شي جينپيڭ اراب بىرىككەن امىرلىگى ابۋدابي پاتشا مۇراگەرى حاليدپەن كەزدەستى

4 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا ساپارلاي كەلگەن اراب بىرىككەن امىرلىگى ابۋدابي پاتشا مۇراگەرى حاليدپەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 4 - ايدىڭ 14 - كۇنى، بەيجيڭ (ءتىلشى ۋىن شين). 4 - ايدىڭ 14 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا جۇڭگوعا ساپارلاي كەلگەن اراب بىرىككەن امىرلىگى ابۋدابي پاتشا مۇراگەرى حاليدپەن كەزدەستى.

شي جينپيڭ بىلاي دەپ اتاپ كورسەتتى: اراب بىرىككەن امىرلىگى _ جۇڭگونىڭ جان - جاقتى ستراتەگيالىق سەرىگى، جۇڭگو اراب بىرىككەن امىرلىگىمەن قارىم - قاتىناستى دامىتۋعا باستان - اياق ايرىقشا ءمان بەرىپ كەلەدى. ەكى جاقتىڭ بىرگە قۇلشىنۋىندا، جۇڭگو - اراب بىرىككەن امىرلىگى قارىم - قاتىناسى اقاۋسىز، ورنىقتى دامۋدى ساقتاپ، ساياسي ءوزارا سەنىمدىلىك ۇزدىكسىز تەرەڭدەپ، ناقتى سەلبەستىك ورنىقتى ىلگەرىلەپ، گۋمانيتارلىق اۋىس - كۇيىس باي مازمۇندى بولدى. جۇڭگو - اراب بىرىككەن امىرلىگى قارىم - قاتىناسىن بەكەمدەۋ جانە جوعارىلاتۋ _ ەكى جاقتىڭ بەرىك ورتاق تانىمى، ەكى ەل حالقىنىڭ تىلەگىنە ۇيلەسەدى. جۇڭگو جاق اراب بىرىككەن امىرلىگى جاقپەن قول ۇستاسا بىرگە ءجۇرىپ، جۇڭگو مەن اراب بىرىككەن امىرلىگىنىڭ اناعۇرلىم ورنىقتى، بەرىك، ومىرشەڭدىك كۇشكە باي جالپى بەتتىك ستراتەگيالىق سەرىكتەستىك قارىم - قاتىناسىن ورناتۋدى قالايدى. ەكى جاق ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياتىن ماسەلەلەردە ۇزدىكسىز ءبىرىن - ءبىرى قولداپ، جوعارى جىكتەگىلەردىڭ بارىس - كەلىسىن ساقتاپ، ستراتەگيالىق ءوزارا سەنىمدىلىكتى بەكەمدەۋى كەرەك. دامۋ ستراتەگياسىن ۇشتاستىرۋدى كۇشەيتىپ، ەنەرگيا، قارجى قوسۋ، ساۋدا، عىلىم - تەحنيكا سياقتى سالالاردا كومەسكى كۇشتەردى ىشكەرىلەي اشىپ، ءوزارا ءتيىمدى سەلبەستىكتى تەرەڭدەتۋ كەرەك. وقۋ - اعارتۋ، حالىقتىق اۆياتسيا، ساياحات سياقتى سەلبەستىكتەردىڭ اناعۇرلىم زور ىلگەرىلەۋشىلىككە قول جەتكىزۋىن ىلگەرىلەتىپ، گۋمانيتارلىق اۋىس - كۇيىستى جيىلەتىپ، حالىق رايى نەگىزىن بەكەمدەۋ كەرەك. بىرلەسكەن مەملەكەتتەر ۇيىمى، بريكس ەلدەرى سياقتى كوپ جاقتى تۇعىرلاردا سايكەسۋدى، سەلبەسۋدى كۇشەيتىپ، جۇڭگو - اراب بىرىككەن امىرلىگى قارى - قاتىناسىنىڭ ورنىقتىلىعى ارقىلى حالىقارالىق جانە وڭىرلىك جاعدايدىڭ تۇراقسىزدىعىنا توتەپ بەرىپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتۋ كەرەك.

ەكى جاق قازىرگى ورتا شىعىس پەن شىعاناق رايونىنىڭ جاعدايى جونىندە پىكىر اۋىستىردى. شي جينپيڭ جۇڭگو جاقتىڭ تاتۋلاسۋعا ءناسيحاتتاپ، كەلىسسوزدى جەبەۋدەگى پرينسيپتىك تۇرعىسىن باسا دارىپتەپ، وسى ءۇشىن ۇزدىكسىز سىندارلى رول اتقارۋدى قايتالاي دارىپتەدى.

