس، سەرىكتەر، ەكى جاقتىڭ سەلبەستىگى باسەكەدەن، ورتاق تانىمى الاۋىزدىقتان كوپ. فينلانديانىڭ جۇڭگو - ەۆروپا قارىم - قاتىناسىنىڭ اقاۋسىز، ورنىقتى دامۋىن ىلگەرىلەتۋدە سىندارلى رول اتقارۋىن ءۇمىت ەتەمىن.

وربو مىنالاردى ءبىلدىردى: فينلانديا مەن جۇڭگونىڭ ءداستۇرلى دوستىعى تەرەڭ، ەكى ەل قارىم - قاتىناسى ءوزارا قۇرمەت ەتۋ، ءوزارا سەنىم ارتۋ نەگىزىندە قۇرىلىپ، ۇزاق ۋاقىت ورنىقتى دامىدى. بىلتىر ەكى جاق ديپلوماتيالىق قارىم - قاتىناس ورناتۋدىڭ 75 جىلدىعىن بىرگە قۇتتىقتادى. فينلانديا كاسىپورىندارى جۇڭگوعا بارىپ سەلبەستىك جاساۋعا وتە قىزىعادى. فينلانديا جاق جۇڭگو جاقپەن ەكى ەل مەملەكەت باسشىلارى كەلىسكەن ماڭىزدى ورتاق تانىمدى تياناقتاندىرىپ، جوعارى جىكتەگىلەردىڭ بارىس - كەلىسىن جيىلەتىپ، ساۋدا، قارجى قوسۋ، سيفرلى ەكونوميكا، تازا ەنەرگيا، اۋىل شارۋاشىلىعى سياقتى سالالارداعى ناقتى سەلبەستىكتى تەرەڭدەتىپ، ەكى ەل حالقىنىڭ ىرىس - قۇتىن ارتتىرۋدى قالايدى. فينلانديا جاق ءبىر جۇڭگو ساياساتىن باتىل اتقارادى. فينلانديا جاق جۇڭگونىڭ دامۋدا قول جەتكىزگەن كورنەكتى تابىستارىنا سۇيىنەدى، جۇڭگونىڭ حالىقارالىق ىستەردە ماڭىزدى سىندارلى رول اتقارعاندىعىن القايدى، جۇڭگومەن پىكىرلەسۋدى، سايكەسۋدى كۇشەيتىپ، دۇنيە ءجۇزىنىڭ بەيبىتشىلىگى مەن ورنىقتىلىعىن بىرگە قورعاۋدى قالايدى. ەۆروپا - جۇڭگو قاتىناسىنىڭ سىندارلى دامۋىن ساقتاۋ توتەنشە ماڭىزدى، فينلانديا ەۆروپانىڭ ستراتەگيالىق دەربەستىگىن قۋاتتايدى، ەركىن ساۋدانى قولدايدى، ەۆروپا مەن جۇڭگونىڭ ساۋدا قاقتىعىسى ماسەلەسىن ۇيلەسىمدى شەشىپ، قارىم - قاتىناستىڭ اقاۋسىز دامۋىن ىلگەرىلەتۋدە بەلسەندى رول اتقارۋدى قالايدى.

ۋاڭ ي كەزدەسۋدە بىرگە بولدى.