كەي جەرلەردە ورتاشادان باستاپ قالىڭ جاڭبىر نەمەسە قار جاۋادى شينجياڭنىڭ اۋا رايىنان مالىمەتتى كورىڭىزدەر

4 – ايدىڭ 13 – كۇنى، ءتىلشىنىڭ شينجياڭ اۋا رايى ستانسياسىنان ۇعىسۋىنشا، وسى اپتادا (4 – ايدىڭ 13 – كۇنىنەن 19 – كۇنىنە دەيىن) شينجياڭدا ىلگەرىندى ـ كەيىندى ەكى رەت سۋىق اعىس بولادى، بۇكىل شينجياڭنىڭ باسىم كوپ بولەگىنىڭ تەمپەراتۋراسى تولقۋ بارىسىندا تومەندەيدى، ءۇرىمجى قالاسىندا كوپ رەت وتكىنشى جاڭبىر مەن بوراندى اۋا رايى بولادى.

العاشقى سۋىق اۋانىڭ اسەر ەتۋ ۋاقىتى 4 - ايدىڭ 13 - كۇنى تۇننەن 15 - كۇنى كۇندىزگە دەيىن، سولتۇستىك شينجياڭنىڭ باتىس سولتۇستىك بولەگى، شىحىزى قالاسى، ءۇرىمجى قالاسى، سانجى حۇيزۋ اۆتونوميالى وبلىسى قاتارلى جەرلەردىڭ ءىشىنارا وڭىرلەرىندە سەبەزگى جاڭبىر جاۋادى، مۇنىڭ ىشىندە ىلە اڭعارىنىڭ شىعىس بولەگى، تارباعاتاي ايماعى، التاي ايماعىنىڭ سولتۇستىك، شىعىس بولەگى، ءۇرىمجى قالاسى، بايىنعولىن موڭعۇل اۆتونوميالى وبلىسىنىڭ وڭتۇستىگىندەگى تاۋلى ءوڭىر قاتارلى جەرلەردىڭ ءىشىنارا وڭىرلەرىندە ورتاشادان باستاپ نوسەر نەمەسە قار جاۋادى. تاۋلى وڭىرلەدىڭ ءىشىنارا جەرلەرىندە قالىڭ قار جاۋادى، جوعارىدا اتالعان وڭىرلەردە جانە شىعىس شينجياڭدا باتىس سولتۇستىكتەن 5 بال اينالاسىندا بوران سوعادى، جەل وتتەرىندەگى جەل كۇشى 9 دا 10 بالعا جەتەدى.

ەكىنشى رەتكى سۋىق اۋا اعىس 4 – ايدىڭ 16 – كۇنى تۇستەن كەيىننەن 18 – كۇنى تۇنگە دەيىن بولادى، سولتۇستىك شينجياڭنىڭ كوپ بولەگى، وڭتۇستىك شينجياڭنىڭ باتىسى، بايىنعولىن وبلىسىنىڭ سولتۇستىگى، تۇرپان قالاسىنىڭ سولتۇستىگى، قۇمىل قالاسىنىڭ سولتۇستىگىندەگى تاۋلى وڭىرلەردە سەبەزگى جاڭبىر جاۋادى، مۇنىڭ ىشىندە سولتۇستىك شينجياڭنىڭ باتىس سولتۇستىگى، تارباعاتاي ايماعىنىڭ وڭتۇستىگى، شىحىزى قالاسى، ءۇرىمجى قالاسى، سانجى وبلىسى، وڭتۇستىك شينجياڭنىڭ باتىسى، بايىنعولىن وبلىسىنىڭ سولتۇستىگى قاتارلى جەرلەردەگى تاۋلى وڭىرلەردىڭ ءىشىنارا جەرلەرىندە قالىڭ جاڭبىر نەمەسە قار جاۋادى، تاۋلى جەرلەردە نوسەر نەمەسە قار جاۋادى. سول كەزدە جوعارىداعى وڭىرلەردە قيىس باتىستان 5 بال اينالاسىندا بوران سوعادى، جەل وتىندەگى جەل كۇشى 10 بالعا جەتەدى، مەزەتتىك جەل كۇشى 12 بال اينالاسىندا بولادى.

ەكى رەتكى سۋىق اعىستىڭ اسەرىنەن سولتۇستىك شينجياڭنىڭ كوپ بولەگىندە، شىعىس شينجياڭ جانە وڭتۇستىك شينجياڭ ويپاتىنىڭ شىعىس بولەگىندە تەمپەراتۋرا ىلگەرىندى-كەيىندى 5 تە 8 سەلتسي گرادۋس تومەندەيدى، سولتۇستىك شينجياڭنىڭ سولتۇستىگىندەگى ءىشىنارا وڭىرلەردە تەمپەراتۋرا 8 دە 10 سەلتسي گرادۋس تومەندەيدى، سۋىق اعىس بولادى، سونداي - اق ۇقساماعان دارەجەدەگى قىراۋ ۇسىگى جۇرەدى.

شينجياڭ اۋا رايى ستانسياسى مىنانى ەسكەرتتى: وسى اپتادا جاۋىن – شاشىن بولادى، بوران سوعادى، تەمپەراتۋرا تومەندەيدى، ەگىن، مال شارۋاشىلىق وندىرىسىنە، قاتىناسقا، ءجۇرىس – تۇرىسقا، ساياحاتقا جاسايتىن ءتيىمسىز ىقپالىنان ساقتانۋ كەرەك.

كەلۋ قاينارى: حالىق تورابى