شي جينپيڭ ورتا شىعىستىڭ بەيبىتشىلىگى مەن ورنىقتىلىعىن قورعاۋ جانە جەبەۋ جونىندە مىناداي 4 ءتۇرلى قۋاتتامانى العا قويدى: ءبىرىنشى، بەيبىت قاتار تۇرۋ پرينسيبىنە تاباندى بولۋ. ورتا شىعىس، شىعاناق ەلدەرى ءبىر - بىرىنە ارقا سۇيەيدى، كوشىپ كەتپەيتىن كورشىلەر. ورتا شىعىس، شىعاناق ەلدەرىنىڭ قارىم - قاتىناستى جاقسارتۋىن قولداپ، ورتاق، كەشەندى، سەلبەسكەن، باياندى ورتا شىعىس جانە شىعاناق ءوڭىرىنىڭ حاۋىپسىزدىك جۇلگەسىن ورناتۋدى ىلگەرىلەتىپ، بەيبىت قاتار تۇرۋدىڭ نەگىزىن بەكەمدەۋ كەرەك. ەكىنشى، مەملەكەتتىڭ يەلىك ۇقىعى پرينسيبىنە تاباندى بولۋ. يەلىك ۇقىق _ ءار ەلدىڭ، اسىرەسە، قالىڭ وركەندەپ كەلە جاتقان ەلدەردىڭ تابان تىرەپ تۇرۋىنىڭ سۇيەنىشى، وعان قول سۇعۋعا بولمايدى. ورتا شىعىستاعى، شىعاناقتاعى ەلدەردىڭ يەلىك ۇقىعىنا، حاۋىپسىزدىگىنە جانە تەرريتوريا تۇتاستىعىنا شىنايى قۇرمەت ەتۋ، ءار ەلدىڭ ادامدارىنىڭ، قۇرىلعىلارىنىڭ، قۇرىلىمدارىنىڭ حاۋىپسىزدىگىن شىنايى قورعاۋ كەرەك. ءۇشىنشى، حالىقارالىق زاڭمەن باسقارۋ پرينسيبىنە تاباندى بولۋ. حالىقارالىق زاڭمەن باسقارۋدىڭ بەدەلىن قورعاۋدا ”ۇيلەسسە قولدانۋعا، ۇيلەسپەسە تاستاۋعا“، دۇنيە ءجۇزىن تاعىلىققا قايتا ورالتۋعا بولمايدى. بىرلەسكەن مەملەكەتتەر ۇيىمىن ۇيتقى ەتكەن حالىقارالىق جۇيەنى، حالىقارالىق زاڭدى نەگىز ەتكەن حالىقارالىق ءتارتىپتى، بىرلەسكەن مەملەكەتتەر ۇيىمى ۋستاۆىنىڭ نەگىزگى ماقساتى مەن پرينسيبىن نەگىز ەتكەن حالىقارالىق قارىم - قاتىناستىڭ نەگىزگى ولشەمىن باتىل قورعاۋ كەرەك. ءتورتىنشى، دامۋ مەن حاۋىپسىزدىكتى ءبىر تۇتاس جوسپارلاۋعا تاباندى بولۋ. حاۋىپسىزدىك − دامۋدىڭ العى شارتى، دامۋ − حاۋىپسىزدىكتىڭ كەپىلى. ءارقايسى جاق ورتا شىعىس، شىعاناق ەلدەرىنىڭ دامۋىنا تاماشا ورتا جاراتىپ، وڭ ەنەرگيا قوسۋى كەرەك. جۇڭگو ورتا شىعىس شىعاناق ەلدەرىمەن جۇڭگو ۇلگىسىندەگى وسىزامانداندىرۋ ورايىنان بىرگە يگىلىكتەنىپ، ءوڭىردىڭ دامۋى مەن حاۋىپسىزدىك توپىراعىن بەكەمدەۋدى قالايدى.

حاليد مىنالاردى ءبىلدىردى: اراب بىرىككەن امىرلىگى مەن جۇڭگونىڭ قارىم - قاتىناسىنىڭ تاريحى ۇزاق، نەگىزى تەرەڭ، ەكى ەل باستان - اياق ءوزارا قۇرمەت ەتىپ، ءوزارا سەنىم ارتىپ كەلەدى، كەڭ كولەمدى ورتاق مۇددەگە يە. اراب بىرىككەن امىرلىگى جاق جۇڭگومەن قارىم - قاتىناسىن دامىتۋعا ايرىقشا ءمان بەرەدى، جۇڭگو جاقپەن ەكى ەل مەملەكەت باسشىلارى كەلىسكەن ماڭىزدى ورتاق تانىمدى ويداعىداي تياناقتاندىرىپ، ءار سالاداعى سەلبەستىكتى تەرەڭدەتىپ، ەكى ەل قارىم - قاتىناسىنا اناعۇرلىم كەڭ ءورىس اشىپ، ەكى ەل حالقىن باقىتقا كەنەلتۋدى قالايدى. اراب بىرىككەن امىرلىگى جاق جۇڭگونىڭ حالىقارالىق ىستەردە جاۋاپكەرشىلىك ارقالاعاندىعىن جانە سىندارلى رول اتقارىپ، قازىرگى ورتا شىعىس داعدارىسىن ساياسي جولمەن شەشۋگە بەلسەندى قۇلشىنىس جاساعاندىعىن القايدى. اراب بىرىككەن امىرلىگى جاق جۇڭگو جاقپەن تىعىز قارىم - قاتىناستى، سايكەسۋدى ساقتاۋعا كۇش سالىپ، قاتىستى جاقتاردىڭ سوعىستى توقتاتىپ، ءوڭىردىڭ بەيبىتشىلىگى مەن ورنىقتىلىعىن تەز ارادا قالپىنا كەلتىرىپ، حالىقارالىق تەڭىز تاسىمالى حاۋىپسىزدىگىن قورعاپ، دۇنيە ءجۇزى ەكونوميكاسى مەن ەنەرگيا حاۋىپسىزدىگىنە اناعۇرلىم زور ىقپال جاساۋدان ساقتانۋىن جەبەيدى. اراب بىرىككەن امىرلىگى جاق اراب بىرىككەن امىرلىگىندەگى جۇڭگو ازاماتتارى مەن قۇرىلىمدارىنىڭ حاۋىپسىزدىگىن شىنايى قورعايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى