شي جينپيڭ رەسەيدىڭ سىرتقى ىستەر مينيسترى لاۆروۆپەن كەزدەستى

4 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا رەسەيدىڭ سىرتقى ىستەر مينيسترى لاۆروۆپەن كەزدەستى.

سۋرەتتى شينحۋا اگەنتتىگىنىڭ ءتىلشىسى حۋاڭ جيڭۋىن تۇسىرگەن

شينحۋا اگەنتتىگى، 4 - ايدىڭ 15 - كۇنى، بەيجيڭ (ءتىلشى فىڭ شينران). 4 - ايدىڭ 15 - كۇنى تۇستەن بۇرىن مەملەكەت ءتوراعاسى شي جينپيڭ بەيجيڭدەگى حالىق سارايىندا رەسەيدىڭ سىرتقى ىستەر مينيسترى لاۆروۆپەن كەزدەستى.

شي جينپيڭ لاۆروۆقا پۋتين زۇڭتۇڭعا دەگەن ىقىلاستى سالەمىن جەتكىزۋدى تاپسىردى. شي جينپيڭ بىلاي دەپ اتاپ كورسەتتى: بيىل _ جۇڭگو مەن رەسەيدىڭ ستراتەگيالىق سەلبەستىك سەرىكتەستىك قارىم - قاتىناس ورناتقاندىعىنىڭ 30 جىلدىعى، سونداي - اق «جۇڭگو مەن رەسەيدىڭ تاتۋ كورشىلىك، دوستىق سەلبەستىك شارتىنا» قول قويىلعاندىعىنىڭ 25 جىلدىعى، ەكى ەلدىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسى جوعارى دەڭگەيدە دامۋدى ساقتاپ، ءار سالاداعى سەلبەستىگى سۇبەلى ناتيجەلەرگە قول جەتكىزدى. وزگەرىس پەن بىلىقپالىق قاباتتاسقان حالىقارالىق جاعداي الدىندا، جۇڭگو - رەسەي قارىم - قاتىناسىنىڭ ورنىقتىلىعى مەن تۇراقتىلىعى توتەنشە باعالى، «جۇڭگو - رەسەي تاتۋ كورشىلىك، دوستىق سەلبەستىك شارتىنىڭ» قۋاتتى ومىرشەڭدىك كۇشى مەن ۇلگى كورسەتۋ ءمانى اناعۇرلىم كورنەكتىلەندى. ەكى جاق پۋتين زۇڭتۇڭ ەكەۋىمىز كەلىسكەن ماڭىزدى ورتاق تانىمدى بار كۇشپەن تياناقتاندىرىپ، ستراتەگيالىق كەڭەسۋدى كۇشەيتىپ، ديپلوماتيالىق سايكەسۋدى جيىلەتىپ، جۇڭگو مەن رەسەيدىڭ جان - جاقتى ستراتەگيالىق ىستەستىك سەرىكتەستىك قارىم - قاتىناسىنىڭ اناعۇرلىم بيىكتە تۇرۋىن، اناعۇرلىم ورنىقتى ءجۇرۋىن، اناعۇرلىم الىسقا جەتۋىن ىلگەرىلەتۋى كەرەك.

شي جينپيڭ بىلاي دەپ باسا دارىپتەدى: 100 جىلدا بولماعان زور وزگەرىس الدىندا، جۇڭگو مەن رەسەي اناعۇرلىم تىعىز، پارمەندى ستراتەگيالىق ىستەستىك ارقىلى ەكى ەلدىڭ ورىندى مۇددەسىن باتىل قورعاۋى، دۇنيە جۇزىندەگى وڭتۇستىك ەلدەردىڭ ىنتىماعىن قورعاۋى، ءىرى ەلدىڭ جانە بىرلەسكەن مەملەكەتتەر ۇيىمى حاۋىپسىزدىك القالار كەڭەسىنە تۇراقتى القا ەلدىڭ جاۋاپكەرشىلىگىن ايگىلەۋى كەرەك. ەكى جاق ستراتەگيالىق تۇراقتىلىقتى ساقتاپ، ءوزارا سەنىم ارتىپ، ءوزارا قولداپ، بىرگە دامىپ، ءوز ءىسىن ويداعىداي ىستەۋى كەرەك. كورشىلەستىك جانە ءبىرىن - ءبىرى تولىقتاۋ باسىمدىعىن تولىق ساۋلەلەندىرىپ، جان - جاقتى سەلبەستىكتى تەرەڭدەتىپ، اركىمنىڭ ءوز - ءوزىنىڭ دامۋ سەرپىمدىلىگىن جوعارىلاتۋ كەرەك. كوپ جاقتى سەلبەستىكتى كۇشەيتىپ، كوپ جاقتىلىقتى باتىل قورعاپ جانە امالياتتا ايگىلەپ، بىرلەسكەن مەملەكەتتەر ۇيىمىنىڭ بەدەلى مەن ومىرشەڭدىك كۇشىن قول ۇستاسا قايتا سەرپىلتىپ، شاڭحاي سەلبەستىك ۇيىمى، بريكس ەلدەرى سياقتى جۇلگەلەردە تىعىز سەلبەسىپ جانە سايكەسىپ، حالىقارالىق ءتارتىپتىڭ اناعۇرلىم ءادىل، ۇيلەسىمدى بەتالىسقا قاراي دامۋىن ىلگەرىلەتۋ كەرەك.

لاۆروۆ پۋتين زۇڭتۇڭنىڭ ءتوراعا شي جينپيڭگە دەگەن ىقىلاستى سالەمىن جانە ىزگى تىلەگىن جەتكىزىپ، مىنالاردى ءبىلدىردى: ەكى ەل مەملەكەت باسشىلارىنىڭ ستراتەگيالىق جەتەكشىلىگىندە، رەسەي - جۇڭگو قارىم - قاتىناسى كۇردەلى سىرتقى ورتادا جوعارى سەرپىمدىلىكتى ايگىلەدى، ساۋدا، قارجى قوسۋ سەلبەستىگىنىڭ ارىنى جاقسى، گۋمانيتارلىق اۋىس - كۇيىس كۇن سايىن جيىلەي ءتۇستى، بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى، ازيا - تىنىق مۇحيت ەكونوميكالىق سەلبەستىك ۇيىمى سياقتى كوپ جاقتى تۇعىرلاردا تىعىز سايكەسىپ وتىر. قاتاڭ دا كۇردەلى حالىقارالىق جاعداي الدىندا، رەسەي جاق جۇڭگو جاقپەن بىرگە، ەكى ەل مەملەكەت باسشىلارى كەلىسكەن ماڭىزدى ورتاق تانىمدى شىنايى تياناقتاندىرىپ، جوعارى جىكتەگىلەردىڭ بارىس - كەلىسىن ساقتاپ، ناقتى ىستەر سەلبەستىگىن كۇشەيتىپ، گۋمانيتارلىق اۋىس - كۇيىستى جەبەپ، حالىقارالىق ادىلدىكتى، تۋراشىلدىقتى قورعاپ، رەسەي - جۇڭگو قارىم - قاتىناسىنىڭ اناعۇرلىم زور دامۋعا قول جەتكىزۋىن ىلگەرىلەتىپ، دۇنيە ءجۇزىنىڭ بەيبىتشىلىگىنە، ورنىقتىلىعىنا اناعۇرلىم زور ۇلەس قوسۋدى قالايدى.

ۋاڭ ي كەزدەسۋدە بىرگە بولدى.

كەلۋ قاينارى: حالىق تورابى